Read lango 2 Tekwaro 13 Bible Online

2 Tekwaro 13 - lango bible

2 Tekwaro 13

¹I mwaka me apar wie aboro me loc a Jeroboam, en ame Abija ocako loyo kede jo Juda,

²En obedo loc i Jerucalem pi mwakki adek. Nyiŋ tottere onwoŋo Mikaya, ame obedo nyaka Uriel, dano me Gibea.

³Lweny rik obedo tye i akina Abija kede Jeroboam. Abija rik te wot i lweny kun tye kede jo atek meicel i lweny ame romo tutumia aŋwen ame oyero ayera. Jeroboam rik te ryeyo monyere me lweny kede, kun tye kede jo me lweny ame romo tutumia aboro, ame gin luŋ obedo jo atek meicel i lweny ame daŋ obedo jo ame oyero ayera.

⁴Abija te wot cuŋ i jo mere i wi kidi me Jemaraim ame tye i lobo obedo kidikidi me Epraim, te kobo ni, “Yin Jeroboam kede jo Icrael luŋ, winy wunu koppa!

⁵Mom ce iŋeo wunu ni Rwot Obaŋa me Icrael onwoŋo otyeko miyo tic me loyo jo Icrael nakanaka i ciŋ Daudi kede ikwae, i cikere ame omoko kede kado?

⁶Koŋ inen, Jeroboam wot a Nebat, amiro a Culeman wot a Daudi, rik otimjere me jem i kom adwoŋŋere.

⁷Jo mogo a kitegi reco, ocokere baŋe te jem i kom Rekoboam wot a Culeman i kare ame Rekoboam onwoŋo pwod tidi, tammere daŋ onwoŋo pwod goro, ame mom romo kwero tamgi.

⁸“Koŋ inen, aman doŋ imito wunu mayo loc a Rwot oko i ciŋ ikwae a Daudi, pien wun ipol wunu meicel, dok daŋ itye wunu i cal twoni me jabu aryo ame Jeroboam otio pirwu me bedo obaŋewu.

⁹Mom doŋ iryemo wunu olamdog a Rwot oko, ame obedo ikwae Aron, kede Olevi, eka ite keto wunu olamdog kenwu calo rok ame tye i lobo apapat? Ŋattoro keken ame obino te bino kwerre kene atin twon onyo nyogi romi abiro, dano-nono doko alamdog a gigi-mogo ame mom obedo obaŋa kadi acelloro.

¹⁰Aco wan giwa, Rwot en obedo Obaŋawa, mom ru daŋ oya giwa i baŋe. Wan otye kede olamdog ame tio baŋ Rwot, ame gin obedo ikwae Aron, kede Olevi ame konyogi.

¹¹Gin oyalo Rwot odiko kede otyeno, kun oyale i mot awaŋa, kede odok a kur, dok daŋ ocano ogati i nyim Rwot i meja ame otio i jabu ame olio aber meicel, ogwoko daŋ acib tara, me wek maccere bed lyel otyeno luŋ, Mannono wan otimo me gwoko cik a Rwot Obaŋawa, cite wun ityeko ya wunu oko i baŋe.

¹²Nen ba, Obaŋa gire tye kedwa, kun telo nyimwa, olamdog tye kede apel ame okuto me lwoŋo jo me bino lweny kedwu, Ama, wun ikwae Icrael, myero kur ilweny wunu i Rwot, ame obedo Obaŋa a kwariwu; pien mom gire itwero wunu loye.”

¹³Jeroboam onwoŋo otyeko cwayo dul mony ocele owoto opono oko anyim, me lokere i komgi i tuŋ ŋegi. Monnyere rik onwoŋo tye i nyim jo Juda, kun jo ocele tye opono oko i ŋe omony me Juda.

¹⁴I kare ame jo Juda oneno, gin onwoŋo ni okwor tye i nyimgi kede i ŋegi; gin te cako kok baŋ Rwot, kun olamdog kuto apel.

¹⁵Jo Juda te cako wo i redo me lweny. I kare ame gin oredo, Obaŋa te miyo Abija kede jo juda loyo Jeroboam kede jo Icrael!

¹⁶Jo Icrael te cako mukere i ŋwec oko i nyim jo me Juda, Obaŋa te miyogi i ciŋ jo Juda.

¹⁷Abija kede jo mere te nekogi atek meicel; jo Icrael ame te to i akina olweny ame onwoŋo oyero ayera te romo tutumia mia abic.

¹⁸Mannono en kite ame oloo kede jo Icrael i kare-naca, jo me Juda oloogi pien gin onwoŋo ojeŋere i kom Rwot Obaŋa a kwarigi.

¹⁹Abija te ryemo yo Jeroboam, te wot mayo boma a jo Icrael mogo oko i baŋe, omao Betel kede pacci ame tye i ŋete, Jecana kede pacci ame tye i ŋete, Epron kede pacci ame tye i ŋete.

²⁰I kare Abija luŋ, Jeroboam mom dok onwoŋo teko moro kadi acel ame romme lweny. Rwot ogoe, te to oko,

²¹Cite Abija omedde ameda i bedo atek, Onyomo mon apar wie aŋwen; gin te nywalle itino awobe pyeraryo wie aryo, kede anyira apar wie abicel.

²²Kop i kom ginnoro luŋ ame Abija obedo tiyo ame mom ocoo kan gin ame en obedo kobo, gin luŋ tye ocoo i buk adwarpiny Iddo.