Read lango 2 Tekwaro 14 Bible Online

2 Tekwaro 14 - lango bible

2 Tekwaro 14

¹Abija oto, te wot weo karacel kede kwari mere, ote yiko kome i paco a Daudi. Wode Aca en ame te leyo kakare, I kare mere luŋ lobo koŋ owe kun kuc tye iye pi mwakki apar.

²Aca rik obedo timo gin ame nen aber kede atira i nyim Rwot Obaŋa mere.

³En okwanyo keno lam me woro jogi orok oko, dok te mumuko ka woro jogi ame tye i wi kidi, kede gweŋe ame ocibo i ka woro jogi kun daŋ toŋo yen luŋ ame oguguro i ka woro jok a dako ame olwoŋo ni Acera.

⁴En te ciko jo Juda ni myero ocak woro Rwot, ame obedo Obaŋa a kwarigi, dok daŋ myero olub cikkere kede gin ame en ociko luŋ.

⁵Dok daŋ omumuko ka woro jogi luŋ ame rik tye i boma luŋ i Juda kede keno lam me waŋo odok a kur luŋ. I kare mere daŋ kuc obedo tye i Juda.

⁶En te gero boma ame ocecelo i Juda, pien lobo onwoŋo tye kede kuc. En mom olwenyo kadi acel i kare me loccere luŋ, pien Rwot omio kuc obedo tye i kare mere.

⁷En okobbi jo Juda ni, “Oger wunu boma magi oko, ote guro wunu oko apama cel, kun daŋ ogero iye udi mogo ame ocuŋ malo iguŋ, ame doggolagi tye kede kika ame ocegogi atek; lobe-ni gire pwod megwa, pien wan obedo timo gin ame obaŋawa mito, kun obino baŋe kare luŋ, omio en omiowa kuc tuŋŋi kede tuŋŋi.” Gin te gero, ote daŋ lony atek meicel.

⁸Aca rik onwoŋo tye i mony ame romo tutumia mia adek ame onwoŋo oya i Juda, wegi kwode kede toŋi, kun otye kede ocirikale me mony ame oya i Benjamin, ame romo tutumia mia aryo kede pyeraboro ame tye i kwode kede atero; jo-no luŋ rik onwoŋo obedo jo ame tek meicel i lweny.

⁹Jera, dano me Eciopia, obino me obino lweny i komgi, kun tye kede ocirikale me lweny ame romo million acel, kede gadigadi me lweny mia adek; gin te bino naka i Mareca.

¹⁰Aca te wot lweny kede, kun gin doŋ oryeye me lweny oko i luŋ me Jepata i Mareca.

¹¹Aca te cwayo koko mere baŋ Rwot Obaŋa mere, kun kobo ni, “Ama Rwot, mom tye gire ŋattoro ame rom kedi ame twero konyo jo agoro i lweny i jo atek. Konywa, Ama Rwot Obaŋawa, pien wan ojeŋere i komi, wan obino i nyim jo man adwoŋ wok-ki kede nyiŋi. Ama Rwot, yin gire ibedo Obaŋawa; kur iye dano oloi.”

¹²Rwot te miyo Aca kede jo Juda, loyo jo Eciopia oko, jo Eciopia te mukere oko i ŋwec,

¹³Aca kede monnyere te ryemo yorgi naka i Gerar; jo Eciopia te to luŋ ame moro mom te doŋ kadi acel, pien onwoŋo doŋ onyobere oko i nyim Rwot kede monnyere, Jo Juda te yeye i lwak jami ayaka apipim.

¹⁴Gin te jwero jo luŋ ame onwoŋo tye i boma luŋ ame tye i ŋet Gerar, pien onwoŋo Rwot omio lworo omako jo i kuno. Gin te yako jami i boma-nogo luŋ, pien jami ayaka onwoŋo dwoŋ atek i yigi.

¹⁵Gin te cobo mony i kom okwattogo ame onwoŋo bedo i kema ame rik tye kede dok, ote tero rommi apipim kede inaga daŋ. Gin doŋ te dok i Jerucalem.