Read lango 2 Tekwaro 15 Bible Online

2 Tekwaro 15 - lango bible

2 Tekwaro 15

¹Cuny Obaŋa te bino i kom Ajaria wot Obed,

²omio en te wot rwatte kede Aca, te kobbe ni, “Tim ber iwiny koppa, yin abaka Aca, karacel kede wun jo Juda kede Benjamin luŋ. Rwot bedo kedwu ka ce wun daŋ ibedo wunu baŋe. Ka ce ibedo wunu yenye, ibino nwoŋe wunu, ento ka ce iya wunu oko i baŋe, en daŋ bino kwerowu oko.

³Jo Icrael obedo aboŋo Obaŋa me ateni pi kare alac, kun olamdog ame pwonygi daŋ mom, dok cikkoro daŋ pe;

⁴cite i kare ame gin tye kede peko adwoŋ, ka gin olokere baŋ Rwot, ame obedo Obaŋa me Icrael, kun omito dok baŋe, gin onwoŋe.

⁵I kare-nono luŋ onwoŋo ŋattoro i akinagi mom tye kede kuc me wot kannoro onyo me dwogo paco pien ayelayela onwoŋo dwoŋ meicel baŋ jo luŋ ame onwoŋo bedo i lobo luŋ.

⁶Apokapoka onwoŋo dwoŋ meicel, rok onwoŋo lwenyo i rok, kun boma man lwenyo i boma ocele, pien Obaŋa onwoŋo obedo yelogi kede kite me can apapat.

⁷Ento wun myero ibed wunu kede cuny ame tek! Kur inyobere wunu pien obino culowu pi gin ame itio wunu.”

⁸Kare ame Aca owinyo kop luŋ ame adwarpiny Ajaria wot Obed orabo, cunye odoko atek, en te cako kwanyo cal jogi luŋ ame ipyeda ame onwoŋo tye i lobo Juda kede Benjamin, kede i boma luŋ ame onwoŋo en omao i lobo obedo kidikidi me Epraim, te yiko keno lam a Rwot ame rik onwoŋo tye i doggola me donyo i ot a Rwot.

⁹En te coko jo Juda kede jo Benjamin luŋ kede jo ame onwoŋo oya i Epraim, Manace, kede Cimeon, ame onwoŋo bedo i akinagi, pien jo apol meicel onwoŋo odak oko baŋe pien gin oneno ni Rwot tye ka tic kede.

¹⁰Gin luŋ ocokere i Jerucalem i dwe me adek, i mwaka me apar wie abic me loc Aca.

¹¹Gin te yalo Rwot kede mot i ninonono, kun motgi-nono okwanyo i kom jami ame yam gin oyako ote kelo; gin oyale i twoni mia abiro kede nyogi rommi tutumia abiro.

¹²Gin dok te cikere i nino-nono me woro Rwot, ame obedo Obaŋa a kwarigi, kun owore i cunygi luŋ, kede tipogi luŋ;

¹³dok daŋ ni ŋattoro keken ame mom bino woro Rwot, ame obedo Obaŋa me Icrael, obino neko oko, kadi atin onyo dano adwoŋ, ico onyo dako,

¹⁴Gin te kwoŋ baŋ Rwot kun oredo i dwoŋ aloŋo, ame owo awoa, daŋ okuto apel kede bilo.

¹⁵Jo Juda luŋ cunygi te bedo ayom i kwoŋŋono, pien gin onwoŋo okwoŋo kede cunygi ducu, ote daŋ cako wore kun otye i mit adwoŋ meicel, Rwot daŋ te gamogi, te miyogi, kuc i kabedo luŋ ame omanogi.

¹⁶Abaka Aca te ryemo anaka tottere oko i dittere me bedo tota abaka, pien onwoŋo en otio cal jok ame ipyeda a dako ame olwoŋo ni Acera. Aca ototoŋo cal jokkono oko, te wot waŋo oko i ŋet kulo me Kidron.

¹⁷Kadi bed en mom omumuko ka woro jogi ame tye i wi kiddi malo; cite en omedde keto gennere i kom Rwot pi kare me kwo mere luŋ,

¹⁸En okelo mot a rik pappere otyeko jalo baŋ Rwot karacel kede mege ame en ojalo, acalo jabu, ryal kede jami ocele, te ketogi i ot a Rwot.

¹⁹Lweny te dok koŋ bedo pe tuno kede naka i mwaka me pyeradek wie abic me loccere.