Read lango 2 Tekwaro 16 Bible Online

2 Tekwaro 16 - lango bible

2 Tekwaro 16

¹I mwaka me pyeradek wie abicel me loc Aca, Baaca abaka a jo Icrael owoto te wot cobo mony i kom jo Juda, en te mako boma me Rama, te daŋ celo oko me geŋo jo wot i Juda baŋ abaka Aca kede jo Juda me wot kannoro ocele,

²Aca te kwanyo ryal kede jabu ame rik tye i ot kano lim a Rwot, kede en ame onwoŋo tye i ot kano lim abaka, te cwayo baŋ Ben-adad, abaka me Curia, ame rik onwoŋo bedo i Damaciko, kun kobbe ni,

³“Tim ber iye ocikere kedi, kite ame rik kwarona kede kwaroni otimo, Nen ba, an acwayi ryal kede jabu. Tim ber iwot itur cikereni oko i Baaca abaka me Icrael, me en bin kwany monnyere oko.”

⁴Ben-adad daŋ te winyo gin ame Aca okobbe, te cako cwayo odoŋe ame telo monnyere me ero wot lweny i kom pacci mogo me Icrael, eka te mayo Ijon, Dan, Abel-Maim, kede boma luŋ me kano cam i lobo Naputali.

⁵Kare ame Baaca owinyo, oweko celo Rama oko, t i ccere te daŋ gik oko,

⁶Abaka Aca te wot i jo Juda luŋ, te wot weko gweŋe me Rama kede bayi luŋ, ame Baaca obedo tic kedgi me celo Rama, eka te lunyo celo i Ceba kede Mijipa.

⁷I kare-nono Kanani, aran-piny, te bino baŋ Aca abaka me Juda, te kobbe ni, “Pien yin ilunyo keto genni i kom abaka me Curia akaka keto genni i kom Rwot Obaŋani, omio mony abaka me Curia obwot oko i ciŋi.

⁸Mony a jo Eciopia kede me a jo Libia mom rik onwoŋo dwoŋ meicel, kun daŋ otye kede gadigadi apipim kede wegi aguragura daŋ? Kadi bed amannono, pien yin ibedo kede gen i kom Rwot, omio Rwot omiogi i ciŋi.

⁹Pien Rwot neno kabedo luŋ i wi lobo, me wek elweny pi jo ame mom i balloro i cunygi i kome. Kan doŋ yin itimo tim me miŋo meicel, pien cakere amanni wot kede anyim yin ibino bedo lweny alwenya.”

¹⁰Akemo te mako Aca meicel i kom aranpiny, omake te kete i ot kol kun otweo tyene kede tol, pien cunye onwoŋo owaŋ i kome pi kop man. Dok te keto can i kom jo mogo i akina lwak i kare acellono.

¹¹Kop i kom ginnoro luŋ ame Aca otimo a mom ocoo kan, cakere iyi ageyi naka i agikki, gin luŋ tye ocoo i buk me Tekwaro ame tito kop i kom oloc me Juda kede Icrael.

¹²I mwaka me pyeradek wie aboŋwen me loccere, two moro rik te mako tyene, two-nono te medde atek meicel, kadi amannono, i kare ame en two-nono mom daŋ aporo pi lokere baŋ Rwot ento te wirre ka baŋ daktal.

¹³Aca oto te wot weo karacel i kwari mere, en oto i mwaka me pyeraŋwen wie acel me loccere,

¹⁴Oyiko kome i lyel ame rik en i kome okunyo pire kene i paco a Daudi. Gin opyelo kome i gin ame rik oyiko me yike, kun oketo iye kite odok a ŋwecgi kur apapat ame odiro a yiko moo wir oyiko; gin dok te kuto twon mac adwoŋ meicel me nyuto worogi i kome.