Read lango 2 Tekwaro 17 Bible Online

2 Tekwaro 17 - lango bible

2 Tekwaro 17

¹Wode Yekocafati en ame te leyo kakare en Aca, en te yikere doŋ atek meicel i lweny i jo Icrael.

²En oketo monnyere luŋ i boma ame ocecelo luŋ ame tye i Juda te daŋ keto mony i kabedo luŋ ame tye i Juda kede i boma luŋ ame tye i lobo me Epraim ame rik pappere Aca omao.

³Rwot obedo gwoko Yekocafati, pien obedo lubo kite a pappere ame rik koŋ ogeo bedo kede; en gire mom obedo woro Baal,

⁴En obedo keto gire gennere i kom Obaŋa a pappere, kun daŋ lubo cikkere luŋ, En mom obedo lubo kite a jo Icrael.

⁵Mannono omio Rwot te moko loccere atek meicel, kun jo me Juda luŋ kelo mot baŋ Yekocafati; en te doko twon alonyo meicel, kun daŋ jo wore atek,

⁶En obedo lo a cunye tek meicel i lubo gin a Rwot mito; dok daŋ omumuko ka woro jogi luŋ ame onwoŋo tye i wi kiddi, tek kwanyo daŋ jok a dako ame olwoŋo ni Acera oko i Juda.

⁷I mwaka me adek me loccere en ocwao rwode mere magi me wot pwony i boma luŋ me Juda: Ben-kail, Obadia, Jekaria, Netanel kede Mikaya;

⁸ocwao daŋ Olevi magi owoto karacel kedgi: Cemaya; Netania, Jebadia, Acael, Cemiramot, Yekonatan, Adonija, Tobija, kede Tobadonija, karacel kede olamdog magi: Elicama kede Jekoram.

⁹Jo man te bedo pwony i Juda, kun otye i buk me cik a Rwot; gin owowota i boma me Juda luŋ kun opwonyo jo.

¹⁰Loc apapat luŋ ame onwoŋo omano Juda te cako bedo kede lworo oko i kom Rwot, mom dok ote tiŋere me lweny i Yekocafati.

¹¹Jo mogo me Piriciti te kelli Yekocafati ryal adwoŋ meicel karacel kede mot ocele mege; jo Arab daŋ te kelle nyogi rommi tutumia abiro, i mia abiro kede nyogi dyegi tutumia abiro i mia abiro.

¹²Yekocafati te medde ameda i doko twon lo moro adwoŋ meicel. En te gero kabedo ame ocecelo atek kede boma me kano jami i Juda luŋ.

¹³En ogero daŋ kagi-mogo ame romo kano jami adwoŋ meicel i Juda. En onwoŋo tye ocirikale atek meicel i lweny i Jerucalem.

¹⁴Welgi ame okwano kun lubere i doggola a kwarigi onwoŋo tye kit man: Otel wi mony ame onwoŋo telo jo tutumia me doggola a Juda onwoŋo obedo: Adna, atel wi mony, kede twoni jo ame tek i lweny ame romotutumia mia adek.

¹⁵Me aryo te bedo Yekokanan, atel wi mony, kede twoni jo atek i lweny ame romo tutumia mia aryo kede pyeraboro nono,

¹⁶Eka me adek te bedo Amacia wot a Jikri, ame omiye kede me tic me ot a Rwot ame onwoŋo daŋ tye kede twoni mere atek i lweny ame romo tutumia mia aryo.

¹⁷Eka i doggola a Benjamin, te bedo Aliada, ame en obedo twon lo moro atek meicel i lweny, kun tye ocirikale ame tek i lweny ame romo tutumia mia aryo, ame gin luŋ otye i kwot kede atero.

¹⁸Me aryo te bedo Yekojabad ame onwoŋo tye ocirikale ame oterre oko i jami lweny, ame romo tutumia mia acel kede pyeraboro nono.

¹⁹Jo magi onwoŋo obedo jo ame tio pi abaka, medo kede i kom mony ame abaka oketo i boma ame ocecelo atek i Juda luŋ.