Read lango 2 Tekwaro 18 Bible Online

2 Tekwaro 18 - lango bible

2 Tekwaro 18

¹Yekocafati rik onwoŋo tye kede lonyo adwoŋ meicel, kun daŋ jo woro meicel; en te cako yiko kop me nyommi wode nyaka Akab.

²Kare ame mwaka okato anonok, Yekocafati te wot baŋ Akab i Camaria, Akab rik te jole aber meicel kede jo ame onwoŋo owoto kede; onekke rommi kede twoni apipim, Akab te cako kobbe ni myero owot ocak lweny i kom boma me Ramot-gilead.

³En te penyo Yekocafati ni, “Ibino wot kedwa me wot lweny i kom Ramot-gilead?” En te gamo ni, “Jamina luŋ obedo megi, an amegi, jona daŋ megi. Wan obino bedo kedwu i lweny.”

⁴Yekocafati te kobo baŋ abaka me Icrael ni, “Koŋ ige penyo Rwot, me owiny ŋo ame en bino kobo.”

⁵Abaka me Icrael te cako coko odwarpiny luŋ karacel, ame romo jo mia aŋwen twal, te kobbigi ni, “Awot alweny i kom Ramot-gilead onyo kur awot kuno?” Odwarpiny te gamo ni, “Woti; pien Obaŋa bino miyo i ciŋi yin abaka.”

⁶Cite Yekocafati te dok kobo ni, “Adwarpinnyoro ocele ame obedo me a Rwot mom tye kan, me koŋ dok openy?”

⁷Abaka me Icrael te gamo ni, “Otye kede lo moro ocele ame olwoŋo ni Mikaya ame otwero penyo kop a Rwot i baŋe, en obedo wot a Imla; cite an cunya mom mito dano-nono kadi acel, pien en kom mom ru otyeto kopporo aber pira, kare luŋ tyeto kop a mom ber keken.” Yekocafati te gamo ni, “Pe amannono abaka, wek kur ikob amannono.”

⁸Abaka me Icrael te lwoŋo adwoŋŋoro me mony te kobbe ni, “Wot ilwoŋo Mikaya wot a Imla ru bino oyotoyot.”

⁹I caa-nono onwoŋo abaka me Icrael kede Yekocafati abaka me Juda tye obedo i wi komgi me loc, kun oruko boŋŋigi me kwogo, ote bedo kede i laro moyo kal ame onwoŋo tye i ŋet dogcel me donyo i boma me Camaria, kun odwarpiny luŋ tye atyet i nyimgi.

¹⁰Jedekia wot a Kenaana otio cal tuŋ lee me nyonyo, te kobo ni, “Rwot okobo ni, ‘Yin ibino coro jo Curia i tuŋ acalo magi tuno waŋ ame ijwerogi ducu.’ ”

¹¹Odwarpiny luŋ te tyet kittono, kun ŋat acel acel kobo ni, “Woti i Ramot-gilead me iwot ilo; Rwot bino miyo gire i ciŋi, yin abaka.”

¹²Lo ame onwoŋo owoto lwoŋo Mikaya, obino te kobbi Mikaya ni, “Nen ba, kop odwarpiny luŋ cukoro ka cuny abaka; mi koppi daŋ bed ame rom aroma kede megi ame cukoro cuny abaka.”

¹³Mikaya te gamo ni, “Kite a Rwot tye kede kwo-ni, gin ame Obaŋana bino kobo, en ame an abino kobo.”

¹⁴Kare ame en doŋ obino baŋ abaka, abaka okobbe ni, “Mikaya we, owot olweny i kom jo me Ramot-gilead onyo kur owoti?” Mikaya te gamo ni, “Wot kuno me iwot ilo lweny; obino miyogi i ciŋi.”

¹⁵Ento abaka dok te kobbe ni, “An abino ciki tyen adi ni myero ikobba ka kop ateni keken i nyiŋ Rwot?”

¹⁶Mikaya dok te kobo ni, “Anene jo Icrael tye oket atata i wi kiddi calo rommi ame akwatgi mom; dok Rwot daŋ okobo ni, ‘Adwoŋ ame loo jo man gire mom tye, wek ŋat acel acel odok gire paco mere i kuc’.”

¹⁷Abaka me Icrael te kobo baŋ Yekocafati ni, “An mom onwoŋo akobbi ni Mikaya mom twero tyeto kopporo aber i koma koŋo ka en arac keken?”

¹⁸Mikaya dok te gamo ni, “Koŋ doŋ iwiny kop a Rwot: Aneno Rwot tye obedo i wi kom me loccere kun mony me polo luŋ tye ocuŋ i ciŋe me tuŋ cam kede tuŋ cem,

¹⁹Eka Rwot te kobo ni, ‘Ŋa ame bino bwobwolo Akab abaka me Icrael me wot to i Ramot-gilead?’ Jo luŋ te bedo kobo kop apapat.

²⁰Cuny Acil te bino anyim, te bino cuŋ i nyim Rwot, te kobo ni, ‘An abino bwobwolo en.’ Rwot te penye ni, ‘Ibino bwolle i yore aŋo?’

²¹En te gamo ni, ‘An abino wot kuno, ate wot miyo cuny arac me goba bed iyi odwarpinnyere luŋ.’ Rwot te kobo ni, ‘Yin ibino bwobwolo en, ibino cobo tici gire; wot doŋ oko kuno, me iwot itim kittono.’

²²Doŋ aman ba, Rwot doŋ otyeko keto cuny arac me goba iyi odwarpinyi-ni, Rwot okobo kop arac i komi.”

²³Jedekia wot a Kenaana owoto baŋ Mikaya te bapo leme kede ciŋe, kun kobo ni, “Cuny a Rwot oya i baŋa i yore aŋo te kobo baŋi kop kedi?”

²⁴Mikaya te gamo ni, “Nen ba, ibino neno man i nino ame ibino wot pono iyi icika i tyelo.”

²⁵Abaka me Icrael te kobo ni, “Mak wunu Mikaya idwok wunu baŋ Amon, ame gabuna me boma kede Yowaci wot abaka;

²⁶me iwot ikobbigi wunu ni, ‘Abaka okobo ni, Ket wunu dano man i buc, mie wunu ecam cam ame obuc camo, kun imie wunu ogati kede pii keken tuno wan ame an adwogo paco kede kuc.’ ”

²⁷Mikaya te gamo ni, “Ka ce idwogo paco i kuc, mom Rwot oko bo keda.” Dok te medo ni, “Wun lwak luŋ myero iwiny wunu!”

²⁸Abaka me Icrael kede Yekocafati abaka me Juda te wot i Ramot-gilead.

²⁹Abaka me Icrael te kobo baŋ Yekocafati ni, “An aruko boŋo apat acalo dano moro ata, ate wot kede i lweny, ento yin myero iruk rukki me loc.” Abaka me Icrael te ruko boŋo mere apat; gin te wot lweny.

³⁰Abaka me Curia onwoŋo ociko odoŋe ame loo gadigadi mere ni, “Kur ilweny wunu i kom ŋattoro ocele kadi dwoŋ onyo tidi, cite myero ilweny wunu abaka me Icrael.”

³¹Doŋ i kare ame odoŋe aloo gadigadi oneno Yekocafati, gin okobo ni abaka me Icrael ene. Gin te cako lweny kede oko, Yekocafati te mwoco koko oko, Rwot te konye daŋ oko. Obaŋa te miyogi weke oko,

³²pien i kare odoŋe ame loo gadigadi oniaŋ ni en mom obedo abaka me Icrael, gin te doŋ weko ryemo yore oko.

³³Ento lo moro te telo atero mere bayo ata, te celo abaka me Icrael; atero mere te poto i akina nyonyo geŋo kore kede nyonyo ocele me geŋo kome ame onwoŋo calo pok rec. Abaka te kobbi lo ame onwoŋo aryemo gadigadi mere ni myero lokere dok kede cen pien owane oko.

³⁴Lweny rik te bedo agwa meicel i nino-nono, abaka me Icrael te bedo jeŋere kene i kom gadigadi mere kun nyime oneno jo Curia tuno otyeno; eka te to oko ame ceŋ apoto.