Read lango 2 Tekwaro 19 Bible Online

2 Tekwaro 19 - lango bible

2 Tekwaro 19

¹Yekocafati abaka me Juda te dok gire aber nak i paco mere i Jerucalem.

²Yeko wot a Kanani ame obedo aran-piny rik te wot baŋe me wot rwatte kede, te kobbe ni, “Itwero konyo otim tim areco, kun daŋ imaro giri jo ame dago Rwot? Pien yin giri itimo mannono, akemo doŋ omako Rwot oko i komi,

³Kadi bed amannono, tye gigi mogo abeco ame yin itimo, pien yin ityeko puputo yen ame oguro me woro jok a dako ame olwoŋo ni Acera oko i lobo, dok daŋ itemo keto cunyi itiyo gin ame Obaŋa mito.”

⁴Yekocafati onwoŋo bedo i Jerucalem; cite owoto i akina jo, ya i Beerceba wot kede naka i lobo obedo kidikidi me Epraim eka te miyo cuny jo dok i kom Rwot ame obedo Obaŋa a kwarigi.

⁵En te keto oŋolkop i boma acel acel ame ocelo atek, en otimo man i lobo me Juda luŋ,

⁶eka te kobbi oŋolkop ni, “Myero igwokere wunu i tic ame itio wunu, pien mom iŋolo wunu kop pi dano, ento pi Rwot; en tye karacel kedwu i kare ame nwoŋo iŋolo wunu kop.

⁷Doŋ ba, myero ibed wunu kede lworo i kom Rwot, kun iketo wunu cunywu meicel i gin ame itio wunu, pien Rwot Obaŋawa mom mito ni bal ŋolo kop kakare, akadi leŋere i ŋolo kop, onyo gamo lim me wil i muŋ.”

⁸Aco i Jerucalem Yekocafati te keto iye Olevi mogo, olamdog kede odoŋe atekere ame loo doggola acel acel iyi Icrael luŋ, me bedo oŋolkop pi Rwot, kede tyeko pyemmogo i akina jo. Jo man luŋ onwoŋo otyeko kopgi i Jerucalem.

⁹En te cikogi ni, “Bed wunu i lworo i kom Rwot i dog ticwu, dok daŋ myero iti wunu i cunywu ducu, kun igenne wunu.

¹⁰Ka ce ominwu moro ame bedo i boma moro me Juda okelo pido mere i nyimwu ame mako onyo remo, cik Obaŋa, icwil onyo gin ame Obaŋa ociko, wun myeroipwony wunugi aber, me kur okel balloro i komgi i nyim Rwot, me akemo Obaŋa kur pot i komwu, kede i kom omegowu. Ibino timo wunu amannono me kur ikel wunu roccoro.

¹¹Nen ba, Amaria ame obedo alamdog adwoŋ en ame bino loyowu i kopporo luŋ ame obedo me a Rwot, Jebadia wot Icmael, gabuna ame loo Juda, en ame bino loyo kopporo luŋ ame mako abaka; aco Olevi bino konyowu acalo orani me coyo kop luŋ ame jo pido. Ti wunu ticwu i tekcuny, Rwot myero bed i jo a cunygi atira.”