Read lango 2 Tekwaro 2 Bible Online

2 Tekwaro 2 - lango bible

2 Tekwaro 2

¹Culeman rik te cako tamo pi gero ot me woro Rwot, kede ot abaka.

²Culeman rik te yero jo ame romo tutumia pyeraboro ame ticgi obedo me payo kiddi i lobo obedo kidikidi, kede jo tutumia adek kede mia abicel ame loo ticgi.

³Culeman rik te cwayo kop baŋ Kuram, abaka me Turo, kun kobo ni, “Kite ame rik ibedo kede pappa Daudi kun icwaye bao cedar me gero ode, tim ber ibed keda daŋ kittono.

⁴Nen ba, an doŋ ayikere me gero ot me woro Rwot Obaŋana ame abinojalo baŋe me yale odok ame orubo i gin a ŋwece kur kede ogati ame obino keto bedo i nyime kare luŋ, kede dok me yale i mot awaŋa odiko kede otyeno, i nino me cabit luŋ, i por dwe kede i nino adoŋo luŋ ame Rwot Obaŋawa oketo, ame rik en ociko pi jo Icrael me agwoka nakanaka.

⁵Ot ame abino gero-nono bino bedo twon ot adwoŋ meicel, pien Obaŋawa dwoŋ kato Obaŋa ocele luŋ.

⁶Ento ŋa kara ame twero gero ot pi Obaŋa, kun kadi polo ame tye malo meicel, mom twero romme me bedo? Kara doŋ an abedo ŋa ame atwero gero ot pire-ni? Atwero gero ka kan ame myero waŋ iye odok akur i nyime keken.

⁷Pi mannono ba, amito icwaya lo ame adiro i tic me jabu, ryal, mola, nyonyo, kede i boŋo ame obedo amaramar kede en arema, kede en abululu bululu, kun daŋ opwonyo i goro kom jami, me en bin ti karacel kede otic ame odiro ame tye baŋa i Juda kede i Jerucalem, ame rik pappa Daudi omiogi baŋa.

⁸Cwaya daŋ yen me Lebanon, bao cedar kede cipre, kede bao algum, pien aŋeo ni omironi ŋeo toŋo yen ame tye i Lebanon. Dok daŋ omirona bino bedo karacel kede megi,

⁹me wek otoŋŋa bao adwoŋ meicel, pien ot ame agero-ni bino bedo adwoŋ dok me aura meicel.

¹⁰An abino miyo ŋano ame romo puku tutumia pyerabicel kede cayiri ame romo puku tutumia pyerabicel kede koŋo olok debe tutumia pyeraŋwen kede moo jeituni debe tutumia pyeraŋwen me kony joni ame bino toŋo yen.”

¹¹Kuram abaka me Turo te dok iye i waraga ame ocoo baŋ Culeman kun kobo ni, “Pien Rwot maro jo mere omio oketi me bedo abaka me loyogi.”

¹²Kuram dok te kobo ni, “Myero gire pwo Rwot Obaŋa me Icrael, ame rik otio polo kede lobo, ame omio Daudi wode aryek, ame tye kede niaŋ atut kede diro adwoŋ meicel, ame doŋ otyeko yikere me gero ot pi Rwot, karacel kede ode en ikome.

¹³“An doŋ acwayi lo ame adiro ame tye kede ŋec atut meicel, nyiŋe Kuramabi,

¹⁴wot a dako oya i atekere me Dan, pappere dano me Turo. En ŋeo tic i jabu, ryal, mola, nyonyo kede kiddi, bao, boŋo amaramar kede en obedo bululu bululu kede en arema, karacel kede boŋo camanini aber. En ŋeo daŋ tic ducu me goro coc i kom jami, twero lubo kit calloro keken me tic ame omie. En myero ti karacel kede joni ame odiro ame obedo tic baŋ adwoŋŋa ame en pappi Daudi.

¹⁵Pi mannono ba, yin doŋ myero icwayiwa ŋano kede cayiri, moo kede koŋo olok ame ityeko doŋ cikere me miyo.

¹⁶Wan obino toŋo kit yen ducu ame yin imito arpe tye i Lebanon. Obino tweyogi luŋ karacel ote bologi i pii me kwakwaŋa i wi pii calo boda naka i Yopa, eka yin doŋ ite omogi tero i Jerucalem.”

¹⁷Culeman te cako kwano wel jo luŋ ame obedo rok ocele ame bedo i lobo me Icrael, ame rom aroma kede en ame pappere Daudi rik koŋ otimo. Rik ote nwoŋo ni welgi romo jo tutumia mia acel kede pyerabic wie adek, kede mia abicel.

¹⁸En oyero jo tutumia pyerabiro i akinagi me bedo jo ame ticgi obedo me yeyo kit yec ducu, kede jo tutumia pyeraboro me muko kiddi i lobo ame obedo kidikidi, kede jo tutumia adek kede mia abicel me bedo odoŋe ame loo tic, me cukoro cuny jo me tiyo ticgi.