Read lango 2 Tekwaro 20 Bible Online

2 Tekwaro 20 - lango bible

2 Tekwaro 20

¹Icennere jo Moab kede jo Ammon karacel kede jo mogo me Meun te bino ero lweny i kom Yekocafati.

²Jo mogo owoto baŋ Yekocafati te ero kobbe ni, “Lwak mony ecipan tye aciro loka nam tuŋ ca, kun oya Edom me bino lweny kedi; nen, aman doŋ otuno oko i Kajajon-tamar.” (Man en nyiŋ En-gedi ocele mere.)

³Lworo omako Yekocafati, eka te ya wot penyo Rwot, en te ciko ni jo myero cak kanyo kec i Juda luŋ.

⁴Jo luŋ te cokere karacel, ote kwayo kony i baŋ Rwot. Jo me boma luŋ ame tye i Juda obino me bino kwayo Rwot ni konygi.

⁵Yekocafati te ya cuŋ i nyim lwak me Juda kede Jerucalem ame onwoŋo ocokere i ot a Rwot, i nyim dyekal anyen,

⁶te cako kwayo Obaŋa ni, “Ama Rwot Obaŋa a kwariwa, mom yin ibedo Obaŋa ame ibedo malo i polo? Mom yin en ame iloo rok luŋ ame tye i te loc apapat ame tye i wi podo? Teko kede twer tye gire i ciŋi, ame mom tye ŋattoro ame romo cuŋ i i nyimi,

⁷Mom yin ibedo Obaŋawa ame rik oryemo jo ame onwoŋo bedo i lobo man i nyim joni Icrael, ite miyo me bedo lobo ikwae a dyeri Abram twal?

⁸Gin obedo iye, ote gero kabedo me wori iye, kun okobo ni,

⁹‘Ka ce ginnoro arac otimere i komwa, acalo lweny, onyo lweny ame obino me cobo kop ame yin iŋolo i komwa, onyo too edeke onyo kec, wan obino cuŋ i nyimi i nyim ot man, me wori i ot man, kun obako dogwa baŋi pi can ame opoto i komwa, yin ibino winyo ite larowa.’

¹⁰Aco aman koŋ inen jo Ammon, jo Moab kede jo me kidi Ceir, ame yin rik mom iye ni jo Icrael cob mony i komgi i kare ame gin obino i lobo me Miciri, ame gin daŋ te wekogi doŋ kun mom ojwerogi.

¹¹Koŋ inen kite ame gin doŋ abino me bino culowa iryemowa i lobo ame obedo megi ame yin Obaŋa ame rik imiowa me bedo megwa,

¹²Ama Obaŋawa, mom ibino ŋolligi kop? Pien wan giwa mom otye kede teko me lweny i lwak mony adwoŋ a rom man ame tye ka bino me bino lweny kedwa ca. Wan aman mom oŋeo gin ame myero otim, cite waŋwa tye i komi yin.”

¹³Jo me Juda luŋ, karacel kede otinogi kede mongi onwoŋo tye ocuŋ i nyim Rwot.

¹⁴Cuny Obaŋa te bino i kom Alevi moro i nyim lwak kannono, Alevi-nono nyiŋe onwoŋo Jakajiel wot a Jekaria, ame obedo wot a Benayo, wot a Jeyel wot a Mattania en onwoŋo Alevi me doggola Acap,

¹⁵En te kobo ni, koŋ icik wunu yitwu, wun jo luŋ ame bedo i Jerucalem, kede abaka Yekocafati, Rwot okobo ni, “Kur ilwor wunu, cunywu daŋ kur poti i kom twon mony adwoŋ woku, pien lweny gire mom obedo megwu, ento me Obaŋa.

¹⁶Diki wot ilweny wunu kedgi, nen ba, gin abino kun obedo malo i wi tur me Jij; ibino nwoŋo wunugi kan ame luŋ ogik iye, i tutuŋ kide me tim eme Jeruel.

¹⁷Wun mom ibino lweny wunu; wun wot ite wot cuŋ wunu i kabedowu mot, wun inen wunu kite ame Rwot tye ka loyo kede lweny pirwu, wun jo me Juda kede Jerucalem. Kur ilwor wunu, cunywu kur poti; diki myero iwot ilweny wunu kedgi, Rwot gire bino bedo kedwu.”

¹⁸Yekocafati te ryebere piny kun nyime gudo lobo, jo Juda kede Jerucalem luŋ te oonyere piny i nyim Rwot, kun owore,

¹⁹Eka jo Levi me doggola a Kokat kede me doggola a Kora te ya malo pako Rwot Obaŋa me Icrael i dwoŋ aloŋo meicel.

²⁰Orwo mere, gin te dilo ibayi, ote wot naka i tim me Tekoa, Kare ame gin tye doŋ awot. Yekocafati te cuŋ kun kobo ni, “Wun jo Juda kede Jerucalem, winy wunu koppa! Myero iye wunu Rwot Obaŋawu, bino miyo icuŋ wunu atek; ye wunu kop odwarpinnyere, bino miyo iloo wunu.”

²¹I kare ame en doŋ otyeko penyo tam i baŋ lwak, en te yero jo ame myero wer wer me pako Rwot, kun oruko rukgi acil otelo kede nyim mony, ame ower ni, “Pwo wunu Rwot, pien marrere a mom lokere perakino atwal.”

²²Kare ame gin ogeo wero wer me pako Rwot, Rwot omio mony opono me kuro mony a jo Ammon, Moab kede me a jo me Kidi Ceir, ame onwoŋo obino me bino lweny i kom jo Juda, te babaŋogi oko.

²³Pien omio jo Ammon kede jo Moab ocako lweny i kom jo me Kidi Ceir, ote jwerogi oko luŋ. I kare ame gin doŋ otyeko jo me Ceir luŋ, gin dok te cako nekere kengi kengi.

²⁴Kare ame jo Juda oyito malo kan ocuŋ iguŋ me neno okwor, ame onwoŋo tye i tim, gin obolo waŋgi kun ame mony onwoŋo tye iye apipim; gin te neno kom jo oto tye oradde atata piny i lobo ame moro mom obwot kadi acel.

²⁵Kare ame Yekocafati kede lwakere obino me bino yako jamigi, gin te nwoŋo dok adwoŋ meicel, kede jami, boŋŋi, gigi mogo me wel, ame gin te bedo coko tuno ka doŋ mom oromo yeyo. Coko jami ayaka oterigi nino adek twal, pien jami onwoŋo dwoŋ okato kare.

²⁶I nino me aŋwennere, gin te wot cokere i luŋ me Pwoc, gin te bedo pwoyo Rwot kuno; omio nyiŋ kaci-naca pwod olwoŋo ni luŋ me Pwoc naka atot tin.

²⁷Gin luŋ doŋ ote dok oko cen, jo Juda kede jo Jerucalem luŋ, kun Yekocafati en ame telo yo. Owoto i Jerucalem ame olelo meicel, pien Rwot omiogi olelo pi loyo okworgi.

²⁸Gin te bino i Jerucalem, kun ogoo naŋa kede naŋa opuk, okuto daŋ apel naka i ot a Rwot.

²⁹Loc apapat me lobo te bedo i lworo meicel i kom Rwot ka gin owinyo ni Rwot olwenyo okwor a jo Icrael.

³⁰Mannono te miyo lobo ame tye i te Yekocafati bedo mot aboŋo ayela moro, pien Obaŋa mere omie weo i kabedo luŋ ame omano ŋet lobo mere.

³¹Yekocafati rik te loyo lobo Juda kittono. Mwaka me dittere onwoŋo romo pyeradek wie abic kare ame en doko aloc me Juda; en te bedo loc i Jerucalem pi mwakki ame romo pyeraryo wie abic. Nyiŋ tottere Ajuba ame obedo nyaka a Cilki.

³²En te bedo lubo kit a pappere Aca, kun mom ya iye kadi acel, en obedo tiyo gin ame nen aber baŋ Rwot.

³³Ka woro jogi ame onwoŋo tye i wi kiddi malo, mom gire obin omumuko; cuny jo onwoŋo mom ru tye i kom Obaŋa akwarigi.

³⁴Kop i kom ginnoro luŋ ame Yekocafati obedo timo, cakere i ageyi naka i agikki, gin luŋ tye ocoo i tekwaro a Yeko wot a Kanani, ame tye i buk obakki me Icrael.

³⁵Icennere Yekocafati abaka me Juda te ribere gin kede Akajia, abaka me Icrael, ame obedo timo timmogo areco.

³⁶En te ribere kede i payo mellogo ame woto i Tarcic, ote daŋ dok payo mellogo i Ejion-geber.

³⁷Eliejer wot a Dodavaku me Mareca te rabo kop Obaŋa i kom Yekocafati, kun kobo ni. “Pien iribere wun kede Akajia, Rwot bino rwobo gin ame itio oko.” Mel luŋ te tur oko, ame mom dok oromo wot i Tarcic.