Read lango 2 Tekwaro 21 Bible Online

2 Tekwaro 21 - lango bible

2 Tekwaro 21

¹Yekocafati te to wot weo karacel i kwari mere, ote yiko kome karacel i kwari mere i paco a Daudi. Wode Jekoram en ame te leyo kakare.

²En rik onwoŋo tye kede omego mere ame gin luŋ obedo awobe a Yekocafati, abaka me Juda: Ajaria, Jekiel, Jekaria, Ajaria, Mikael, kede Cepatia.

³Papagi rik omio mot adoŋodoŋo, omiogi ryal, jabu, jami mogo abeco me wel, kede boma mogo ame ocecelo atek i Juda; ento loc te miyo baŋ Jekoram, pien onwoŋo obedo wode me kao.

⁴Kare ame Jekoram doŋ oleo kom me loc a pappere, ame loccere daŋ doŋ omoko atek, en oneko omego mere luŋ i pala lweny, karacel kede rwode mogo me Icrael.

⁵En ocako loc kun mwaka me dittere doŋ oromo pyeradek wie aryo, en te bedo loc i Jerucalem pi mwakki aboro.

⁶Dako mere rik obedo nyaka Akab, mannono omio en te bedo timo gin ame nen arac i nyim Rwot kite ame Obakki me Icrael obedo timo, kun lubo gin ame jo me ot Akab obedo timo.

⁷Ento Rwot mom te mito tyeko ot a Daudi pi cikereame rik ecikere kede gin kede Daudi kede dok pien rik doŋ etyeko ciko oko ni ebino miyo ikwae en ame bedo i wi kom me loc nakanaka.

⁸I kare mere en ame jo Edom ojem kede i kom loc me Juda, eka ote keto abakagi kengi.

⁹Mannono rik te miyo Jekoram ya wot loka karacel kede odoŋe me monnyere, kede odoŋe ame loo gadigadi lwennyere luŋ, eka te ya dyewor cako lweny i kom jo Edom ame onwoŋo ogure oko dyere karacel kede odoŋe ame onwoŋo loo gadigadi me lwennyere.

¹⁰Cakere i kare-nono tuno kede tin, jo Edom te doŋ bedo loye kengi kun ojem ajema i loc me Juda. I kare-nono daŋ boma me Libina daŋ ojem kede i kom loccere, pien onwoŋo en oweko Rwot, ame obedo Obaŋa a kwari mere.

¹¹Medo i kom mannono, en onwoŋo ogero ka woro jogi i wi kiddi i lobo obedo kidikidi me Juda, eka te miyo jo ame onwoŋo bedo i Jerucalem kwero lubo cik a Rwot, dok te miyo Juda daŋ gak oko.

¹²En te nwoŋo waraga ame oya i baŋ adwarpiny Elia, ame ocoye, kun kobo ni, “Rwot Obaŋa a pappi Daudi okobo ni, Pien yin mom ibedo lubo gin ame pappi Yekocafati obedo timo, akadi lubo en ame Aca abaka me Juda obedo lubo,

¹³cite yin giri ite bedo lubo kite obakki me Icrael, dok daŋ ite miyo jo Juda kede jo Jerucalem kwero winyo cik a Rwot, kite amejo me ot Akab omio jo Icrael okwero kede winyo cik a Rwot, dok daŋ ineko-gu omegoni i kokome me ot a pappi, ame onwoŋo kitegi beco kati yin oko,

¹⁴nen ba, Rwot bino miyo can apek meicel poto i kom joni, itinoni, monni, kede i kom jamini luŋ,

¹⁵dok yin i komi daŋ two arac meicel bino maki, kun omako naka ciŋ yi luŋ, tuno waŋ ame amontenni luŋ owukere oko pi two-nono ame mom bino weki kare akadi nino moro acel.”

¹⁶Rwot te tugo akemo a jo Piriciti kede me a jo Arab ame ceggi i jo Eciopia, gin te cako lweny i kom Jekoram,

¹⁷Gin te bino lweny i kom Juda, ote daŋ mayo oko, ote yako jami luŋ ame gin onwoŋo i ot abaka, kun oyako daŋ anaka awobe mere kede monnere, ote weko ka wode acel keken doŋ. Yekoyakaji ame obedo wode me cogo.

¹⁸A doŋ magi luŋ otimere, Rwot te goyo Jekoram, omio too arac a mom can opoto i cin yie.

¹⁹Kare ame en obedo yelle i too-nono pi mwakki aryo, two-nono te miyo amontennere wukere oko, te to oko i twon rem adwoŋ meicel. Jo mere mom okuto maccoro i lyellere me nyuto woro baŋe kite ame rik otimo i me a kwari mere.

²⁰Mwaka me dittere doŋ onwoŋo oromo pyeradek wie aryo i kare ame en cako loc, en te bedo loc i Jerucalem pi mwakki oboro; ŋattoro mom gire oparo to mere. Gin te yiko kome i paco a Daudi, cite mom i lyel ame oyiko iye obakki.