Read lango 2 Tekwaro 22 Bible Online

2 Tekwaro 22 - lango bible

2 Tekwaro 22

¹Jo ame onwoŋo bedo i Jerucalem te yero Akajia, wode me cogo te bedo abaka kakare; pien mony a jo ame rik obino i gony karacel kede jo Arab rik onwoŋo oneko awobe mere adoŋo luŋ, Mannono te miyo Akajia wot a Jekoram, abaka me Juda doko abaka.

²Mwaka Akajia me dittere onwoŋo doŋ oromo pyeraŋwen wie aryo i kare ame en ocako loc, en te bedo loc i Jerucalem pi mwaka acel. Nyiŋ tottere rik onwoŋo Atalia, ame rik obedo akwar Omri.

³En daŋ obedo lubo kite a jo me ot Akab, pien tottere en ame rik obedo miye tam me timo tim areco.

⁴En obedo timo gin ame nen arac i nyim Rwot, kite ame jo me ot Akab obedo timo; pien i kare ame pappere oto gin jo me ot Akab en ame te bedo jo ame mie tam naka omie opoto.

⁵En owinyo tamgi, te wot gin kede Joram wot Akab, abaka me Icrael me wot lweny i kom Kajael me Curia i Ramot-gilead. Jo Curia te wano Jekoram,

⁶Joram te dwogo cen i boma me Jejreel me wot twoye kuno, iyi awano ame owane kede i Rama i kare me lwenyi i Kajael, abaka me Curia. Akajia wot a Jekoram abaka me Juda rik te wot limo Joram wot Akab i Jejreel, pien onwoŋo two.

⁷Obaŋa onwoŋo doŋ otyeko yiko ni Akajia myero to i yo wottere me wot limo Joram, Pien i kare ame en otuno kuno, en owoto gin kede Joram me wot rwatte i Yeko wot a Nimci, ame onwoŋo Obaŋa doŋ otyeko miya twer me jwero jo me ot Akab.

⁸Doŋ i kare ame Yeko rik onwoŋo tye acobo kop ame Obaŋa oŋolo i kom jo me ot Akab, en orwatte i rwode mogo me Juda kede itino omego Akajia, ame tio baŋ Akajia, eka te nekogi oko.

⁹En te bedo yenyo Akajia, eka te wot make i Camaria kan ame rik onwoŋo opono iye, ote kele baŋ Yeko ame te neke oko. Gin ote yiko kome, pien okobo ni, “En obedo akwar Yekocafati, ame rik obedo timo gin ame Rwot mito i cunye ducu.” Mom onwoŋo doŋ tye dano moro me ot Akajia ame onwoŋo romo loc.

¹⁰I kare ame Atalia tota Akajia oŋeo ni wode doŋ oto oko, en te ne ko jo luŋ me ot abaka, ame gin jo me doggola a Juda.

¹¹Ento wot Akajia ame olwoŋo ni Yowaci en ame te bwot, rik onwoŋo daŋ oneke oko, cite Yekoceba nyaka abaka Jekoram ame amin Akajia te kwale oko i akina awobe abaka ame rik onwoŋo otye aneko, te wot kane oko karacel kede apidi mere iyi ici ka mere me buto. Yekoceba nyaka abaka Jekoram, dako a Yekoyadi alamdog okane kittono, omio Atalia mom te neke,

¹²Yekoceba te bedo gwoko Yowaci pi mwakki kanyape, kun kano i ot a Rwot, ento i kare-nono Atalia en onwoŋo tye acalo abaka a dako.