Read lango 2 Tekwaro 23 Bible Online

2 Tekwaro 23 - lango bible

2 Tekwaro 23

¹Cite i mwaka me abiro mere, Yekoyadi te diyo cunye, te cikere odoŋe ame onwoŋo loo mony, ame rik telo jo mia mia: Ajaria wot a Jekoram, Icmael wot a Yekokanan, Ajaria wot Obed, Maceya wot Adaya, kede Elicapat wot a Jikri.

²Gin te wot mano lobo Juda luŋ, kun ocoko jo Levi i boma luŋ me Juda, kede odoŋe atekere me Icrael ame loo doggola a kwarigi, gin luŋ te bino i Jerucalem.

³Lwak luŋ ame ocokere te cikere kede abaka i ot Obaŋa. Yekoyadi te kobbigi ni, “Nen wunu wot abaka! Myero iye wunu en bed aloc kite ame Rwot otyeko kobo i kom ikwae a Daudi.

⁴Gin ame ibino timo wunu en: wun olamdog kede Olevi ka kare me ticwu oromo iceŋ cabit, acel me adek i komwu bino kuro dogcel,

⁵acel me adek i komwu te kuro dog ot abaka; acel me adek te kuro dogcel ame olwoŋo ni Acakki te ot; jo ocele mere luŋ bino bedo i dyekal me ot a Rwot.

⁶Mom ibino ye wunu dano moro donyo i ot a Rwot, koŋo ka olamdog kede Olevi ame tye i dog tic. Gin otwero donyo pien gin obedo jo acil, cite lwak ocele mere luŋ bino lubo gin ame Rwot ociko.

⁷Olevi bino guro abaka dyere kun ŋat acel acel omako jami me lwennyere i ciŋe. Dano moro keken ame bino donyo i ot obino neko oko. Ibino bedo wunu baŋ abaka i kabedo luŋ ame en bino wot iye.”

⁸Jo Levi kede jo Juda luŋ te lubo ginnoro luŋ ame Yekoyadi alamdog ocikogi iye. Ŋat acel acel i akinagi okelo jo mere baŋe, jo ame bino giko ticgi i ceŋ cabit; kede jo ame bino cako ticgi i nino me cabit, pien Yekoyadi alamdog mom ogonyo jo me ya i dog ticgi.

⁹Alamdog Yekoyadi te miyo baŋ odoŋe ame loo mony toŋi, kwode adoŋo, kede en atino ame rik onwoŋe obedo me abaka Daudi, kun ogwoko i ot Obaŋa.

¹⁰En oketo jo ame gwoko abaka, omiogi ocuŋ kun ŋat acel acel mako jami lwennyere i ciŋe, kun oguro ot dyere cakere i tuŋ anyarolum tuno kede naka tuŋ anyarodi, ame oguro keno lam kede ot daŋ.

¹¹Yekoyadi doŋ te cako kelo Yowaci wot abaka, te keto tok kwogo i wie ote miyo daŋ buk me cik ame mako kop i kom loc acalo abaka, Yekoyadi kede awobe mere te onyo moo i wie me kwere bedo abaka, ote tuco doŋ kannaler ni en obedo abaka. Jo te redo ni, “Kom abaka bed ayot nakanaka!”

¹²Kare ame Atalia owinyo woo a jo ame ariŋo, kun opako abaka, en owoto baŋgi kuno i ot a Rwot.

¹³Kare ame en obolo waŋe kuno, oneno abaka tye ocuŋ i ŋet pagi, i doggola me donyo, kun odoŋe mony kede okut apel oguro abaka. Lwak luŋ onwoŋo tye awinyo kede yomcuny, kun okuto apel. Atalia te cako yeco boŋo oko i kome, te mwoc koko kun kobo ni, “Tim me erupe! Tim me arupe!”

¹⁴Yekoyadi alamdog te kelo odoŋe mony ame onwoŋo telo mony, te kobbigi ni, “Ter wunu dako-nu okobe wunu kede i akina ocirikale; ka ŋattoro mito laro kwo mere myero inek wunu oko i pala romo. Pien alamdog onwoŋo mom mito ni neke i ot a Rwot.”

¹⁵Jo te cako mako dako-nono, ote tero oko, kun obeo kede i doggola ame aguragura donyo iye, ote tuno kede naka i ot abaka, ote neke oko kuno.

¹⁶Yekoyadi te cikere karacel i lwak luŋ kede abaka ni gin obino bedo jo a Rwot.

¹⁷Lwak luŋ te ya oko i kannono, ote ciro wot i ot a Baal, ote wot mumuko, ote reto oko piny; ote ŋiŋinyo daŋ keno lam luŋ karacel kede cal jogi ame onwoŋo tye kuno, oŋiŋido luŋ atitino, ote neko daŋ Matan ame rik obedo alamdog a Baal; oneke i nyim keno lam a Baal.

¹⁸Yeko yadi te doŋ keto jo me gwoko ot a Rwot, kun miyogi i ciŋ olamdog a jo Levi kede Olevi ame rik Daudi opokkigi tic me gwoko ot a Rwot, kun gin en a waŋo mot awaŋa ame oyalo kede Rwot, kite ame ocoo kede i cik a Muca, kun owero wer i yomcuny kite ame rik Daudi oyiko kede.

¹⁹En te keto okur dogcel me kuro dogcel me ot a Rwot, me neno ni ŋattoro ame mom cil i yore moro mom odonyo.

²⁰En doŋ te kwanyo odoŋe ame loo mony, rwode, gabuna ame loo lwak karacel kede jo luŋ me lobo-nono; gin luŋ ote cako lwoko abaka me tero i paco mere; oya kede i ot a Rwot, kun odorre obedo kede i dogcel i malo, ote wot naka i ot abaka. Abaka te wot bedo piny i wii kommere me loc.

²¹Mannono omio jo me lobo-nono luŋ obedo kede yomcuny, boma daŋ te kwe mot i kare ame oneko Atalia i pala lweny.