Read lango 2 Tekwaro 24 Bible Online

2 Tekwaro 24 - lango bible

2 Tekwaro 24

¹Yowaci odoko abaka kun mwaka me dittere oromo abiro, eka te bedo loc i Jerucalem pi mwakki pyeraŋwen. Nyiŋ tottere rik onwoŋo Jibia, ame turgi tye i Beerceba.

²En obedo tiyo gin ame tye atira i nyim Rwot pi kare me kwo alamdog Yekoyadi luŋ,

³Yekoyadi onyome mon aryo, ame te nywalle itino awobe kede anyira.

⁴Icennere Yowaci te moko tammere me yiko ot a Rwot.

⁵En te coko olamdog kede jo Levi, te kobbigi ni, “Wot wunu i boma a jo Juda luŋ, iwot ira wunu lim ibaŋ jo Icrael luŋ me yiko ot Obaŋawu mwaka i mwaka; buny wunu ticcere abunya.” Cite Olevi mom te bunyo kite ame okobbigi,

⁶Abaka te lwoŋo Yekoyadi alamdog adwoŋ, te penye ni, “Piŋo kara mom imio Olevi orao lim i baŋ jo ame bedo i Juda kede i Jerucalem kite ame rik Muca amiro a Rwot ociko ni myero raa i baŋ jo Icrael me tic me kema me caden?”

⁷Pien awobe Atalia, dako ame obedo timo gin arac ca, onwoŋo rik oturo ot Obaŋa; dok otio-gu i jami luŋ ame rik ojalo baŋ Rwot, ame tye i ot a Rwot, i woro Baal.

⁸Mannono te miyo abaka ciko ni myero ti canduk me coko lim, ote tiyo keto oko i ŋet doggola me donyo i ot a Rwot.

⁹Rik ote rabo koppere romo lobo Juda kede Jerucalem luŋ ni myero kel lim ame omio pi Rwot ame rik Muca amiro a Rwot ocako rayo i baŋ jo i tim.

¹⁰Mannono te yomoro cuny lwak luŋ kede rwodegi, omio gino luŋ ote kelogi limgi bolo i canduk tuno ka jo luŋ omio.

¹¹Dok kare luŋ ka Olevi okelo canduk lim baŋ otic abaka adoŋo mege, ka ce gin oneno ni lim dwoŋ meicel iye, aran abaka kede atic alamdog adwoŋ kwanyo limmono oko iyi canduk ote dwoko canduk i kakare. Man gin obedo timo nino i nino, omio gin te rayo lim adwoŋ meicel.

¹²Abaka kede Yekoyadi rik mio limmono baŋ otic ame loo tic me ot a Rwot, gin te paŋo kede jo ame gedo i kiddi karacel kede opa-bao me yiko ot a Rwot, kun en ocele ogelo i jo ame tio i nyonyo kede mola me yiko ot a Rwot

¹³Mannono rik te miyo otic tic atek meicel, naka ote yiko ot a Rwot aber odoco, atek kite ame rik tye kede con.

¹⁴Kare ame gin otyeko tic me yiko ot a Rwot, gin te dwoko lim odoŋ baŋ abaka kede Yekoyadi, ame ote tiyo kede jami me ot a Rwot; otimo jami me tiyo tic apapat kede jami me tic i waŋo mot me yalo Rwot bakuli me waŋo odok akur, kede jami ocele ame otio i jabu kede ryal. Gin doŋ te bedo yalo Rwot i mot awaŋa didik pi kare me kwo a Yekoyadi luŋ.

¹⁵Ento i kare ame Yekoyadi doŋ oti atek, ame mwaka me dittere doŋ oromo mia acel kede pyeradek twal, en te to oko kun doŋ ocato meicel.

¹⁶Oyiko kome i paco a Daudi i kan ame oyiko iye obakki, pien en obedo timo gin aber pi jo Icrael, pi Obaŋa kede pi jo ode.

¹⁷Kare ame Yekoyadi doŋ oto, rwode me Juda obino baŋ abaka, ote ryebere piny wore; abaka te winyo kopgi.

¹⁸Gin te cako kwero Rwot oko, ame obedo Obaŋa a kwarigi, ote lokere woro jok a dako ame olwoŋo ni Acera kede cal jogi. Bal man te miyo akemo mako Rwot i kom Juda kede Jerucalem.

¹⁹Kadi bed amannono, en koŋ te medde cwalo baŋgi odwarpiny me temo dwokogi baŋe, Odwarpiny obedo tucigi balgi, cite gin gigi te kwero winyo oko.

²⁰Obaŋa te cwayo cunnyere i kom Jekaria wot a Yekoyadi alamdog; en te ya cuŋ i nyim jo, te kobbigi ni, “Obaŋa okobo ni, ‘Piŋo kara ikwero winyo wunu cik a Rwot, ame omio mom itwero nwoŋo wunu gum? Pien ikwero wunu Rwot, omio an daŋ akwerowu oko.’ ”

²¹Gin te poro kop i keme, abaka te miyogi nape oko i gweŋ, ote neke oko i dyekal me ot a Rwot.

²²Abaka Yowaci omio oneke, mom opo gire tim aber me kica ame rik Yekoyadi papa a Jekaria otimo baŋe. Kare ame Jekaria ato, okobo ni, “Rwot myero nen gin otimere te culo kworrere.”

²³Iyi agikki mwaka-nono, mony a jo Curia obino me bino lweny i kom abaka Yowaci, Gin obino i Juda kede i Jerucalem ote jwero rwode a lwak luŋ, ote cwalo jami ame gin oyako luŋ baŋ abaka me Damaciko.

²⁴Kadi bed mony a jo Curia obino olweny anonok, cite Rwot omiogi oloo twon mony adwoŋ meicel, pien jo Icrael onwoŋo okwero Rwot Obaŋa a kwarigi. Mannono en kite ame Rwot oŋolo kede kop i kom Yowaci.

²⁵Kare ame mony doŋ oya oko i baŋ Yowaci, kun owane atek meicel, omiro mere te poro kop i kome, ote wot neke oko i kabuto mere pi remo a wot a Yekoyadi alamdog, En te to oko, ote yiko kome i paco a Daudi, cite mom oyike i lyel ame oyiko iye obakki.

²⁶Jo ame oporo kop i kome obedo Jabad ame tottere Cimeat nya jo Ammon, Yekojabad wot a Yowaci, wot a dako a nyiŋe Cimirit, nya jo Moab,

²⁷Kop i kom awobe a Yowaci, kede kop ame odwarpiny obedo kobo i kome, kede kite ame en oyiko kede ot Obaŋa, gin luŋ tye ocoo i buk ame gonyo kop ame tye i buk obakki. Wode Amajia en ame te leyo kakare.