Read lango 2 Tekwaro 25 Bible Online

2 Tekwaro 25 - lango bible

2 Tekwaro 25

¹Amajia ocako loc ame mwaka me dittere oromo pyeraryo wie kany en te bedo loc i Jerucalem pi mwakki pyeraryo wie aboŋwen. Tottere rik nyiŋe Yekoadan ame turgi onwoŋo tye i Jerucalem.

²En obedo timo gin ame tye atira i nyim Rwot, cite mom i cunye ducu.

³I kare ame loccere doŋ otyeko moko, en oneko omiro mere oko ame rik oneko pappere.

⁴Cite mom oneko itino a jo ame rik oneko pappere, kite ame ocoo kede i buk a Muca, kan ame Rwot rik ociko iye ni, “Papa atin mom obino neko pi bal a wode, atin daŋ mom obino neko pi bal a pappere; ento ŋat acel acel obino neko pi ballere en i kome.”

⁵Amajia te coko jo me Juda, en te ketogi i doggola, kun lubere i doggola a kwarigi ite loc otel mony ame loo jo tutumia kede mia pi jo Juda kede jo Benjamin luŋ. En okwano jo ame mwaka me ditogi doŋ oromo pyeraryo dok kede malo, en te nwoŋo ni jo ame oyero ame romo lweny, ame romo mako toŋ kede kwot, oromo tutumia mia adek nono.

⁶En dok te paŋo daŋ mony ocele ame tek meicel i lweny ame romo tutumia mia acel iyi Icrael, kun paŋogi i ryal, ame pekkere romo tan aŋwen.

⁷Cite dano Obaŋa rik te bino baŋe te kobbe ni, “Ama abaka, kur iwot i mony me Icrael, pien Rwot mom tye i jo me Icrael, jo me Epraimmi luŋ.

⁸Aco ka yin itamo ni mannono bino miyo ibedo atek i lweny, Obaŋa bino miyo okwori loi oko; pien Rwot tye kede teko ame twero miyo iloo lweny onyo oloi oko,”

⁹Amajia te penyo dano Obaŋa ni, “Kara doŋ ryal me tan aŋwen ame atyeko miyo baŋ mony me Icrael-li kono?” Dano Obaŋa te gamo ni, “Rwot twero dok miyi en ocele adwoŋ ame kato mannono oko,”

¹⁰Amajia te miyo mony ame oya Epraim obino baŋe dok oko turgi. Cunygi te waŋ meicel i kom jo Juda, ote dok paco ame akemo ocirogi oko.

¹¹Amajia rik te diyo cunye tero monnyere, te wot naka i luŋ me Kado, te neko jo me Ceir ame romo tutumia apar.

¹²Mony a jo Juda te mako daŋ jo ocele akwo ame romo tutumia apar, ote terogi i wi kidi malo ote corogi piny i wi kidi malo kuno; gin luŋ ote rette ŋinyere oko atitino.

¹³Cite omony me Icrael ame Amajia onwoŋo okwero ni kur wot kedgi i lweny, eka te dwogo oko cen, te wot cako lweny i kom boma mogo me Juda, cakere i Camaria tuno kede naka i Bet-koron ote neko jo ame romo tutumia adek, ote daŋ yako jami adwoŋ meicel.

¹⁴A doŋ Amajia odwogo oko i neko jo Edom, en onwoŋo odwogo kede jogi ajo Ceir, te cako worogi acalo obaŋe mere kun yalogi kede mot apapat.

¹⁵Mannono omio akemo omako Rwot i kom Amajia, te cwayo adwarpiny baŋe, ame te kobbe ni, “Piŋo kara omio dok icako woro obaŋe a rok ocele a mom laro jogi i ciŋ-nie?”

¹⁶Cite i kare ame onwoŋo en tye akop kede abaka te juke ni myero liŋ oko, kun penye ni, “Wan oketi me bedo ami-tam baŋ abaka bo? Piŋo kara omio imito ni neki?” Adwarpiny daŋ te liŋ, kun kuŋ okobo ni, “Aŋeo ni Obaŋa doŋ otyeko moko tamere me neki oko pi gin ame itimo-nono kede pi kwero winyo tamma.”

¹⁷Amajia abaka me Juda te dok penyo tam i baŋ jo, eka te cwayo kwena baŋ Yowaci wot a Yekoyakaji, ame obedo wot a Yeko, abaka me Icrael, kun kobbe ni, “Biye me obin orwatte i lek, me otemere koŋ.”

¹⁸Cite abaka Yowaci te dwoko kop baŋ Amajia, abaka me Juda ni, “Okuto moro ame onwoŋo tye i buŋ me Lebanon rik ocwalo kwena baŋ yat cedar me Lebanonon, kun kobbe ni, ‘Mia nyari me anyommi woda.’ Lee moro me Lebanon te beo kuno nyono okuto oko piny.

¹⁹Yin ikobo ni, ‘Nen doŋ atyeko loyo Edom oko’, aman doŋ icako wakere meicel. Ento aman doŋ kono koŋ ibedo paco. Piŋo kara itye ka roko jo ononono me kelo can i komi keni kede i kom joni?”

²⁰Cite Amajia te kwero winyo koppere-nono oko, pien onwoŋo obedo yik Obaŋa, me wek emigi i ciŋ okworgi, pien gin ocako woro obaŋe a jo Edom.

²¹Man omio Yowaci, abaka me Icrael te ya oko karacel i jo mere, te wot rwatte gin Amajia i bar lweny me Betcemec ame tye i Juda.

²²Ote loyo mony Amajia oko, ŋat acel acel te riŋo oko i paco mere,

²³Yowaci abaka me Icrael te mako Amajia abaka me Juda, wot a Yowaci, ame obedo wot Akajia, i Bet-cemec, en te ya i kannono kato naka i Jerucalem, te wot muko cel me Jerucalem oko, ame borrere romo yadi mia aryo twal, cakere i dogcel me Epraim naka i dogcel ame olwoŋo ni Gul.

²⁴En te yako jabu kede ryal luŋ ame en onwoŋo i ot Obaŋa, karacel kede jami luŋ me ottaca, ame rik ikwae Obededom gwoko; kede en ame onwoŋo tye i ot kano lim abaka, te tero luŋ i Camaria. En omako daŋ jo adoŋo mogo ame otwero lakoro, te tero oko.

²⁵Kare ame Yowaci wot a Yekoyadi, abaka me Icrael doŋ otyeko to, Amajia wot a Yowaci, abaka me Juda pwod omedde bedo kwo pi mwakki ame romo apar wie abic.

²⁶Kop ocele luŋ i kom Amajia, gin ame en obedo tiyo, cakere i ageyi naka i agikki, gin luŋ tye ocoo i buk Obakki me Juda kede me Icrael.

²⁷Cakere i kare ame jo oweko Rwot, jo mogo rik te poro kop i muŋ i kom Amajia, kun omito neke oko i Jerucalem, en te lwi, riŋo oko i boma me Lakic, cite okworrere te cwayo dano lubo yore kuno, ame te wot neke oko.

²⁸Gin te tiŋo keme aguragura kelo bino yiko i Jerucalem karacel i kwari mere, i paco a Daudi.