Read lango 2 Tekwaro 28 Bible Online

2 Tekwaro 28 - lango bible

2 Tekwaro 28

¹Akaj ocako loc kun mwaka me dittere tye pyeraryo nono, en te bedo loc i Jerucalem pi mwakki apar wie abicel. En mom obedo timo gin a tye atira i nyim Rwot Obaŋa mere kite ame kwaro mere Daudi rik otimo.

²Ento obedo lubo gin ame oloc me Icrael obedo timo. En otio cal jogi atwaka me a Baal;

³obedo waŋo daŋ odok akur i luŋ a woto i Kinnom, dok owaŋo daŋ awobe mere acalo mot me yalo jok, kun lubo kit tim me kwer ame rik rok luŋ ame yam Rwot oryemo i nyim jo Icrael obedo timo.

⁴En obedo yalo jogi kun waŋo daŋ odok akur i ka woro jogi ame tye i wi kiddi malo kede i wi tur malo anaka atot i te yen obuŋere-gu.

⁵Mannono omio Rwot Obaŋa mere omie i ciŋ abaka me Curia, ame te lweny kede loye oko, te yako jo mere apol meicel tero oko acalo opii naka i Damaciko, Rik dok ote miye iciŋ abaka me Icrael ame olwenyo kede daŋ te loye oko, te neko jo mere atek meicel;

⁶Peka wot a Remalia oneko mony a jo Juda ame romo tutumia mia acel kede pyeraryo i nino acel keken, kun gin luŋ onwoŋo jo atek meicel i lweny, pien gin onwoŋo okwero woro Rwot Obaŋa a kwarigi.

⁷Eka twon lo moto atek meicel i lweny a nyiŋe Jikri, dano me Epraim te neko Maceya wot abaka kede Ajirikam, adwoŋ ame loo paco abaka, kede Elnaka ame obedo adwoŋ ame lubo abaka i loccere.

⁸Jo Icrael oyako mon kede itino i baŋ omegogi ame romo tutumia mia aryo, ote terogi oko calo opii naka i Camaria, kun daŋ oyako jami adwoŋ meicel.

⁹Adwarpiny a Rwot a nyiŋe Obed ame onwoŋo bedo i Camaria kuno, owoto te wot rwatte i mony ame onwoŋo adwogo i Camaria, te kobbigi ni, “Nen ba, Rwot Obaŋa a kwariwu, akemo onwoŋo omako i kom jo Juda eka te miyogi i ciŋwu, cite wun dok inekogi wunu i twon akemo okato kare.

¹⁰Aman dok imito wunu diyo wunu jo Juda kede Jerucalem, co kede mon, me bedo acalo opiiwu, Wun mom itimo wunu balloro wun i komwu baŋ Rwot Obaŋawu?

¹¹Aman myero iwiny wunu koppa, iwek wunu jo ame iyako wunu i baŋ omegowu ite kela wunu acalo opii-ni dok cen, pien akemo omako Rwot meicel i komwu.”

¹²Rwode aŋwen me a jo Epraim daŋ cunygi ocwer i kom gin ame mony otimo, Ajaria wot a Jekokanan, Berekia wot a Mecilemot, Jekijikia wot a Callum, kede Amaca wot a Kadlai.

¹³Gin daŋ okobbigi ni, “Kur ikel wunu jo ame iyako wunu-nono kan, pien iyikere wunu me miyowa tiŋo aliŋa i nyim Rwot medo dok i kom bal wa kede rocwa ame doŋ otye kede-ni. Rocwa doŋ dwoŋ meicel, akemo agwa daŋ doŋ omako Rwot oko i kom Icrael.”

¹⁴Mannono te miyo mony weko jo ame oyako oko karacel kede jami i nyim rwode kede lwak ame onwoŋo ocokere.

¹⁵Eka rwode ame wokki otuco nyiŋgi-ca te bino tero jo ame onwoŋo oyako, jo mogo i akinagi ame onwoŋo tye onoro, gin te miyogi ruko boŋŋi, ame okwanyo i kom jami ame oyako, omiogi oruko boŋo, omiogi amuk, ote daŋ miyogi cam kede ginamata, dok owirogi daŋ kede moo. Gin te tiŋo jo ame onwoŋo goro i akinagi i wi kane, ote terogi naka baŋ jogi i Jeriko, boma ame otit dwoŋ iye. Jo Icrael te doŋ dok i Camaria.

¹⁶I kare-nono abaka Akaj ocwao kwena baŋ abaka me Accuria me bino konye,

¹⁷Pien jo Edom onwoŋo ocobo mony i kom jo Juda, ote loyogi oko, ote yako jo tero oko acalo opii,

¹⁸Aco jo Piriciti daŋ onwoŋo ocobo mony i kom boma me Cepela, kede Negeb me Juda, Gin omao boma me Bet-cemec, Aijalon, Cederot, kede me Coko i pacci luŋ ame onwoŋo tye i ŋete, Timna kede pacci luŋ ame onwoŋo tye i ŋete, karacel kede Gimjo kede pacci luŋ ame onwoŋo tye i ŋete, gin te bedo iye.

¹⁹Akaj abaka me Icrael en omio Rwot odwoko jo Juda piny, pien en obedo timo tim me carocaro i Juda, kun daŋ mom bedo igen i kom Rwot.

²⁰Tiglat-pilecer, abaka me Accuria te bino lweny kede, te time lit akaka miye kony me medo teko mere.

²¹Pien Akaj onwoŋo okwanyo lim i ot a Rwot, kede i ot abaka karacel kede i udi a rwode te miyo abaka me Acuria; ento mom te nwoŋo konyoro iye kadi acel.

²²Kare ame can orido Akaj, gennere i kom Rwot omedde ameda i dok piny. Kom en Akaj acellono!

²³Pien en gire obedo yalo obaŋe a jo Damaciko, ame onwoŋo oloe-nono, kun kobo ni, “Pien obaŋe obakki me Curia okonyogi, an abino bedo yalogi i mot me gin daŋ konya.” Ento olunyo ka kelo can i kome kene kede i kom jo Icrael luŋ.

²⁴Akaj te coko jami luŋ ame otio kede i ot a Rwot, te ŋinyo jami ame otio kedgi i ot Obaŋa-nono luŋ atitino. Eka te cego doggola ot a Rwot, te tiyo keno lam romo iyi Jerucalem luŋ.

²⁵I boma ducu me Juda en te tiyo iye ka waŋo odok akur me yalo obaŋe ocele kun mio akemo mako Rwot Obaŋa a kwari mere.

²⁶Kop ocelle i kom Akaj ame mom ocoo kan, gin ame en obedo timo kede kite ame en obedo bedo kede, cakere i ageyi tuno kede naka i agikki, gin luŋ tye ocoo i buk obakki me Juda kede me Icrael.

²⁷Akaj oto, te wot weo karacel i kwari mere, gin te yiko kome i boma, i Jerucalem, Gin mom otero kome i lyel ame oyiko iye kom obakki me Icrael. Wode Kejekia te leyo kakare.