Read lango 2 Tekwaro 29 Bible Online

2 Tekwaro 29 - lango bible

2 Tekwaro 29

¹Kajekia ocako loc kun mwaka me dittere doŋ oromo pyeraryo wie abic, en te bedo loc i Jerucalem pi mwakki pyeraryo wie aboŋwen. Nyiŋ tottere obedo Abija, ame obedo nyaka a Jekaria.

²En te bedo timo gin ame tye atira i nyim Rwot, kun lubo ginnoro luŋ ame rik kwaro mere Daudi obedo timo.

³I mwaka me agege me loccere, i dwe me acel, en te yabo doggola me ot a Rwot luŋ, te daŋ yikogi oko.

⁴En te kelo olamdog kede jo Levi te cokogi karacel i dyekal tutuŋ kide,

⁵te kobbigi ni, “Winy wunu koppa wun jo Levi! Aman myero ilonyere wunu oko, ite lonyo wunu daŋ ot a Rwot Obaŋa a kwariwu, me bed acil, Cok wunu ginnoro luŋ a mom cil i kabedo man acil, iter wunu oko,

⁶Pien kwariwa rik mom doŋ geŋo Rwot, eka ote bedo timo gin ame nen arac i nyim Rwot Obaŋawa; gin rik ote weko woro Rwot oko, kun owiro waŋgi teŋe i kabedo ame oworo iye Rwot.

⁷Gin ocego daŋ doggola luŋ me donyo i ot a Rwot, ote neko mac tara luŋ iye, kun mom doŋ owaŋo iye odok akur, akadi yalo Rwot Obaŋa me Icrael i mot awaŋa i kabedo acil.

⁸Mannono te miyo Rwot oonyo akemo mere i kom jo Juda kede Jerucalem, omiogi doŋ odoko gin ame mio lworo, wur, kede acae, kite ame itye ka neno wunu kede waŋwu nie.

⁹Mannono omio obin oneko kwariwa i lweny, monwa kede itinowa, ote mako tero oko acalo opii.

¹⁰Aman an amoko tamma ni myero ocikere wan i Rwot Obaŋa me Icrael, me kur dok medde bedo kede akemo agwa wok-ki i komwa.

¹¹Itinona, kur dok ibed bedo wunu abeda ba; pien Rwot otyeko yerowu me bedo oticcere ame tio i nyime, kun iwaŋe wunu odok akur.”

¹²Jo Levi magi te ya malo, Makat wot a Macai, Joel wot Ajaria, ame obedo jo me doggola a Kokat; jo me doggola a Gercom te ya, Joa wot a Jimma, kede Eden wot a Joa;

¹³jo me doggola Elijapan te ya, Cimri kede Jeuel; jo me doggola Acap te ya, Jekaria kede Mattania;

¹⁴jo me doggola a Keman te ya Jekuel kede Cemei, eka jo me doggola a Jedutun te ya, Cemaya kede Ujiel.

¹⁵Gin ocoko omegogi, ote lonyere kengi gin doŋ te cako donyo i ot kite ame onwoŋo abaka ociko kun lubo kop a Rwot, me wot lonyo ot a Rwot.

¹⁶Olamdog te donyo naka iyi icika i tyelo ame tye i ot Rwot me wot lonyo, gin te kelo oko jami luŋ areco a mom cil, ame gin onwoŋo i ot a Rwot; Olevi te yeyo luŋ tero naka i luŋ me kulo Kidron.

¹⁷Gin ocako lonyo ot a Rwot i nino dwe acel me dwe me agege, gin te tyeko i nino dwe aboro me dwe-nono, Ticgi doŋ te tum odoco me yiko ot a Rwot i nino dwe apar wie abicel me dwe acellono kun nwoŋo olonyo naka doggola luŋ me donyo i ot a Rwot.

¹⁸Gin te dwoko kop baŋ abaka Kejekia ni, “Wan doŋ otyeko lonyo ot a Rwot luŋ, olonyo anaka keno lam me waŋo mot me Rwot, jami tic luŋ, meja me keto ogati i nyim Rwot kede jami ticcere luŋ.

¹⁹Dok jami tic luŋ ame rik abaka Akaj obolo oko i kare ame en rik onwoŋo mom geno Rwot i kare me loccere, otyeko yiko dok daŋ olonyo oko luŋ, aman gin luŋ doŋ tye i nyim keno lam me yalo Rwot.”

²⁰Abaka Kejekia te dilo ibai, te loko odoŋe ame loo boma karacel, te wot kedgi i ot a Rwot.

²¹Gin te kelo twoni abiro, nyogi rommi abiro, itino nyogi rommi abiro kede nyogi dyegi abiro me mot me bal ajo me Juda luŋ ame tye i te loc abaka kede me kabedo acil. En te ciko olamdog ame obedo ikwae Aron me cako yalo Rwot i mottono i wi keno lam a Rwot.

²²Gin doŋ te neko twoni oko, olamdog te gamo remogi wot coro i kom keno lam; dok ote neko nyogi rommi, ote coro remogi daŋ i kom keno lam.

²³Eka ote doŋ kelo nyogi dyegi me mot me bal baŋ abaka kede baŋ lwak ame ocokere me woro Rwot, ame gin luŋ ote keto ciŋgi i komgi.

²⁴Olamdog te nekogi, ote yalo Rwot i remogi pi mot me bal i wi keno me lam pi kwanyo bal a jo Icrael luŋ, pien abaka onwoŋo ociko ni myero yal Rwot i mot awaŋa karacel kede mot me bal pi jo Icrael luŋ.

²⁵Abaka Kejekia te miyo jo Levi cuŋ i ot a Rwot kun omako ajaa, naŋa kede naŋa opuk, ame olubo cik a Daudi kede me a Dan aran-piny abaka, karacel kede me a a Natan adwarpiny. Cik man onwoŋo obedo cik Obaŋa ame en okobo baŋ odwarpinyere.

²⁶Jo Levi onwoŋo omako kit tum apapat ame rik Daudi wero kede eka olamdog te cuŋ kuno kun omako apel.

²⁷Abaka Kejekia te doŋ ciko ni myero cak yalo Rwot i mot awaŋa i wi keno lam. Kare ame ocako yalo Rwot i mot awaŋa, ote daŋ cako wero wer me pako Rwot kun daŋ okuto apel kun daŋ ogoo tummogo me wer ame rik Daudi abaka me Icrael wero kede.

²⁸Lwak luŋ te cako woro Rwot kun ower tye awer, okut apel daŋ akuto apel, mannono te bedo timere naka ka mot awaŋa me yalo Rwot owaŋ otum.

²⁹Kare ame yalo Rwot doŋ otum, abaka karacel kede lwak, ame onwoŋo tye baŋe te ryebere piny woro Rwot.

³⁰Abaka Kejekia karacel kede rwode mere te kobbi Olevi ni myero ocak pako Rwot kede wer ame rik Daudi owero me pako Rwot dok karacel kede wer Acap aran-piny. Gin te cako wer i yomcuny, ote ryebere piny woro Obaŋa.

³¹Kejekia te kobbi lwak ni “Aman doŋ ityeko kwerre wunu kenwu me bedo jo a Rwot, biye wunu doŋ ceggi me ikel wunu motwu i ot a Rwot, kun ikelo wunu daŋ motwu me pwoc.” Lwak daŋ te kelo motgi kun omedo daŋ motgi me pwoyo Rwot, jo mogo ame cunygi omito daŋ okelo mot awaŋa me yalo Rwot.

³²Mot awaŋa ame lwak okelo te romo twoni pyerabiro, nyogi rommi mia acel, karacel kede itino nyogi rommi mia aryo; magi luŋ onwoŋo okelo me mot awaŋa me yalo Rwot.

³³Mot ocele ame okelo rik te romo twoni mia abicel kede rommi tutumia adek.

³⁴Kite acalo wel olamdog rik onwoŋo nok meicel ame mom romo yaŋo mot awaŋa ducu, omio omegogi ame obedo jo Levi obedo konyogi naka ka tic otum, olamdog ocele mege te dok lonyere kengi. Pien i kare-naca jo Levi onwoŋo cunygi atira ame kato olamdog i yore me lonyere kengi,

³⁵Medo i kom twon mot awaŋa ame rik onwoŋo dwoŋ atek, dwol me mot me kweyo cuny daŋ onwoŋo tye, kede dok koŋo olok me mot awaŋa.

³⁶Kejekia karacel kede lwak cunygi te lelo meicel pi gin ame Rwot otimo pi lwak. Pien gin ame otimere otimere oyotoyot meicel.