Read lango 2 Tekwaro 3 Bible Online

2 Tekwaro 3 - lango bible

2 Tekwaro 3

¹Culeman rik te cako gero ot a Rwot i Jerucalem i wi kidi me Moria, kan ame rik Rwot onyutte iye baŋ pappere Daudi, kan ame rik Daudi en oyero, i laro dino kal a Oman dano me Jebuc.

²En ocako gero i dwe me aryo, i mwaka me aŋwen me loccere.

³Man en kite ame rik en opimo kede ot Obaŋa: bor me yie onwoŋo romo futi pyeraboŋwen kun lac me yie tye pyeradek.

⁴Icika ame tye tuŋ tuŋ doggola me donyo, i nyim icika ame tye i dye ot, borrere onwoŋo romo futi pyeradek ame rom aroma i lac me icika acil; borrere me malo te bedo futi mia acel i pyeraboro. Yie ote mwono oko i jabu ame olio aber.

⁵I kor apama icika adwoŋŋere en ocacano iye bao cipre, eka te mwono kom bao-nono oko i jabu aber, kun ogogoro iye cal yen otit kede nyor.

⁶Yi ot onwoŋo odeo amwonya meicel kede gweŋe alilia me wel ame omwomwono i kom jabu, Jabu mere onwoŋo obedo jabu ame okelo i Parvaim.

⁷En omwono yi ot Obaŋa luŋ i jabu, karacel kede arii mege, arii me doggola mere luŋ, kor apama, kede doggola mere luŋ; dok te goro daŋ cal okerubi i kor apama.

⁸Culeman te daŋ dok tiyo kabedo acil meicel; borrere romo futi pyeradek ame rom aroma i lac me ot, kede laccere futi pyeradek. Omwono daŋ kome oko kede jabu aber ame pekkere romo talanta mia abicel.

⁹Pek me jabu me cumal ame otio kede me mwono jabu i ottono, oromo cekel pyerabic; en te mwono daŋ icika i malo luŋ i jabu.

¹⁰I kabedo acil meicel, en omio oketo iye okerubi aryo ame opao i yat, ote daŋ mwono komgi oko i jabu.

¹¹Bwom okerubi luŋ ame oyare ayara onwoŋo romo futi pyeradek, acel acel borrere onwoŋo romo futi abiro kede nucu. Wi bwom okerubi acel onwoŋo gudo kor ot, kun bwom acel tuŋ ocele onwoŋo ogudo kor ot tuŋ ocele, wi bwom okerubi i dyere mege onwoŋo ogudo wi bwom okerubi wadgi.

¹²Bwom okerubi ocele tuŋ cel ame borrere tye futi abiro kede nucu wie tye ogudo kor ot, kun bwome ocele ame daŋ tye futi abiro i nucuni ogudo me awottere me agege-ca.

¹³Bwom okerubi magi ame oyarre ayara onwoŋo borgi romo futi pyeradek. Gin luŋ onwoŋo otye ocuŋ acuŋa i tyengi kun nyimgi oneno icika ot adwoŋŋere.

¹⁴Boŋo me icika ote kwoyo iye boŋo obedo bululu bululu kede en amaramar kede en arema, karacel kede boŋo camanini aber, kun okwogo meicel i cal okerubi.

¹⁵I nyim ot en te tiyo iye pagi aryo ame borgi romo futi pyerabic wie aryo, kun otio i wigi tok ame borgi tye futi abiro kede nucu.

¹⁶En dok te tiyo nyor acalo tigo me ŋut te keto i wi pagi aryo luŋ, te dok tiyo cal okwer pomegranat mia acel, te ketogi i kom nyor.

¹⁷En ocibo pagi man i nyim ot Obaŋa, acel tuŋ cem kede en ocele tuŋ cam. En te cako nyiŋ en ame onwoŋo tye tuŋ anyarolum ni, Jakin, kede en ame onwoŋo tye tuŋ anyarodi te cako nyiŋe ni Boaj.