Read lango 2 Tekwaro 30 Bible Online

2 Tekwaro 30 - lango bible

2 Tekwaro 30

¹Kejekia rik te cwayo kwena baŋ jo Icrael luŋ kede baŋ jo Juda, te daŋ coyo waraga cwayo baŋ jo Epraim kede jo Manace, kun kobbigi ni myero gin luŋ bin i ot a Rwot ame tye i Jerucalem, me obin okwer ecuban me Kato me woro Rwot Obaŋa me Icrael.

²Abaka kede rwode mere karacel i jo luŋ ame onwoŋo ocokere i Jerucalem onwoŋo otyeko moko tamgi me kwero ecuban me Kato i dwe me aryo,

³gin onwoŋo rik mom oromo kwero i kare ame ociko pien wel olamdog ame olonyere kengi onwoŋo mom pol, dok lwak daŋ onwoŋo mom ru ocokere i Jerucalem.

⁴Abaka kede lwak ame onwoŋo ocokere te neno ni yikgi-nono tye aber.

⁵Mannono omio gin te moko me rabo koppere romo lobo Icrael luŋ, cakere i Beerceba tuno naka i Dan ni myero kwer ecuban me kato i Jerucalem me woro Rwot Obaŋa me Icrael pien jo onwoŋo mom obedo kwero nino man kun welgi pol atek kite ame onwoŋo ociko.

⁶Mannono te miyo okwena ket romo lobo me Icrael luŋ karacel kede Juda kun otero waraga ame oya i baŋ abaka kede rwode, kite ame abaka ociko kun okobbi lwak ni, “Wun jo Icrael myero idwog wunu cen baŋ Rwot Obaŋa a kwarowu Iburaim, Icaka kede Yakobo, me en dwog baŋ jo ame odoŋ ame obwot i ciŋ obakki me Acuria.

⁷Myero kur ibed bala kwariwu kede omegowu ame rik okwero geno Rwot Obaŋa a kwarigi ame te miyo Obaŋa miyo lobogi doko wi obur kite ame itye ka neno wunu kede waŋwu,

⁸Aman myero kur dok ibed wunu jo ame ŋutgi nwaŋ kite ame kwariwu rik obedo timo, ento myero imi wunu kwowu i ciŋ Rwot, me ibin wunu i kabedo man acil-li ame en doŋ otyeko lonyo oko atwal, ite woro wunu Rwot Obaŋawu, me ka ce ibino dwogo wunu cen baŋ Rwot Obaŋawu, akemo mere agwa ya oko i komwu.

⁹Pien ka ce ibino dwogo wunu ceŋ baŋ Rwot, jo ame otero omegowu kede itinowu iyi opii bino bedo i kica i komgi; gin te dwogo i lobo man, Pien Rwot Obaŋawu ber dok daŋ akica, en gire bino timowu kica ka ce idwogo wunu baŋe.”

¹⁰Okwena te wot rimo boma luŋ ame tye i lobo ajo Epraim kede Manace tuno kede naka i lobo a jo Jabulon; cite jo te bedo nyerogi anyera, kun ocaogi dok daŋ oŋalogi aŋala.

¹¹Jo anok meicel i lobo a jo Acer, Manace kede i lobo ajo Jabulon en ame rik te ye i mwolo me bino i Jerucalem,

¹²Obaŋa onwoŋo obedo tiyo tic i Juda, omio jo onotte i cuny acel ote tiyo gin ame Obaŋa mito ame abaka kede rwodegi okobbigi.

¹³Lwak jo apipim te cokere i Jerucalem pi cokere adwoŋ meicel i dwe me aryo me bino kwero ecuban me Ogati a Tobi Mom iye.

¹⁴Gin ocako tic i Jerucalem kuno, ote mumuko keno lam luŋ ame onwoŋo tye kuno, aco keno lam luŋ me waŋo odok akur luŋ ote mumuko wot onyo i luŋ me kulo Kidron.

¹⁵Gin te neko itino rommi me Kato i nino dwe apar wie aŋwen me dwe me aryo, Lewic te mako olamdog kede Olevi ame onwoŋo mom olonyere kengi, gin doŋ te cako lonyere kengi, ote kelo mot awaŋa me yalo Rwot i ot a Rwot.

¹⁶Gin doŋ te cako, tiyo ticgi me kare luŋ kun olubo cik a Muca dano Obaŋa; olamdog te bedo tiyo tic me kikiro remo ame agamo i ciŋ jo Levi.

¹⁷Pien onwoŋo tye jo apol i akina jo ame onwoŋo mom olonyere kengi. Mannono en omio Olevi en oneko itino rommi me Kato pi ŋat acel acel ame onwoŋo mom olonyere me bed acil pi Rwot.

¹⁸Jo apipim iyi akina lwak, akato mere jo oya i lobo a jo Epraim, Manace, Icakar kede Jabulon onwoŋo mom olonyere kengi; cite ote bedo camo cam me ecuban me Kato i yore apat i en ame ociko, Pien abaka Kejekia onwoŋo okwao Obaŋa pirgi kun kobo ni, “Ama Obaŋa aber, tim ŋat acel acel ame omiye i cunye luŋ me woro Obaŋa kica,

¹⁹Rwot ame obedo Obaŋa a kwarigi; kadi bed en mom olubo cik me kabedo acil ame mako lonyere.”

²⁰Rwot te winyo kwac a Kejekia, mom te timo ginnoro arac i kom lwak.

²¹Jo Icrael ame rik onwoŋo tye i Jerucalem kuno te kwero ecuban me Ogati a Tobi Mom iye pi nino abiro, kun cunygi yom atek. Jo Levi kede olamdog obedo pako Rwot nino i nino, kun owero wer me pako Rwot i twergi luŋ,

²²Abaka Kejekia te cukoro cuny jo Levi ame onwoŋo onyuto dirogi i tic me woro Rwot. Jo te camo cam me kwero ecuban pi nino abiro kun daŋ oyalo Rwot i mot me kweyo cuny, dok daŋ opwo Rwot Obaŋa a kwarigi.

²³Lwak luŋ te moko tamgi me medde i kwero ecuban pi nino abiro ocele, eka daŋ ote cobo tamgi-nono kun cunygi yom atek.

²⁴Kejekia abaka me Juda onwoŋo omio lwak twoni tutumia acel kede rommi tutumia abiro me mot me yalo Rwot, aco rwode onwoŋo omio lwak twoni tutumia acel kede rommi tutumia apar. Olamdog ame olonyere i kare-nono obedo apol meicel.

²⁵Lwak luŋ me Juda, olamdog, jo Levi kede lwak luŋ ame onwoŋo oya i lobo a jo Icrael, orok ame oya i lobo a jo Icrael karacel kede orok ame onwoŋo bedo i akina jo Juda obedo kede lelo meicel.

²⁶Mannono te miyo yomcuny bedo adwoŋ meicel i Jerucalem pien cakere i kare a Culeman wot a Daudi abaka me Icrael, ginnoro acalo mannono onwoŋo mom dok otimere i Jerucalem kadi acel.

²⁷Olamdog kede Olevi te ya lammi lwak gum, dwongi kede kwacgi te winyere baŋ Obaŋa malo i polo.