Read lango 2 Tekwaro 31 Bible Online

2 Tekwaro 31 - lango bible

2 Tekwaro 31

¹Kare ame man ducu otum, lwak jo Icrael luŋ ame rik onwoŋo tye kuno te ciro wot i boma luŋ ame tye i Juda, ote wot mumuko gweŋe ame ocibo i ka woro jogi, kun daŋ otoŋo yen luŋ ame oguguro i ka woro jok a dako ame olwoŋo ni Acera, ote daŋ mumuko ka woro jogi ame tye malo i wi kiddi kede keno lam i kabedo luŋ ame tye i lobo a jo Juda, Benjamin, Epraim kede me a jo Manace, tuno ka doŋ ojwero luŋ, Jo luŋ ame onwonooya i lobo a, jo Icrael te doŋ dok i bomagi kun ŋat acel acel dok i paco mere ikome.

²Kejekia te poko doŋ olamdog kede jo Levi dul i dul, kun lubo kit tic ame gin tio. Tic olamdog kede jo Levi onwoŋo obedo me yalo Rwot i mot awaŋa kede mot me kweyo cuny, tic i dogcel me kema a Rwot karacel kede tic me miyo pwoc kede pako Obaŋa.

³Gin ame abaka omio ame okwanyo i kom jami mere ikome obedo leyi me mot awaŋa me yalo Rwot odiko kede otyeno, kede me yalo Rwot i ceŋ cabit kede i por dwe karacel kede i nino me ecuban adoŋo ame ociko ni kwer, kite ocoo kede i cik a Rwot.

⁴Abaka te ciko jo ame bedo i Jerucalem ni myero gin omi dul ame ociko ni myero mi baŋ olamdog kede baŋ Olevi, me gin omiye odoco me cobo gin ame ociko ame tye i cik a Rwot.

⁵Tekki gin ame abaka ociko-ni koppere owinyere baŋ jo i kabedo luŋ, jo te miyo jami adwoŋ meicel; omio kal ogeo cek me wi mwaka, koŋo olok, moo, moo kic, kede kit jami luŋ ame oya i pottigi, ote daŋ dok miyo acel me apar me jami luŋ adwoŋ meicel.

⁶Jo Icrael kede jo Juda ame bedo i boma luŋ ame tye i lobo me Juda te kelo acel me apar me dok kede rommi karacel kede mot ocele ame onwoŋo gin ojalo oko baŋ Rwot Obaŋagi, ote yidogi karacel dul i dul.

⁷Gin ocako coko motgi-nono yido karacel dul i dul i dwe me adek, ote bino tyeko ticcere i dwe me abiro.

⁸Kare ame abaka Kejekia kede rwode mere obino te neno jami ame ocoko oyido dul apapat, gin opwoo Rwot, ote daŋ pwoyo jo me Icrael.

⁹Abaka Kajekia te penyo olamdog kede Olevi kop i kom mot ame oyido ibimmono.

¹⁰Ajaria alamdog adwoŋ, dano me doggola a Jadok te gamo koppere ni, “Pien cakere i kare ame lwak ocako kelo motgi i ot a Rwot wan obedo nwoŋo cam ame romowa, ocemo oyeŋ, en ame odoŋere daŋ tye dwoŋ ata, man otimere pien Rwot omio jo mere gum, en omio aman wan otye kede jami ame odoŋ dwoŋ rom man.”

¹¹Abaka Kejekia te ciko ni myero yik icika mogo me gwoko i ot a Rwot, ame daŋ ote ru yiko oko.

¹²Gin te weko mottono luŋ kede acel me apar karacel i ginnoro luŋ ame ojalo baŋ Rwot, ote tero wot gwoko aber iyi icika ame oyiko-naca. Adwoŋ ame onwoŋo loogi luŋ onwoŋo obedo Alevi ame nyiŋe Konania, kun ominnere Cimei en ame lube.

¹³Jo ame abaka Kejekia, kede Ajaria alamdog adwoŋ ame loo ot a Rwot, onwoŋo oketo me konyo Konania kede alubbe Cimei neno tic, obedo, Jekiel, Ajajia, Nakat, Acael, Jerimot, Jojabad, Eliel, Icimakia, Makat kede Benaya.

¹⁴Kore wot Alevi a nyiŋe Imna, akur dogcel me tutuŋ kide en ame onwoŋo loo mot ame omio baŋ Rwot pi ber a yic, dok daŋ en ame poko mot ame ogwoko pi Rwot kede mot acil meicel.

¹⁵Aco i boma ocele ame olamdog bedo iye, jo magi onwoŋo tye ka konye iye, kun gin luŋ obedo jo a genne meicel i ticgi, gin ene: Eden, Miniamin, Yecua, Cemaya, Amaria, kede Cekania. Gin onwoŋo poko omegogi cam, opoko luŋ arorom baŋ jo adoŋo kede atino, kun olubo dul tic ame gin tio;

¹⁶Gin mom opoko kun olubo kite ame oco kede jo, kun olubo doggola kwarigi kono ka baŋ jo ame ditogi oromo pyeradek dok kede malo, jo luŋ ame donyo i ot a Rwot kite ame ticgi me nino acel acel tye kede me wot ticgi ame opokigi i dulgi,

¹⁷Olamdog rik ocoo kun olubo i doggola a kwarigi, cite me Olevi rik ocako i kom jo ame mwaka me ditogi oromo pyeraryo wot kede malo kun lubo tic ame gin tio i dulgi.

¹⁸Olamdog rik ocoo karacel itinogi ame pwod tino, mongi, awobegi kede anyiragi; kun ocoo lwak luŋ, pien gin rik ogwokere meicel me bedo jo acil.

¹⁹Aco i kom ikwae a Aron, olamdog ame rik bedo i lobogi ocele ame tye i ŋet bomagi; rik oyero jo mogo ayera i boma acel acel gin te bedo opok jami baŋ dano acel acel ame obedo alamdog kede Alevi ame doŋ otyeko coyo nyiŋe oko i buk.

²⁰Kejekia te bedo timo amano i lobo Juda luŋ; en obedo timo gin aber ame tye atira, kun daŋ geŋo Rwot Obaŋa mere.

²¹Ticcoro luŋ ame en otio i kom tic me ot a Rwot ame lubere i cik kede ginnoro luŋ ame ociko en otio i cunye ducu kun woro Obaŋa mere, omio ticcere te daŋ cobere aber meicel.