Read lango 2 Tekwaro 32 Bible Online

2 Tekwaro 32 - lango bible

2 Tekwaro 32

¹A doŋ man otum kede tic ame Kejekia obedo tiyo ame nyuto gennere i kom Rwot, Cenakerib abaka me Acuria owoto me wot lweny i kom boma luŋ me Juda, monnyere te guro kemagi guro boma ame onwoŋo ocecelo atek meicel kun tamo ni myero elogi obed i te loccere.

²Kare ame Kejekia oneno ni Cenakerib obino me bino lweny i kom Jerucalem,

³en oyiko kop i rwode mere kede jo ame tek i lweny, me toro pii akon luŋ ame onwoŋo tye oko i ŋe boma, Gin daŋ ote konye,

⁴Lwak jo apol meicel te cokere, ote toro waŋ pii akoŋ kede kulo luŋ ame onwoŋo tye i kabedo luŋ, kun okobo ni, “Piŋo kara omio oweko obakki me Acuria nwoŋo pii adwoŋ adwoŋa ka gin bino tuno kan?”

⁵En ocako tic agwa te gero apama cel luŋ ame onwoŋo doŋ orette oko piny, te dok gero gedo mogo ocuŋ iguŋ i wicel malo, te daŋ dok gero cel ocele i ŋeye oko. En te miyo Millo ame tye i paco a Daudi doko kabedo atek meicel. En te daŋ dok tiyo jami lweny kede kwode apipim.

⁶Te keto odoŋe mony ocwiny me loyo lwak, ocokogi luŋ karacel i dyekal alac ame tye i dogcel, te cako cukoro cunygi kun kobbigi ni,

⁷“Cuŋ wunu atek kun cunywu nwaŋ. Kur ibed wunu alwor, cunywu daŋ kur poti i nyim obakki me Acuria karacel i monnyere luŋ ame tye baŋe; pien ŋat ame kate oko tye baŋwa.

⁸Monnyere obedo dano adana ame geŋo tekogi, cite wan Rwot Obaŋawa en ame tye baŋwa me konyo dok me lweny pirwa.” Kop ame Kejekia abaka me Juda okobo-nono omio cuny jo odwogo.

⁹Icennere doki Cenakerib abaka me Acuria kede monnyere ame onwoŋo tye aguro boma me Lakic, ocwao okwena i Jerucalem baŋ Kejekia abaka me Juda kede lwak luŋ me Juda ame onwoŋo tye i Jerucalem, kun kobbigi ni,

¹⁰“Cenakerib abaka me Acuria okobo ni, ‘Itye wunu kara ka geno ŋo ba, ame omio pwod igurre giwu agura i Jerucalem?’

¹¹Myero i ŋe wunu ni Kejekia tye ka rwenyowu arwenya, kun mito ni kec kede oryo pi nekwu, i koppere ame en tye ka kobbiwu ni, ‘Rwot Obaŋawa bino larowa i ciŋ abaka me Acuria.’

¹²Mom en Kejekia acellono rik omuko kabedo me woro Obaŋa-nono ame tye malo kede keno lam me yale, eka te ciko jo Juda kede Jerucalem ni, ‘Ibino woro wunu Obaŋa i nyim keno lam acel keken, dok daŋ bino waŋo wunu motwu me yalo Obaŋa ye?’

¹³Wun ce mom iŋeo wunu gin ame an kede kwarina otimo i kom rok luŋ me lobo ocele? Ane koŋ rik obaŋe a rok me lobo ocele naca lar lobogi i ciŋa?

¹⁴Kara mene i akina obaŋe a rok ame kwarina rik ojwero odoco, ame obin olaro jo mere i ciŋa? Kara doŋ ŋo ame omio wun itye ka tamo wunu ni Obaŋawu twero larowu i ciŋa?

¹⁵Aman doŋ ba, myero kur imi wunu Kejekia bwolwu onyo rwenywu kittono. Kur iwiny wunu koppere. Mom gire tye obaŋa a rokkoro onyo me aloccoro ame yam koŋ olaro jo i ciŋa onyo i ciŋ kwarina. Doŋ iyi ateni Obaŋawu gire mom romo larowu kadi acel i ciŋa.”

¹⁶Abaka Cenakerib te medde i kop areco i kom Rwot Obaŋa kede i kom amiro mere Kejekia.

¹⁷Cenakerib te coyo waraga kun cao kede Rwot Obaŋa me Icrael, ame kobo kop arac i kome ni, “Obaŋa a Kejekia gire mom bino laro jo mere, bino daŋ bedo ame rom aroma obaŋe a rok apapat me lobo ocele ame mom olaro jogi i ciŋa.”

¹⁸Gin te redo i kop man i dwoŋ aloŋo kun oredo i leb Eburania baŋ jo Jerucalem ame onwoŋo tye i wi cel malo me gin dok alwor ote nyobere oko, me gin te mayo bomagi oko.

¹⁹Gin te bedo kobo kop i kom Obaŋa me Jerucalem i kite ame okobo kede kop i kom obaŋe a rok ocele me wi lobo, ame dano en otiogi.

²⁰Abaka Kejekia kede adwarpiny Icaya wot Amoj te kwayo Obaŋa kun ocwao kokogi malo i polo,

²¹Rwot te cwayo amalaika, ame te bino jwero twoni jo atek i lweny otel wi mony, kede odoŋe ocele luŋ i gony abaka me Acuria, Mannono te miyo en dok cen i lobo mere i twon lewic adwoŋ meicel. En te wot naka i ot obaŋa mere, eka awobe mere mogo akina itino mere te neke oko i pala lweny.

²²Mannono en kite Rwot olaro i Kejekia kede jo ame onwoŋo bedo i Jerucalem i ciŋ Cenakerib abaka me Acuria kede i ciŋ okworgi luŋ, te doŋ miyogi wee tuŋŋi i tuŋŋi.

²³Jo apol meicel te kelo motgi baŋ Rwot i Jerucalem, kede jami mogo me wel baŋ Kejekia abaka me Juda, mannono te miyo en bedo twon lo moro a malo meicel i nyim rok luŋ cakere i kare-nono wot kede anyim.

²⁴I kare-nono two omako Kejekia ame onwoŋo doŋ ceggi to, en te kwayo Rwot; Rwot te winyo kwaccere, kun mie gin ame nyuto.

²⁵Cite Kejekia mom te timo ginnoro ame lubere i gin aber ame otimo baŋe, pien en obedo kede awaka i cunye. Mannono te miyo akemo mako Rwot i kome karacel i jo Juda kede jo Jerucalem.

²⁶Cite Kejekia kede jo me Jerucalem te dok mwolle kengi i kom awaka ame onwoŋo tye i cunygi, mannono te miyo Rwot mom oketo cannoro i komgi i kare a Kejekia luŋ.

²⁷Kejekia rik onwoŋo doŋ olony atek kun daŋ jo woro atek meicel. En onwoŋo ogero ot me kano limmere, ogero icika me keto ryal, jabu, gweŋe mogo me wel, gigi mogo a ŋwecgi kur, kwode, kede me keto jami tic apapat ame welgi malo meicel.

²⁸Medo i kom mannono, en ogero daŋ udi gwoko cam, kan ame okano iye kal, koŋo olok, kede moo; ogero daŋ ka gwoko dokkere apol ata kede ka gwoko rommi mere.

²⁹Pien Obaŋa omie jami adwoŋ meicel, omio en ogero boma mogo ame otike en ikome, kede dok, kede rommi ame tye baŋe apipim.

³⁰En Kejekia acel-li rik daŋ otoro waŋ pii i tuŋ malo, kan ame pii ame ya i kulo Gikon mol iye, eka te yabo yo pii dok tuŋ to me paco a Daudi. Kejekia rik Obaŋa omio winyo meicel i kom ginnoro luŋ ame en otio.

³¹Doŋ kop i kom okwena a rwode me Babulon, ame rik ocwao baŋe me bino penyo kop i kom anyut ame Obaŋa onyuto i lobo mere Obaŋa oweke etimo jami luŋ pire kene me teme, wek eŋe ginnoro luŋ ame tye i cunye.

³²Kop i kom Kejekia ame odoŋŋere luŋ, gin abeco ame en otio ame mom ocoo kan, gin luŋ tye ocoo i kom gin Obaŋa onyuto baŋ Icaya adwarpiny wot Amoj ame tye i buk Obakki me Juda kede Icrael.

³³Kejekia oto te wot weo karacel i kwari mere, ote yiko kome i lyel ame tye malo i wi kidi, i akina ikwae a Daudi. Jo me Juda kede Jerucalem luŋ te nyuto worogi baŋe i kare me to mere. Wode Menace te leyo kakare.