Read lango 2 Tekwaro 33 Bible Online

2 Tekwaro 33 - lango bible

2 Tekwaro 33

¹Manace ocako loc kun mwaka me dittere oromo apar wie aryo, en te bedo loc i Jerucalem pi mwakki pyerabic wie abic.

²En obedo timo gin ame nen arac i nyim Rwot, kun bedo timo tim me kwer ame rok luŋ ame Rwot oryemo oko i nyim jo Icrael rik obedo timo.

³En dok omio ogero ka woro jogi i wi kiddi malo, ame rik pappere Kejekia omio omumuko oko. Ogero daŋ keno lam me woro Baal, te dok cicibo daŋ yen i ka woro jok a dako ame olwoŋo ni Acera, kun daŋ woro ceŋ, dwe kede lwak acer apipim ame tye i polo, dok daŋ tio baŋgi.

⁴Ocano daŋ keno mogo me lam i ot a Rwot, kan ame rik Rwot okobo iye ni, “Abino miyo Jerucalem bedo kabedo me wora.”

⁵En ocano daŋ keno lam apipim me woro ceŋ, dwe kede lwak acer ame tye malo i polo, kun canogi i dyekal aryo ame tye i ot a Rwot.

⁶Owaŋo daŋ wode acalo mot me woro jok i luŋ a wot a Kinnom, kun daŋ tyeto tyet; ŋiyo yi dyegi; penyo okor tipo kede ajoka. En obedo timo tim areco apol apola ame nen arac i nyim Rwot, kun mio akemo mako Rwot.

⁷Dok cal jok apaa ame en opao, otero-gu i ot a Rwot ame rik Rwot ikome okobo pire baŋ Daudi kede baŋ Culeman ni, “I ot man kede i Jerucalem ame rik an ayero i akina atekere luŋ me Icrael, en ame bino bedo kan ame owora iye nakanaka.

⁸Mom dok abino miyo jo Icrael ya i lobo man ame rik an amio baŋ kwarigi, ka ce gin obedo gwokere kun otimo ginnoro luŋ i kite ame rik acikogi kede, dok obedo lubo cik, icwil kede ginnoro luŋ ame rik amio Muca ocikogi iye.”

⁹Manace rik omiogi omedo timo tim areco ame kato me arok luŋ ame rik Rwot orweo oko i nyim jo Icrael.

¹⁰Kadi bed Rwot obedo kwenyoro Manace kede jo mere, cite gin gigi mom owinyo koppere.

¹¹Mannono omio Rwot ocwao mony abaka me Accuria, ame te bino mako Manace i golo, ote tweye kede jegere me mola, ote tere naka i Babulon.

¹²I kare ame en tye kede rem, odoko amwol meicel i nyim Obaŋa a kwari mere, te bako doge baŋ Rwot Obaŋa mere me time kica.

¹³En okwao Obaŋa, Obaŋa te winyo kwaccere, te daŋ ye, eka te miye dok i Jerucalem acalo aloc, Manace doŋ te ŋeyo ni Rwot kare obedo Obaŋa.

¹⁴Icennere, en te gero apama cel me paco a Daudi i oko mere ame tye tutuŋ to me Gikon, i luŋ, te gero wot kede naka i dogcel me Rec, kun gero mano kidi me Opel, en ogero apama cel i kannono okato malo meicel. En dok te keto odoŋe ame loo mony i boma luŋ ame ocecelo atek a tye i lobo me Juda.

¹⁵En okwanyo daŋ obaŋe a rok ocele luŋ kede cal jogi i ot Obaŋa, te mumuko daŋ keno lam me jogi luŋ ame rik ecano i wi kidi, kan ame ot Obaŋa tye iye, kede en a tye i Jerucalem; okwanyogi luŋ te terogi wot bolo i ŋe boma,

¹⁶Oyiko daŋ keno lam me yalo Rwot, te yalo Rwot iye i mot me kweyo cuny kede mot me pwoyo Rwot, eka te ciko jo Juda me woro Rwot Obaŋa a jo Icrael.

¹⁷Kadi bed amannono, jo pwod omedde tero motgi i kabedo mogo me woro, ame tye i wi kididi malo, cite oyalo ka Rwot Obaŋa me Icrael keken.

¹⁸Kop i kom ginnoro luŋ ame Manace otimo ame mom ocoo kan, kwaccere baŋ obaŋa mere, kop Obaŋa me Icrael ame oraŋ-piny okobo baŋe, gin luŋ tye ocoo i buk me Tekwaro ame tito kop i kom obakki me Icrael.

¹⁹Aco kop i kom kwaccere, kite ame Obaŋa owinyo kede koko mere, ballere luŋ ame en otimo, kede kite ame gennere oya kede i kom Obaŋa, kan ame en ogero iye ka woro jogi i wi kiddi malo eka te cicibo iye cal jok a dako ame olwoŋo ni Acera kede cal jogi ocele mege, i kare ame mom ru omwolle kene i nyim Obaŋa, gin luŋ tye ocoo i buk me tekwaro ame tito kop i kom Oraŋ-piny.

²⁰En oto te weo karacel i kwari mere, oyiko kome i ode. Wode Amon en ame te leyo kakare.

²¹Amon ocako loc ame mwaka me dittere doŋ oromo pyeraryo wie aryo.

²²En obedo timo gin ame nen arac i nyim Rwot, kite ame pappere Manace obedo timo kede. Amon obedo yalo cal jogi luŋ ame pappere Manace rik otio kun daŋ worogi.

²³En naka mom omwolle kene kadi acel i nyim Rwot kite ame pappere Manace rik omwolle kede, en gire obedo medo bal ameda,

²⁴Omiro mere te poro kop i kome i muŋ ote wot neke oko i ode.

²⁵Jo me lobo-nono te neko jo luŋ ame oporo kop me neko abaka Amon, gin te keto wode Yocia leyo kakare.