Read lango 2 Tekwaro 34 Bible Online

2 Tekwaro 34 - lango bible

2 Tekwaro 34

¹Yocia ocako bedo aloc kun mwaka me dittere oromo aboro, en te bedo loc pi mwakki pyeradek wie acel, kun bedo i Jerucalem,

²en obedo timo gin ame nen atira i nyim Rwot; obedo daŋ lubo kite a kwaro mere Daudi luŋ, kun mom wiwira atata.

³I mwaka me aboro me loccere ame en pwod awobi, en ocako woro Obaŋa a kwaro mere Daudi; eka i mwaka me apar wie aryo me loccere, en te cako tiyo tic me lonyo Juda kede Jerucalem bedo acil, kun mumuko ka woro jogi luŋ ame tye i wi kiddi malo, ototoŋo daŋ yen luŋ ame ocicibo i ka woro jok a dako ame olwoŋo ni Acera, karacel i cal jogi apaa kede me atwaka.

⁴Omumuko daŋ keno lam me yalo Baal luŋ ame ocop i nyime, te mumuko daŋ keno lam me waŋo odok akur ame onwoŋo tye i ŋetgi, kun ŋiŋinyo atitino cal jok a dako ame olwoŋo ni Acera karacel i cal apaa kede me atwaka luŋ, ŋiŋinyo oko apwot calo apua, te jobo onyo i lyel a jo ame rik obedo yalogi i mot.

⁵Owaŋo daŋ cogo kom olamdog i kom keno lam ame rik gin oyalo iye jogi, en te lonyo Juda kede Jerucalem kittono.

⁶En te timo daŋ amannono i boma luŋ ame tye i lobo a jo Manace, Epraim, Cimeon, tuno kede naka i lobo a jo Naputali; kede i wi oburgi ame onwoŋo tye i ŋetgi kuno.

⁷Omumuko keno lam piny, odidino cal jok a dako ame olwoŋo ni Acera te ŋinyo oko apwot calo buru karacel kede cal jogi, te mumuko daŋ keno lam luŋ i lobo a jo Icrael kan ame onwoŋo gin yalo iye jogi odok akur. En doŋ te dok i Jerucalem.

⁸I mwaka me apar wie aboro me loccere, ame en doŋ otyeko lonyo lobo mere kede ot Obaŋa, en ocwao Capan wot Ajalia, Maceya, gabuna me boma, kede Joa wot a Joac, ame obedo aran, ocwaogi me wot yiko ot a Rwot Obaŋa mere.

⁹Gin owoto baŋ Kilkia ame en alamdog adwoŋ ote miye lim ame onwoŋo lwak okelo i ot a Rwot, ame Olevi kede okur doggola onwoŋo orao i baŋ jo Manace, Epraim, jo Icrael luŋ ame odoŋ, jo Juda luŋ kede jo Benjamin kede jo ame bedo Jerucalem.

¹⁰Gin te miyo limmono baŋ otic ame loo tic me ot a Rwot; eka otic ame onwoŋo tye atic ot a Rwot te miyo me yiko kan ame oballe, me roc odoco.

¹¹Gin omio limmono baŋ opac kede ogedo me wilo kiddi ame opao, yen me tweyo wi ot, kede arii me gero udi luŋ ame yam obakki me Juda oweko oballe.

¹²Jonono te tiyo ticgi i cunygi ducu. Olevi ame oketo loyogi obedo Jakat, kede Obadia, ame gin jo me doggola a Merari eka ote keto Jekaria kede Mecuram, ame gin Olevi me doggola a Kokat, me loyo tic luŋ me ot a Rwot. Jo Levi ame onwoŋo odiro i goyo jami apapat me wer,

¹³oketogi me loyo oye yec, dok gin daŋ anyuto tic baŋ jo ame tio tic apapat; jo Levi ocele mege onwoŋo obedo ococ, rwode ame neno tic kede okur doggola ot a Rwot.

¹⁴Kare ame onwoŋo gin tye akwanyo lim ame okelo i ot a Rwot okelo oko, Kilkai alamdog adwoŋ te nwoŋo buk cik a Rwot ame omio baŋ jo Icrael, kun mio baŋ Muca.

¹⁵Kilkai alamdog adwoŋ te kobbi Capam aran ni, “Atyeko nwoŋo buk cik i ot a Rwot;” en te miyo bukkono baŋ Capam.

¹⁶Capam te tero buk baŋ abaka, te kobbe kop i kom tic ni, “Omiro ni tye atiyo tic luŋ ame yin iciko ni gin ti.

¹⁷Gin doŋ okwanyo lim luŋ ame onwoŋo tye i ot a Rwot, ote miyo daŋ oko baŋ jo ame loo tic kede otic me ot a Rwot.”

¹⁸En dok te kobbi abaka ni, “Kilkia alamdog adwoŋ omia bukkoro.” Capam te kwano bukkono kun abaka awinyo.

¹⁹Kare ame abaka owinyo kop ame okwano i buk me cik, en oyeyeco boŋŋi mere oko,

²⁰Abaka te ciko Kilkia alamdog adwoŋ, kede Akikam wot a Capan kede Abudon wot a Mikaya, Capam aran kede Acaya amiro abaka, kun kobo ni,

²¹“Wot ipeny wunu Rwot pira, pi lwak kede pi lobo me Juda luŋ, pi kop i buk man ame onwoŋo-ni, pien akemo a Rwot kara doŋ olyeto meicel i komwa, pien kwariwa mom obedo lubo gin ame tye i buk man, kun otimo kite ame ocoo kede kop i komwa i buk man.”

²²Mannono te miyo Kilkia alamdog, Akikam kede Abudon, Capam kede Akaya wot baŋ adwarpiny a dako a nyiŋe Kulda dako a Calum wot a Tikiva, ame obedo wot a Karkac, agwok boŋŋi abaka ame i kare-nono onwoŋo bedo i Jerucalem i kabedo moro i Jerucalem kuno tuŋ ocele. Gin owoto kuno ote wot kop i dako-nono kop i kom gin ame otimere.

²³En te kobbigi ni, “Rwot Obaŋa me Icrael okobo ni ikobbi wunu ŋat ame oorowu baŋa ni,

²⁴Rwot okobo ni ebino keto can i kom kabedo man kede i kom jo luŋ ame bedo iye, pi cobo kop luŋ me ceno dano ame ocoo i buk cik ame doŋ otyeko kwano kun abaka me Juda winyo.

²⁵Pien gin doŋ okwera oko, ote bedo waŋo odok akur baŋ cal jogi, kun oroka kede me akemo maka i kom ginnoro luŋ ame gin obedo tiyo i cingi; mannono omio akemona doŋ bino lyeto agwa meicel i kom kabedo man, ame mom dok romo kwe kadi acel.

²⁶Aco baŋ abaka me Juda ame oorowu me bino penyo Rwot, wun ibino kobbe wunu ni Rwot Obaŋa me Icrael okobo ni kop i kom kop ame cwinyo,

²⁷pien i kare ame yin iwinyo kop ame rik akobo i kom kabedo man kede i kom jo luŋ ame bedo iye, yin iru ŋut oko i cunyi ite mwolle-gu i nyima, dok iyeyeco daŋ boŋŋi i komi oko; mannono omio an Rwot daŋ awinyo kwacci, man kop a Rwot ikokome.

²⁸Nen ba, an abino dwoki iwoto weo karacel i kwarini, ibino to ote yiki daŋ i kuc, waŋi mom bino neno twon tim arac ame abino kelo i kom kabedo man.” Gin doŋ te dwoko kop baŋ abaka.

²⁹Abaka te cwayo kwena, ote coko odoŋe luŋ me Juda kede me Jerucalem.

³⁰Abaka te wot malo i ot a Rwot kun woto i jo luŋ me Juda kede Jerucalem, olamdog kede Olevi, jo luŋ adoŋo kede otino, en te kwano kop luŋ ame tye i buk cik ame onwoŋo i ot a Rwot. En okwano kun lwak luŋ awinyo.

³¹Abaka te cuŋ i kabedo mere te cikere i nyim Rwot ni ebino lubo Rwot, ebino mako cikere luŋ, kede kop me caden luŋ, kede ecwillere daŋ luŋ. En ocikere ni ebino lubo magi luŋ i cunye ducu kede tipo mere luŋ, kun etimo jami ducu ame ocoo i buk man.

³²En te ciko jo luŋ ame onwoŋo tye i Jerucalem kede i Benjamin i kare-nono ni gin myero lub cikere-nono. Jo ame bedo i Juda kede i Jerucalem te bedo timo ginnoro luŋ kite ame tye kede i cikere a Rwot Obaŋa a kwarigi.

³³Yocia te kwanyo ginnoro luŋ ame obedo me kwer i kabedo luŋ ame tye i lobo a jo Icrael, eka te miyo jo luŋ ame onwoŋo tye i lobo me Icrael calo woro Rwot Obaŋagi. Gin naka mom oloki Rwot Obaŋa a kwarigi ŋegi kadi acel i kare a Yocia luŋ.