Read lango 2 Tekwaro 35 Bible Online

2 Tekwaro 35 - lango bible

2 Tekwaro 35

¹Yocia te kwero ecuban me Kato i Jerucalem, omio oneko romo me Kato i nino dwe apar wie aŋwen me dwe me agege.

²En oketo olamdog i dog ticgi, te daŋ cukoro cunygi me tiyo ticgi i ot a Rwot.

³En te kobbigi jo Levi ame gin obedo opwony a jo Icrael luŋ dok ame gin obedo jo acil baŋ Rwot, ni, “Ket wunu canduk acil i ot ame Culeman wot a Daudi abaka me Icrael rik ogero pire; mom dok ibed yeyo wumo i wi gwokwu, Aman doŋ ti wunu tic a Rwot Obaŋawu kede tic a jo mere Icrael.

⁴Yikere wunu i doggola a kwariwu i dul i dul, kun ilubo wunu gin ame Daudi abaka me Icrael ociko karacel kede en ame wode Culeman ociko.

⁵Cuŋ wunu i kabedo acil, cuŋ wunu kun ilubo wunu doggola a kwariwu, kun iyikere wunu me konyo omegowu kede jo Obaŋa ocele mere, kun dul acel acel tye kede jo ame etiko.

⁶Nek wunu rommi me kato, lonnyere wunu kenwu, yik wunu gin amite pi omegowu, me ilub wunu kop a Rwot ame Muca ociko.”

⁷Abaka Yocia te miyo mot me Kato pi lwak luŋ ame onwoŋo tye, omio itino rommi kede itino dyegi tutumia pyeradek nono, kede twoni tutumia adek; magi luŋ en okwanyo i kom limmere en ikome.

⁸Rwode mere daŋ te miyo lwak mot ame cunygi omito, kun omio daŋ olamdog kede Olevi. Kilkia, Jekaria kede Jekiel, ame gin onwoŋo odoŋe ame loo tic i ot a Rwot, gin omio olamdog itino rommi kede me dyegi tutumia aryo kede mia abicel, kede twoni mia adek, me mot me kato.

⁹Konania daŋ, kede Cemaya, kede omego mere Natanel, Kacabia, Jeyel, kede Jojabad, ame gin obedo otel a jo Levi gin omio Olevi itino rommi kede me dyegi tutumia abic kede twoni mia abic, me mot me Kato.

¹⁰Kare ame doŋ otyeko yiko jami luŋ, olamdog ocuŋ kakargi, kun Olevi daŋ ocuŋ kakargi i dul i dul kite ame abaka ociko.

¹¹Ote doŋ neko rommi me Kato. Olamdog te kikiro remogi i kom keno lam kun Olevi tye ayaŋo rommi ame oneneko.

¹²Gin te popoko leyi me mot awaŋa, kun omio doggola acel acel megi, me gin yal i Rwot kite ame ocoo kede i buk a Muca. Gin opoko twoni daŋ kittono;

¹³obulo riŋo rommi me Kato i mac kun olubo gin ame ociko, ento mot acillere ote tedo ateda i gulli, kede cupulia, ote tero oyotoyot wot poko oko baŋ lwak.

¹⁴Icennere gin doŋ te yiko megi kede me olamdog, pien olamdog ame obedo ikwae Aron onwoŋo tye i tic adwoŋ meicel ame diogi naka iwor tic me waŋo mot kede dwol me yalo Rwot. Mannono omio Olevi oyiko megi kede me olamdog ikwae Aron.

¹⁵Ower ame obedo ikwae Acap onwoŋo daŋ tye kakargi kite ame Daudi ociko. Ikwae Acap, Keman, kede me a Jedutun, aran-piny abaka, kede okur dogcel luŋ: gin onwoŋo mom twero ya i dog ticgi, pien omegogi jo Levi onwoŋo tye ayiko cam me Kato pirgi.

¹⁶Mannono omio woro me kwero ecuban me Kato a Rwot oyikere aber i nino-nono karacel kede yalo Rwot i mot awaŋa i wi keno lam; gin luŋ rik oyikere kun lubo gin ame abaka Yocia ociko.

¹⁷Jo Icrael ame onwoŋo tye i nino-nono te kwero ecuban me Kato kede ecuban me ogati a tobi mom iye pi nino abiro.

¹⁸Kwero ecuban me Kato kittono rik onwoŋo mom doŋ timere iyi Icrael, cakere i kare adwar-piny Camwiri; mom tye abaka moro iyi akina obakki me Icrael ame okwero ecuban me Kato kite ame abaka Yocia okwero kede, kun kwero karacel olamdog, Olevi jo Juda kede jo Icrael luŋ ame onwoŋo tye, medo kede jo ame onwoŋo bedo i Jerucalem.

¹⁹Ecuban me Kato man okwero i mwaka me apar wie aboro me loc a Yocia.

²⁰Kare ame man luŋ otum, ame Yocia doŋ oyiko ot a Rwot oko. Neko abaka me Miciri, owoto owao monnyere me wot lweny i Karkemic ame tye i ŋet kulo Efurate. Yocia otemo ŋolle i kome,

²¹cite en te cwayo kwena baŋ Yocia kun kobbe ni, “Abaka me Juda we, imito ni wan otim gin aŋo, ŋat man i kom awottere? An gira tin mom abino me lweny kedi, cite me lweny okworra; Obaŋa otyeko koba ni myero ecuny wot. Myero kur item pyem Obaŋa ba, pien en tye keda, naka mio en jweri oko,”

²²Kadi bed amannono, Yocia mom oye winyo koppere, en orukere acalo dano moro ata, te wot me wot lweny kede. En okwero winyo kop a Neko oko ame onwoŋo obedo kop Obaŋa ikokome, en omedde i wottere me wot lweny kede i bar me Megido.

²³Kare ame lweny doŋ ocakere, won atero moro te celo abaka Yocia oko, abaka te kobbi omiro mere ni, “Kwanya wunu itera wunu teŋe pien owana atek meicel.”

²⁴Omiro mere te tiŋe oko i wi gadigadi mere ote kete i wi gadigadi ocele mere ote tere naka i Jerucalem. Yocia te to oko ote yiko kome i lyel a kwari mere. Jo Juda luŋ kede jo Jerucalem te bedo kumo pire.

²⁵Adwarpiny Jeremia te cako wer me koko abaka Yocia, ower a co kede en a mon pwod wero wer man naka tin ka ce opo pi Yocia. Omia man odoko cik i yi Icrael; wer me koko Yocia-ni tye ocoo i buk me Koko.

²⁶Kop i kom Yocia odoŋŋere luŋ, ginnoro luŋ abeco ame yam en otio kun lubo gin ame ocoo i cik a Rwot,

²⁷gin ame en otio cakere iyi ageyi naka iyi agikki, ame mom ocoo kan, gin luŋ tye ocoo i buk Obakki me Icrael kede Juda.