Read lango 2 Tekwaro 36 Bible Online

2 Tekwaro 36 - lango bible

2 Tekwaro 36

¹Jo te yero Yekoakaj wot a Yocia ote kwere me bedo abakagi akaka pappere kun bedo i Jerucalem.

²Yekoakaj ocako loc kun mwaka me dittere doŋ oromo pyeradek wie adek, en te bedo loc i Jerucalem pi dwete adek.

³Abaka Neko me Miciri te ryeme oko i Jerucalem en te ŋolo cul me ryal ame pekkere romo ratili tutumia abiro, kede mia abic, kede cul me jabu ame pekkere romo ratili pyerabiro wie abic i wi Juda.

⁴Abaka Neko te keto ominnere Eliakim me loyo Juda kede Jerucalem, eka te loko nyiŋe oko ni Yekoyakim. Ominnere Yekoakaj en te tero oko naka i Miciri.

⁵Yekoyakim ocako loc ame mwaka me dittere oromo pyeraryo wie abic, en te bedo loc i Jerucalem pi mwakki apar wie acel. En obedo timo gin ame nen arac i nyim Rwot Obaŋa.

⁶Nebukadnejar abaka me Babulon rik te bino cako lweny i kome ame te make tweye oko kede jegere, te tere naka i Babulon.

⁷Nebukadnejar te daŋ tero jami mogo me tic i ot a Rwot i Babulon, te wot ketogi i paco mere i Babulon.

⁸Kop i kom Yekoyakim odoŋŋere ducu, timmogo me kwer ame en obedo timo, kede koppogo ame onwoŋo i kome ame mom ocoo kan, gin luŋ tye ocoo i buk Obakki me Icrael kede Juda. Wode Yekoyakim en ame te leyo kakare.

⁹Yekoyakim ocako loc ame mwaka me dittere oromo aboro, en te bedo loc i Jerucalem dwete adek kede nino apar keken, En obedo timo gin ame nen arac i nyim Rwot.

¹⁰I kare me oro abaka Nebukadnejar ocwao omiro mere me wot kele i Babulon, kun okelo daŋ jami mogo abeco me tic i ot a Rwot. Ote lunyo keto ominnere Jedekia me bedo abaka ame loo Juda kede Jerucalem.

¹¹Jedekia ocako loc ame mwaka me dittere oromo pyeraryo wie acel, en te bedo loc i Jerucalem mwakki apar wie acel.

¹²En obedo timo gin anen arac i nyim Rwot Obaŋa mere. En mom oye bedo amwol baŋ Jeremia adwarpiny, ame obedo kobbe kop ame oya ibaŋ Rwot.

¹³En daŋ ojem i kom Nebukadnejar abaka me Babulon, ame rik onwoŋo omie ekwoŋo akwoŋa kun ekwoŋo i nyiŋ Obaŋa; en odoko apala ame mom doŋ twero ŋut me lokere dok baŋ Rwot Obaŋa me Icrael.

¹⁴Olamdog adoŋo luŋ karacel kede lwak luŋ onwoŋo doŋ ogak oko odoco, ame otimo doŋ timmogo me kwer calo rok ocele, kun daŋ obalo doŋ ot a Rwot ame Rwot onwoŋo olonyo me bedo kabedo acil i Jerucalem.

¹⁵Rwot Obaŋa akwarigi obedo cwayo okwena baŋgi me kwenyorogi tere i tere, pien kica onwoŋo omako i kom jo mere kede i kom kabedo mere.

¹⁶Ento gin gigi ote nywaro okwena Obaŋa anywara ame ocao-gu koppere, ojwiogu odwarpiny ajwia, naka omio akemo omako Rwot otuggere i kom jo mere agwa meicel ame mom dok tye yo moro me juko.

¹⁷Mannono omio Rwot okelo abaka me Kadaya me bino lweny kedgi, ame te neko awobegi i pala lweny, kun nekogi kun nekogi naka i kabedo acil, ame kica mom omako kadi acel i kom awobi, kadi i kom nyako a mom ru oŋeye ico, i kom adwoŋ oti onyo en ame oteggo meicel. Rwot omiogi luŋ i ciŋ abaka me Kalidaya.

¹⁸En te yako jami luŋ ame rik onwoŋo otio kedgi i ot Obaŋa, jami adoŋo kede en atino, jami ame rik okano i ot kano lim a Rwot kede en ame onwoŋo tye i ot kano lim abaka karacel kede me a rwode mere, jami magi luŋ en oyako te tero naka i Babulon,

¹⁹Gin te waŋo ot Obaŋa, paco abaka, kun omumuko apama cel me Jerucalem, obabalo daŋ jami mogo me wel ame onwoŋo tye iye.

²⁰Jo ame obwot i lak pala romo, en otero luŋ i Babulon acalo opii, gin te wot bedo kuno acalo omiro mere kede me ikwae tuno naka i kare ame loc a jo Pacia omoko atek.

²¹Mannono omio kop a Rwot ame rik emio Jeremia okobo ocobere kakare, ni, “Lobo bino doŋ yie nono pi mwakki pyerabiro me culo kare me kwero nino me cabit ame rik onwoŋo mom obedo kwero.”

²²I mwaka me agege me loc abaka Kuro me Pacia, i mwaka-nono en ame Rwot obin otugo iye cunye en abaka Kuro me cwalo cik romo lobo mere luŋ kun daŋ mio ocoo acoa me kwan rom lobo mere luŋ. Man otimere me kop a rik Rwot omio Jeremia okobo cobere kakare, Koppere-nono rik ocoo ni.

²³“Man en gin ame Kuro abaka me Pacia okobo. Rwot ame obedo Obaŋa me polo doŋ otyeko keta me bedo aloc me wi podo luŋ, dok omia tic me gero ot pire i Jerucalem i Juda. Doŋ Rwot Obaŋa myero bed i ŋat acel acel i kom jo mere luŋ ame tye i akinawu; omi en wot i Jerucalem kuno.”