Read lango 2 Tekwaro 4 Bible Online

2 Tekwaro 4 - lango bible

2 Tekwaro 4

¹Otio keno lam me mola, ame borrere romo futi pyeradek, laccere daŋ futi pyeradek; borrere me malo futi aparwie abic.

²Dok te tiyo dero pii me mola oluŋere aluŋa ame tuttere romo futi abiro kede nucu, lac me yie futi apar wie abic, ya i doge tuŋcel tuno naka i doge tuŋ cel, eka laccere mano kore luŋ te bedo futi pyeraŋwen wie abic.

³I lak doge i piny ote ryeyo cal opoko mano amana ame kan ame oryeo iye-nono romo futi pyeraŋwen wie abic; cal opokonono oryeo i yore aryo. I kare ame otio dero pii me mola, otio daŋ cal opoko i kome cuto.

⁴En otero dero gwoko pii-nu te wot cibo i ŋe cal twoni me mola apar wie aryo, kun ocuŋ adek adek: adek oneno tuŋ anyarodi, adek oneno tuŋ to, adek oneno tuŋ anyarolum, kede adek te neno tutuŋ kide, ŋegi luŋ odok i te dero.

⁵Inoŋ a kom dero-nono onwoŋo romo inci adek; doge ote tiyo bala dog kopo, ame rom aroma i tur kalaŋweka. Dero gwoko pii-nono onwoŋo twero donyo iye pii ame kato debe tutumia abicel.

⁶Dok te tiyo tako lwok apar, oketo abic tutuŋ anyarolum, kede abic tutuŋ anyarodi. Gin onwoŋo obedo me lwoko jami ducu ame otio kedgi i mot awaŋa me yalo Obaŋa; dero pii oketo me lwok olamdog.

⁷Dok te tiyo acib tara me jabu apar kite ame onwoŋo ociko te ketogi daŋ i ot Obaŋa, kun keto abic tutuŋ anyarolum, kede abic tutuŋ anyarodi.

⁸Dok te tiyo meja apar, oketogi daŋ i ot Obaŋa, oketo abic tuŋ anyarolum, kede abic tuŋ anyarodi, dok te tiyo becen me jabu mia acel.

⁹Te daŋ yiko dyekal olamdog, kede dyekal adwoŋŋere, kede kika me dyekal, kun mwono kom kika luŋ kede mola;

¹⁰te keto dero pii cuŋ i gul ot tutuŋ anyarolum ame dok tutuŋ kide.

¹¹Kuram dok te tiyo ta ko jobo buru apol kede atok buru anaka becen-gu. Mannono en kite ame Kuram otyeko kede tic i kom ot Obaŋa pi abaka Culamen.

¹²Otio pagi aryo, tok aryo ame oluŋere aluŋa calo gulu ame ote keto i wi pagi, kede boo aryo me wumo kom tok aryo ame oluŋere aluŋa ame bedo i wii pagi aryo ca.

¹³Otio daŋ cal okwer pomegranat mia aŋwen pi boo aryo luŋ, kun cal okwer pomegranat oryeo i yore aryo i kom boo acel acel me wumo wi tok aryo ame oluŋere aluŋa ame bedo i wi pagi aryo ca.

¹⁴Dok otio daŋ gadigadi atitino apar, tako mola apar ame oluto i gadigadi atitino-nono,

¹⁵kededero gwoko pii acel, kede twoni apar wie aryo me bedo i te derogwoko pii.

¹⁶Tako jobo buru kede atok buru, kede acob riŋo kede jami luŋ ame mitte me tic, jami magi ame Kuramabi otiogi pi abaka Culeman, me tic i ot a Rwot onwoŋo obedo me mola ame otio komgi apwot meicel.

¹⁷Abaka rik otio jami magi luŋ i bar me kulo Jordan, kan ame lobo me cweyo gulu tye iye i akina Cukot kede Jereda.

¹⁸Culeman rik otio jami magi apol meicel ame mola ame odonyo i komgi mom opimo pekkere.

¹⁹Mannono en kite amerik Culeman otio kede jami luŋ ame tye i ot Obaŋa: keno lam me jabu, meja me cano ogati ame oketo i nyim Rwot,

²⁰acib tara, kede tara me jabu ame olio aber apipim ame myero bed lyel i nyim kabedo acil ame tye tyelo kite ame ociko kede;

²¹kede cal ature apipim kede tara daŋ apipim kede boi kwanyo mac, gin luŋ otio i jabu ame olio aber Meicel.

²²Otio daŋ makac apopol, becen, tabo me waŋo odok akur kede weer me lodi mac, ame gin luŋ otiogi i jabu ame olio aber; kede pata me aketa i kika me doggola ame donyo iyi kabedo acil meicel ame tye tyelo, kede me aketa i kika me donyo iyi icika adwoŋŋere me ot Obaŋa, gin luŋ daŋ otio i jabu.