Read lango 2 Tekwaro 6 Bible Online

2 Tekwaro 6 - lango bible

2 Tekwaro 6

¹Abaka Culeman te cako kwayo Obaŋa kun kobo ni, “Rwot doŋ oyero gire bedo i pol acol icuc.

²Agerri doŋ twon ottoro amalo meicel, me bed kabedoni nakanaka.”

³Abaka te doŋ lokere neno lwak eka te lamo winyo i kom jo Icrael luŋ, kun jo tye ame ocuŋ gigi mot,

⁴en te kobo ni, “Pwo wunu Rwot Obaŋa me Icrael! Pien en ikome omio gin a rik eciko baŋ pappa Daudi ocobere, ame en rik okobo ni,

⁵‘Cakere i kare ame akwanyo jona Icrael i lobo Miciri, mom ru ayero boma moro i atekere me Icrael luŋ me gero ottoro iye, kan ame amito ni wora iye, dok mom ayero abaka moro me loyo jona Icrael;

⁶ento doŋ atyeko yero Jerucalem me bedo kan ame myero wora iye, dok ayero Daudi me loyo lwakka Icrael.

⁷I kare-naca pappa Daudi obedo kede tam i cunye me gero ot me woro Rwot Obaŋa a jo Icrael.

⁸Cite Rwot en ame rik te juko pappa kun kobo ni, “Itimo ber me bedo kede tam me gero ot me wora,

⁹ento mom yin en ame ibino gerra ot, wodi ame yin ibino nywalo en ame bino gero ot me wora.”

¹⁰Nen Rwot doŋ otyeko miyo gin a rik eciko ocobere oko; pien en omio an aleo kaka pappa Daudi acalo abaka me Icrael, kite ame rik Rwot ociko-naca, dok daŋ doŋ atyeko gero ot me woro Rwot Obaŋa me Icrael.

¹¹Dok daŋ atyeko keto canduk a Rwot i ode-naca, ame tye iye kidi apada aryo me cikere ame rik Rwot ocikere kede i jo Icrael.’ ”

¹²Culeman te ya wot cuŋ i nyim keno lam kun lwak jo Icrael luŋ tye aneno, te taŋo ciŋe malo i polo.

¹³Culeman onwoŋo otio tuti me mola ame borrere romo futi abiro kede nucu laccere futi abiro kede nucu, borrere me malo futi aŋwen kede nucu, te cibo i dyekal; en te cuŋ i wie. En dok te rumo coŋe piny i nyim lwak jo Icrael luŋ ame onwoŋo ocokere karacel, te te taŋo ciŋe malo i polo,

¹⁴Okwao Rwot kun kobo ni, “Ama Obaŋa a jo Icrael, mom dok tye Obaŋa moro ocele ame cal kedi, akadi malo i polo onyo piny i wi lobo, ame gwoko cikere mere calo yin, yin ame inyuto marri baŋ omironi luŋ ame lubi kede cunygi luŋ,

¹⁵Ibedo lubo ginnoro luŋ ame rik ititti pappa Daudi; gin ame yin rik ikobo kede dogi, aman doŋ yin i komi icako miyo cobere oko, dok daŋ ocobere luŋ kakare.

¹⁶Ama Rwot Obaŋa a jo Icrael, doŋ ityeko giri lubo ginnoro luŋ ame rik iciko baŋ pappa Daudi ni, ‘Mom gire ibino bedo aboŋo akwarri moro i wi kom loc me Icrael, tekki ikwaeni bino bedo jo a kitegi beco, kun otio gin ame an amito, kite ame yin ibedo tiyo kede-ni.’

¹⁷Ama Rwot Obaŋa me Icrael, tim ber aman doŋ imed moko koppinaca ba, bed ame rik ikobo baŋ pappa Daudi, me kite ame rik ikobo kede.

¹⁸“Ento Obaŋa bino bedo piny i lobo kan karacel i dano ateni? En ame kadi polo twal daŋ mom rommenie, kara doŋ ot ame agero-ni twero romme ni ŋo?

¹⁹Kadi amannono ba tim ber iwiny kwacca an amironi, abaka doga baŋi, Ama Rwot Obaŋana, tim ber iwiny kokona kede kwacca ame aketa i nyimi tin-ni.

²⁰Tim ber inen ot man dyewor kede dyeceŋ, kabedo man ame yin iyero me bedo kan ame myero jo wori iye. Tim ber iwiny kwacca ame aketo i nyimi kan i ot man.

²¹Winy kwacca karacel kede kwac a joni Icrael ka ce gin okwao kun nyimgi neno ot man, Winy ba, Ama Rwot, i kabedoni ame tye malo i polo, dok daŋ itimwa kica i kom balwa.

²²“Ka ce ŋattoro otimo balloro baŋ dano wadgi, eka ote kele kan i nyim keno lam ni myero en kwoŋ iye,

²³tim ber iwiny i kabedoni i polo ite ŋolo kop i akina omironi. Mi can opot i kom obalo, kun idwoko timere i wie; mi ŋat a kopporo mom i kome lo kop, kun itime ber ame oromo kite atira.

²⁴“Ka ce okwor a joni Icrael oloogi oko pi balloro ame gin obalo i nyimi, ka ce oŋut ote dwogo baŋi, ote bino paki i ot man kun obako doggi baŋi,

²⁵tim ber iwiny kwacgi i kabedoni ame tye malo i polo. Tim joni kica i kom balgi, ite dwoggogi i lobo a rik omio baŋ kwarigi.

²⁶“Ka ce joni Icrael otimo balloro baŋi, eka ite keto can i komgi, kun itwonogi kot oko, icennere gin te ŋut, ote dwogo kwayi kun nyimgi ne no ot man, kun daŋ opako nyiŋi,

²⁷tim ber iwiny kwacgi i kabedoni ame tye malo i polo. Tim ber itim omironi kica i kom balgi, ame gin obedo joni Icrael. Pwonygi me bedo i kit kwo ame yin imito, mi kot ocwe i loboni, ame rik imio baŋ joni Icrael me bedo lobogi doŋ atwal.

²⁸“Ka ce kec opoto i lobo, onyo two edeke, onyo ceŋ otwo kai oko, onyo oner oko, onyo bonyo, onyo kit kudi moro ocele en ame ocamo; onyo ka okwor oero lweny i kom joni, te gurogi oko i bomagi, onyo ka two moro ocele ame opoto i akinagi,

²⁹tim ber iwiny kwacgi. Ka ce ŋattoro keken i akina joni Icrael ame cunye ocwer obino ocwalo kwaccere baŋi, kun nyime one no ot man, onyo jo Icrael luŋ ocwalo kwacgi baŋi,

³⁰tim ber iwiny kwacgi. Winy kwacgi i kabedoni ame tye malo i polo timgi kica, ite timo gin ame ineno ni porre pire on yo pirgi i kom gin ame gin okwao. Yin keni gire ineo gin ame tye i cuny dano acel acel; pi mannono, yin timmi ŋat acel acel gin ame ineno ni porre pire,

³¹me jo Icrael bed kede lworo i komi kare luŋ ame gin tye i lobo ame yin rik imio baŋ kwarigi.

³²“Ka ce arokkoro ame mom dano me Icrael owinyo piri, kede pi gigi mogo adonodono ame yin ibedo ti mo baŋ joni Icrael, eka te bino i ot man pi bino worri kun oya i lobo abor,

³³tim ber iwiny kwaccere i kabedoni ame tye malo i polo. Tim ber iti gin ame en okwao pire, me jo me wi polo luŋ ŋei ote bedo kede lworo i komi ame rom aroma kede joni Icrael. Mannono bino miyo miyo gin ŋeo ni ot ame an agero kan piri-ni en ame obedo kan ame myero wori iye.

³⁴“Ka ce yin iciko joni me wot lweny okworgi, ka ce gin okelo kwacgi i nyimi i kan ame gin otye iye kuno, kun nyimgi oneno kabedo man ame yin en iyero, kede ot man ame an agero piri-ni,

³⁵tim ber iwiny kwacgi i kabedoni ame tye malo i polo, ite miyogi loyo okworgi oko.

³⁶“Ka ce joni Icrael opoto i bal i nyimi, pien mom tye dano moro kadi acel ame mom timo bal, eka akemo te maki i komgi, ite miyo okworgi loyogi oko, te daŋ terogi oko acalo opii, i lobo moro ocele ame tye kannabor onyo ame tye kan aceggi;

³⁷cite ka i kare ame gin tye kuno cunygi te kolo piny, ote ŋut, ote kwayi kun otuco balgi i nyimi, kun oye ni kitegi oballe oko pi gin areco ame gin obedo timo, tim ber iwiny kwacgi Ama Rwot.

³⁸Ka ce i kare ame gin tye kuno i lobo ame oterogi iye acalo opii, gin te ŋut, kun oŋut ateteni i cunygi ducu, ote kwayi i kuno kun nyimgi oneno lobo man ame yin rik imio baŋ kwarigi, kede kabedo man ame yin giri en iyero kede ot man ame an agero piri-ni,

³⁹tim ber iwiny kwacgi i kabedoni ame tye malo i polo, ite timogi kica i kom balgi.

⁴⁰Aman doŋ ba, Ama Obaŋa, cik waŋi dok iter daŋ yiti i kwac luŋ ame obino kwayo i kabedo man.

⁴¹Ya doŋ malo, Ama Rwot Obaŋa, me iwot i ka weoni, yin karacel kede canduk me tekoni. Mi olamdog meri Ama Rwot Obaŋa, oruk ruk me larre, mi joni acillel i yomcuny pi berri.

⁴²Ama Rwot Obaŋa, kur ikwer winyo kop a abakani ame iyero! Po pi marri a mom lokere i kom amironi Daudi.”