Read lango 2 Tekwaro 7 Bible Online

2 Tekwaro 7 - lango bible

2 Tekwaro 7

¹Kare ame Culeman doŋ otyeko kwaccere, mac oya i polo te bino waŋo mot awaŋa me yalo Obaŋa karacel kede mot ocele luŋ, kwogo a Rwot te poŋ yi ot Obaŋa oko,

²Mannono te miyo olamdog mom doŋ romo donyo i ot a Rwot, pien kwogo a Rwot onwoŋo doŋ opoŋ yi ot oko,

³I kare ame jo Icrael luŋ oneno mac ame oya i polo obino piny, kede kwogo a Rwot ame opoŋ iyi ot Obaŋa, gin oryebere piny kun nyimgi gudo lobo i dyekal ame opepeto iye kiddi, ote woro Rwot kun opwoc, okobo ni, “Pien en gire ber, marrere a mom lokere perakino atwal.”

⁴Abaka kede lwak luŋ a rik tye kuno te yalo Rwot.

⁵Abaka Culeman oyalo Rwot i twoni tutumia pyeraryo wie aryo, kede rommi tutumia acel, i pyeraryo nono. Abaka karacel kede jo Icrael luŋ te kwero ot a Rwot kittono.

⁶Olamdog te cuŋ i kabedogi, kede jo Levi, kun omako jami me wergi, me pako Rwot, kite ame rik abaka Daudi oyiko me miyo pwoc baŋ Rwot, pien marrere a mom lokere perakino atwal. Mannono onwoŋo rik obedo timo kare ducu ame Daudi pako iye Obaŋa kun gin okonye i wergi, Lwak jo Icrael luŋ onwoŋo ocuŋ okemere kede olamdog ame akuto apel.

⁷Culeman dok te kwero dye dyekal ame tye i nyim ot Obaŋa. En oyalo Rwot i mot awaŋa kuno, kede dwol me mot me kweyo cuny, pien keno lam me mola ame onwoŋo mom romo keto mot awaŋa kede mot me moko kwon kede dwolo me yalo Rwot.

⁸I kare-nono Culeman karacel kede jo Icrael luŋ te kwero ecuban, nino abiro. Jo Icrael ame okwero ecuban-nono onwoŋo dwoŋ meicel jo luŋ ame oya i dog yo ame woto Kamat tuno kede naka i kulo me Miciri.

⁹I nino me kany wie adekkere, gin te bedo kede cokere adwoŋ; pien gin obedo kwero keno lam nino abiro twal kede ecuban nino abiro daŋ.

¹⁰I nino me pyeraryo wie adek me dwe me abiro en ame rik Culeman ocwao iye lwak me dok i paccigi. Lwak odok i paccigi kun cunygi yom atek meicel pi jami abeco luŋ ame Rwot otimo pi amiro mere Daudi kede Culeman kede lwakkere luŋ ame gin jo Icrael.

¹¹Mannono en kite a Culeman otyeko kede tic me gero ot a Rwot kede ot abaka; tic luŋ ame rik en oyiko me atia i ot a Rwot kede i ode en ocobo aber meicel.

¹²Rwot dok omedo nen baŋe tyen me aryo mere dyewor, kun kobbe ni, “Atyeko doŋ winyo kwacci, atyeko doŋ yero kabedo man pira me bed acalo ot me yala kede mot,

¹³Ka ce acego polo oko a kot doŋ mom cwe, onyo ka aciko ni bonyo myero cam cam ame tye i lobo tyek oko, onyo ka ce acwao two edeke i kom lwak ka,

¹⁴ka ce lwakka ame olwoŋogi kede nyiŋa omwolle, eka ote kwaya kun owora dok daŋ oweko timo tim areco, an dok abino winyo kwacgi i polo, ate weko balgi, dok abino kwanyo gin ame tye ka balo lobogi oko.

¹⁵Cakere tin abino ciko waŋa dok abino tero yita me winyo kwac ame obino kwayo i kabedo man,

¹⁶Pien tin doŋ atyeko yero jo man, dok daŋ atyeko lonyo oko bedo acil, me nyiŋa bed iye nakanaka; waŋa kede cunya bino daŋ bedo kuno nakanaka.

¹⁷Aco yin ba, ka ce ibino tic baŋa kite ame pappi Daudi obedo timo, ce ibedo tiyo gin ame aciko luŋ, kun igwoko daŋ cikka luŋ, kede gin ame aciko,

¹⁸an Obaŋani abino moko locci bedo nakanaka kun agwoko gin a rik aciko baŋ pappi Daudi, kare ame akobbe ni, ikwae en ame bino loyo Icrael nakanaka.

¹⁹“Ento ka ce ibino gak wunu oko i yo apat, kun mom dok iluba wunu, dok daŋ mom itio wunu gin ame aciko, eka ite kobo wunu oko baŋ obaŋa moro ocele kun daŋ dok iworogi wunu,

²⁰an abino kwanyowu oko i lobo ame rik amiowu. Dok mom daŋ abino ciko waŋa i kom ot man ame doŋ atyeko lonyo doko acil me wora-ni; dok abino miyo doko gin ame rok luŋ lolo i doggi, kun oceko kop i kome.

²¹Jo luŋ ame bino beo i ŋet ot man adwoŋ wok-ki, obino wuro awura kun ojwiye kengikengi, okobo ni, ‘Do kara omio Rwot otimo lobo man kede ot man kit man ba?’

²²Jo ocele bino kobo ni, ‘Pien jo Icrael oweko Rwot Obaŋagi oko ata, ame okwanyo kwarigi i lobo me Miciri, gin gigi dok olunyo kobo baŋ obaŋe mogo ocele kun oworogi dok paŋ otio tic pirgi. Mannono en omio Rwot oketo twon can agwa wok-ki i komgi.’ ”