Read lango 2 Tekwaro 8 Bible Online

2 Tekwaro 8 - lango bible

2 Tekwaro 8

¹Gero ot Obaŋa kede me abaka oteri Culeman mwakki pyeraryo twal me tum.

²Culeman dok te cako roco boma mogo ame rik abaka Kuram omiogi baŋe, te miyo jo Icrael bedo iye,

³Culeman dok te wot i Kamat-joba, te wot mayo oko.

⁴En dok te gero Tadmor ame tye i tim kede boma luŋ me kano cam ame en ogerogi i Kamat.

⁵En ogero daŋ Bet-koron Amalo kede Bet-koron Apiny, te celo boma oko i cel atek, te daŋ keto iye doggola ame ocego atek.

⁶Ogero daŋ Baalat, kede boma luŋ me kano cam ame rik en tye kedgi, kede boma me gwoko gadigadi me mony, kede boma a wegi aguragura, kede kit gedo luŋ ame Culeman rik omito gero i Jerucalem, kede i Lebanon, kede i lobo ame en loo luŋ.

⁷Jo ame obedo rono i tic me gedo obedo jo luŋ ame odoŋ i kom jo Kitti, jo Amor, jo Periji, jo Kivi, kede jo Jebuc ame gin mom obedo jo Icrael.

⁸Ikwaegi ame rik jo Icrael mom oneko i kare ame gin gamo lobogi me bedo meggi, gin en ame Culeman obedo ronogi i tic kite ame pwod otye ka ronogi kede i tic naka atot tin.

⁹Ento Culeman mom otio i jo Icrael i kokome acalo opii; gin obedo ocirikale, odoŋe ame loo tic apapat, kede odoŋe me mony odoŋe me gadigadi lweny, kede oŋwec aguragura abaka.

¹⁰Odoŋe ame loo tic apapat me gedo ame rik Culeman oketo rik romo mia aryo kede pyerabic. Jo-ni en ame obedo loyo lwak.

¹¹Culeman te kwanyo nyaka a Parao i paco a Daudi tero i ot ame en ogero pire, kun kobo ni, “Dakona mom bino bedo i ot a Daudi abaka me Icrael, pien kabedo luŋ ame doŋ canduk a Rwot obedo iye-ni odoko kabedo acil.”

¹²Culeman te bedo yalo Rwot i mot awaŋa i wi keno lam ame en ocano me yalo Rwot i nyim icika ot ame tye i doggola,

¹³En obedo yalo Rwot i mot kite ame omito me nino acel acel, kun luba cik a Muca i cabit luŋ, kede por dwe, i nino adoŋo adek ame ociko i mwaka acel acel, ame obedo kare me ecuban me Ogati a Tobi Mom iye, kare me ecuban me cabit abiro, kede kare me ecuban me Gonye.

¹⁴Kite ame rik pappere Daudi ociko, en oketo olamdog i dul apapat i dog ticgi, kede Olevi i dog ticgi me pako Obaŋa kede me konyo olamdog, kun lubo tic me nino acel acel. Opoko daŋ tic ogwok doggola luŋ kun pokogi i dul i dul i doggola acel acel, kite ame Daudi dano Obaŋa rik onwoŋo ociko.

¹⁵Gin daŋ obedo lubo cik ame abaka rik ociko kede olamdog kede Olevi, mom oweko moro kadi acel ame mako kopporo luŋ ame ociko kede ame mako kano lim.

¹⁶Culeman rik te tyeko ticcere luŋ kittino, cakere i nino ame oketo iye acakki te ot a Rwot tuno kede i nino ame otum iye. Ot a Rwot rik te tum kittono.

¹⁷Culeman rik dok te wot naka i Ejion-geber ame ceggi kede Elat ame tye i dog nam, i lobo Edom.

¹⁸Abaka kuram rik te cwayo jo mere kede mel baŋ Culeman; en ocwao jo ame odiro i nam, gin te wot naka i Opir karacel kede omiro a Culeman, ote wot kelo jabu i kuno, pekkere onwoŋo buco romo tan apar wie abicel, ote kelo baŋ a baka Culeman.