Read lango 2 Tekwaro 9 Bible Online

2 Tekwaro 9 - lango bible

2 Tekwaro 9

¹I kare ame abaka adako me Ceba owinyo nyiŋ Culeman orwo atek, en obino baŋe i Jerucalem me bino teme kede penyere mogo atek meicel. En obino kede jo cipan ame gwoke, kede inaga apipim ame oyeo i jami mogo a ŋwecgi kur, kede jabu adwoŋ atata, kede gweŋe alilia me wel. Kare ame en otuno baŋ Culeman, en otitte kop ducu ame onwoŋo tye icunye.

²Culeman te dok i penyere luŋ; mom tye moro kadi acel ame tuco oloo Culeman.

³Kare ame en doŋ oneno ryeko a Culeman luŋ, kede ot ame en ogero, kede cam ame obedo tedde,

⁴kede kabedo ocele adoŋo doŋe, kede lwak jo ame tio baŋe, kede boŋŋi ame gin ruko me wel, kede jo ame mie koŋo olok, karacel kede mot ame en yalo kede Rwot, wi abaka me Ceba te cuŋ oko.

⁵En te kobbi abaka Culeman ni, “Gin ame abedo winyo i komi kede i kom ryekoni i kare ame pwod atye i lobona, tye kara ateni!

⁶Cite an onwoŋo mom aye, tuno ka tin doŋ aneno kede waŋa. Nen ba, kop ame onwoŋo awinyo i kom ryekoni adwoŋ kara onwoŋo aduno moro; ryekoni kede lonyoni dwoŋ kara atek meicel ame kato kit ame onwoŋo okobba kede oko.

⁷Monni komgi i gum okato kare! Omironi luŋ komgi i gum meicel, me cuŋ i nyimi kare luŋ kun owinyo kop me ryeko ame ya i dogi!

⁸Rwot Obaŋani myero pwo atek meicel, pien onyuto yomcunye i komi pi keti me bedo abaka akakare en Rwot Obaŋani! Pien Rwot Obaŋani omaro jo Icrael atwal dok omito ni gin omok atek meicel, en omio en oketi me bedo abakagi, me yin ilogi aber kun itio gin a tye atira, dok iŋolo kop kakare.”

⁹Abaka a dako me Ceba te miyo Culeman jabu ame pekkere buco romo tan abic, kede odokkogo ame ŋwecgi kur apipim kede gweŋe alilia me wel apipim. I kare-nono onwoŋo mom tye odokkoro a ŋwece kur ame rom i en ame abaka me Ceba omo baŋ Culeman-nono.

¹⁰Medo i kom mannono, omiro a Kuram kede omiro a Culeman, ame onwoŋo okelo jabu i Opir, okelo daŋ bao mogo me yat ame olwoŋo ni algum, karacel kede gweŋe ame lilia me wel apipim.

¹¹Bao-nono abaka Culeman te bedo tic kedgi me citep i ot a Rwot kede i ot abaka. Otio daŋ i naŋa kede naŋa opuk pi jo ame wero; ame moro a rom kedgi rik mom ru onen i lobo me Juda luŋ.

¹²Abaka Culeman te miyo abaka adako me Ceba jami luŋ ame rik omito; omie ginnoro luŋ ame en openyo, kun omedo iye gin amerrom i gin ame en okelo baŋe. Eka abaka adako me Ceba kede jo mere te doŋ dok i lobo mere me Ceba.

¹³Abaka Culeman rik nwoŋo jabu abup meicel ame kato tan pyeraryo wie abic twal i mwaka acel acel.

¹⁴Man nwoŋo mom okwano iye en ame bino i baŋ ocatwil me paco kede me lobo a aoko, kede me en ame ya i baŋ obakki me lo bo Arab, kede en ame gabuna mere ame loo lobo apapat kelo baŋe.

¹⁵Culeman rik daŋ otio kwode adoŋo ame romo mia aryo, kun otio gin luŋ kede jabu ame oteto anyul; ame kwot acel acel odonyo iye jabu ame buco romo ratili pyeraryo.

¹⁶Dok te tiyo daŋ kwode atino mege mia adek kun daŋ otio gin luŋ i jabu, dok daŋ otetogi kede anyul, ame kwot acel acel odonyo iye jabu ame pekkere buco romo ratili apar. Abaka rik te ketogi luŋ i ot ame olwoŋo ni. Buŋ me Lebanon.

¹⁷Abaka Culeman dok otio daŋ kom loc adwoŋ, kun otio i lak lyec, te mwono kome luŋ i jabu ame olio aber.

¹⁸Kom locono rik tye kede citep abicel, kede kom jabu me teno tyen, ame okubo i kom kommono. I ŋete tuni kede tuni ote keto iye atenciŋ, kun cal eŋatu aryo ocuŋ i ŋet bad kom me teno ciŋ,

¹⁹dok daŋ tye iŋatu ocele apar wie aryo ame ocuŋ i agikki citep abicel-ca, tuŋŋi kede tuŋŋi. Mom tye kommoro ame abaka moro otio a cal i kommono.

²⁰Ikopo abaka luŋ rik otio i jabu keken, kede jami luŋ ame rik otio kedgi i Buŋ me Lebanon, gin luŋ rik otio i jabu ame olio aber meicel. I kare a Culeman ryal onwoŋo obedo ginnoro ame mom otamo pire.

²¹Abaka daŋ rik tye i lwak mel ame woto Tarcic karacel kede mel a Kuram. Mel me Tarcic rik onwoŋo dwogo paco i mwaka adek adek kun okelo jabu, ryal, kede lak lyec, karacel ayom kede abim.

²²Abaka Culeman rik obedo twon abaka moro ame alonyo dok ryek ame kato obakki ocele luŋ.

²³Obakki me wi podo luŋ obedo kede mit me bino baŋe, me bino winyo kit ryeko ame Obaŋa onwoŋo omie.

²⁴Ŋat acel acel ame rik bino baŋe, kelle mot a kitgi papat, acalo jami ame otio i ryal kede en ame olio i jabu, kede boŋŋi me aruka, odok murra kede gin a ŋwece kur, aguragura kede kanne adoŋo mege; man rik timere mwaka i mwaka.

²⁵Abaka Culeman rik onwoŋo doŋ tye kede aguragura ame romo tutumia aŋwen iyi awi mere, kun tye i gadigadi lweny karacel kede jo ame riŋo kedgi ame romo tutumia apar wie aryo. Mogo i akinagi rik bedo i boma ame ogwoko iye gadigadi kun en ocele bedo baŋ abaka i Jerucalem,

²⁶En rik oloo obakki luŋ cakere i Efurate tuno kede i lobo a jo Piriciti, kede i waŋ lobo me Miciri.

²⁷I kare-naca abaka rik omio ryal odoko ginnoro a pire mom dit ame twero nwoŋere baŋ jo luŋ i Jerucalem calo gweŋ, kun daŋ bao cedar dwoŋ atata i Jerucalem calo olam ame tye i bar ame Cepela,

²⁸Culeman rik onwoŋo aguragura mere i lobo Miciri kede i loba ducu.

²⁹Kop ocele luŋ odoŋŋere i kom Culeman kede gin ame en otio, cakere i acakki tuno kede i agikki mere, ame mom ocoo kan, otyeko coyo luŋ i buk me Tekwaro ame adwarpiny Natan ocoo, dok daŋ tye i akina kop Obaŋa ame Akija dano me Cilo otyeto, kede i buk ame mako kop i kom gin ame Iddo aran-piny oneno ame mako kop i kom Jeroboam wot a Nebat.

³⁰Culeman obedo abaka ame loo jo Icrael luŋ i Jerucalem pi mwakki pyeraŋwen.

³¹En oto te wot weo karacel i kwari mere, oyiko kome i paco a pappere Daudi. Wode Rekoboam te cako loc kakare.