Read lango Ejira 3 Bible Online

Ejira 3 - lango bible

Ejira 3

¹Kare ame dwe me abiro doŋ oromo, ikwae a jo Icrael onwoŋo doŋ tye obedo oko i bomagi. Gin luŋ rik ote bino cokere i i Jerucalem i cuny acel,

²eka Yecua wot a Yekojadak, karacel kede olamdog owote mere, kede Jerubabel wot a Cealtiel karacel kede wati mere, ote cako gero keno lam me yalo Obaŋa a jo Icrael, me ocak yalo iye Obaŋa i mot awaŋa kite ame ocoo kede i buk a Muca ame obedo dano Obaŋa,

³Kadi bed gin rik onwoŋo tye kede lworo i kom jo ame rik onwoŋo bedo i lobo-nono, cite gin ogero keno lam kakare ame rik onwoŋo tye iye con. Gin rik dok te cako yalo Rwot iye i mot awaŋa, kun oyale odiko kede otyeno.

⁴Gin te bedo kwero ecuban me gonye kite ame rik onwoŋo ocoo kede piny, ote daŋ bedo yalo Rwot i mot awaŋa i wel ame ociko me nino acel acel.

⁵Medo i kom mannono, gin dok te bedo miyo mot aŋola ame owaŋo alutu nino i nino kede mot ame oyalo i kare me por dwe kede en ame oyalo i Rwot i kare me ecuban adoŋo mege ame ociko pirgi luŋ, kede mot ame dano acel acel mio baŋ Rwot kite ame cunye mito.

⁶Kadi bed jo Icrael rik mom ru ocako gero ot a Rwot, cite gin ocako yalo Rwot i mot awaŋa i nino dwe acel me dwe me abiro.

⁷Jo Icrael rik te miyo lim baŋ opaa kiddi kede opaa bao, kun omio daŋ cam kede gigi mogo me amata, kede moo me acwala baŋ jo Cidon kede jo Turo me wilo yen cedar i Lebanon, ame rik omio beo i nam naka i Jopa. Man rik otimo pi twer ame Kuro abaka me Pacia omiogi.

⁸I dwe me aryo me mwaka me aryo ame gin odwogo kede i Jerucalem kan ame rik ot Obaŋa tye iye, en ame gin ogeo iye tic. Jerubabel wot a Cealtiel kede Yecua wot a Yekojadak, kede jo ocele mege, karacel olamdog kede jo Levi, kede jo luŋ ame rik odwogo iyi opii, gin luŋ ocako ticcono. Jo luŋ ame mwaka me ditogi oromo pyeraryo wot kede malo, oketogi me loyo tic ame i ot a Rwot.

⁹Yecua kede awobe mere kede wati mere, Kadmiel kede awobe mere, ame gin jo me doggola Odavia, gin luŋ rik onotte karacel i loyo tic ame otio i ot a Rwot, kun oribere karacel i jo me doggola a Kenadad, ame gin daŋ obedo jo Levi.

¹⁰Kare ame ogedo ocako gero acakki te ot a Rwot, olamdog ame oruko rukgi i komgi ote bino cuŋ i nyim, kun omako apel me akuta, kede jo Levi me doggola Acap, kun omako ajaa. Gin te cako pako Obaŋa kite ame rik Daudi, abaka me Icrael ocikogi kede.

¹¹Gin te bedo wero wer me pako Rwot kun oleo alea, opake kede dok daŋ opwoc kede ni, “Pien en gire ber, pien marrere a mom lokere bedo nakanaka i kom jo Icrael.” Jo luŋ te wo kun ŋat acel acel redo i dwon aloŋo, pako kede Rwot, pien acakki me te ottere doŋ oketo oko,

¹²Olamdoggogo oteggo kede jo Levi kede odoŋe atekere ame rik onwoŋo oneno ot Obaŋa me agege, gin luŋ okok atek i kare ame otye ka gero acakki te ot a Rwot anyennere-nono. Cite i caa-nono jo ocele gire onwoŋo tye awo kede yomcuny.

¹³Man omio kare-nono mom onwoŋo tye ŋattoro ame twero poko dwon me koko kede dwoŋ me yomcuny, pien wo onwoŋo dwon okato kare ame winyere i kannabor meicel.