Read lango Ejira 4 Bible Online

Ejira 4 - lango bible

Ejira 4

¹Kare ame okwor a jo Juda kede Benjamin owinyo ni jo Icrael ame odwogo iyi opii tye ka gero ot a Rwot Obaŋa me Icrael,

²gin owoto baŋ Jerubabel kede baŋ odoŋe ame loo doggola a kwarigi, ote wot kobbigi ni “Wan daŋ omito nywako kedwu tic me gero ot a Rwot. Wan daŋ oworo Obaŋa ame wun iworo wunu, wan obedo yale kede mot aŋola con meicel cakere i kare ame abaka Ecaraddon me Acuria ocwaowa me bino bedo kan.”

³Eka Jerubabel, kede Yecua kede odoŋe ame loo doggola a kwarigi te gamo kopgi ni, “Wan mom oye ni wun ikonywa wunu kede tic me gero ot a Rwot Obaŋawa. Wan obino gero ot pire kenwa, kite ame abaka Kuro me Pacia ocikowa kede.”

⁴Jo ame rik onwoŋo bedo i lobogi, te dok cako balo cuny jo Juda, kun omiogi lworo me medde i ticgi,

⁵owilogu oticcogo adoŋo ame mio abaka tam me mi juk ticgi oko, Man obedo timere i kare me loc a Jerubabel tuno naka i kare a Dario, abaka me Pacia.

⁶Eka i acakki me loc Akacuwera, jo ame bedo i lobo-nono te kelo pido ame ocoo acoa i kom jo ame bedo i Juda kede i Jerucalem.

⁷I kare me loc Atakerec, jo magi, Bicilam kede Mitireda kede Tabeel karacel kede owotegi ocele, gin luŋ ocoo waraga baŋ Atakerec, abaka me Pacia. Waraga man rik ocoo i leb Aram me wek ote gonyo agonya i kare me kwano.

⁸Medo i kom mannono, Rekum ame obedo akony gabuna kede Cimicai ame rik obedo aran te coyo waraga man baŋ Atakerec, abaka me Pacia, kun okobo kop i kom Jerucalem.

⁹Waraga man oya ibaŋ Rekum, akony gabuna kede Cimicai, aran, ame gin ocoo karacel owotegi luŋ, oŋolkop, gabuna luŋ, odoŋe ocele me abumente, kede jo Pacia, jo Erek, jo Babublon kede jo Elam ame obedo Cuca,

¹⁰karacel kede lwak luŋ ame Ocinappar, twon aloc atek meicel rik okwanyo i lobogi, te bino miyogi bedo i lobo me Camaria ducu kede i lobo luŋ ame tye loka kulo me Euprate,

¹¹Man doŋ en kop ame tye i waraga ame gin ocoo baŋ Atakerec. “Baŋ abaka Akacwera, wan omironi ame tye loka kulo me Euprate, wan luŋ omoti.

¹²Doŋ aman wan omito ni yin adwoŋwa iŋe ni Ojudaya ame rik odwogo i bani kuno baŋwa kan, aman gin owoto oko i Jerucalem. Gin aman ocako gero boma me jem ca, ame en boma me timo timmogo areco. Gin aman doŋ tye agero apama cel ame daŋ doŋ ceggi tum oko.

¹³Yin adwoŋ myero iŋe ni ka ce boma ni ogere otum, ame apama mere doŋ otum odoco, jo iye mom doŋ bino medde gelo ocoro, lim me lakoro jami ame bino i lobogi kede en ame gin cwao i lobo ocele, akadi kit lim ocele luŋ ame gin culo iyi cao abumente, mannono bi no miyo lim ame bino i cao abaka dok oko piny.

¹⁴Doŋ kite acalo wan obedo jo ame kwo i ciŋi yin adwoŋ, pe bedo ber ka wan oliŋ aliŋa aboŋo titti, kun wan oneno kite ame otye ka nywari kede,

¹⁵me imi yeny koppere i bukkogo ame kwarini yam obedo coyo iye kop otimere. Wan oŋeo ni ce imio otimo amannono, ibino niaŋ ni boma man yam con obedo boma me jem kede me timo tim areco, ame obedo yelo wi obakki apol meicel kede me oloc ocele, dok daŋ ibino niaŋ ni ayela obedo timere i boma man cakere con. Mannono en ame omio rik ote babalo en boma-nono oko,

¹⁶Wan oniaŋ ni ka ce boma man bino gerre tum, ame apama mere doŋ otum odoco, yin gire mom dok ibino nwoŋo ginnoro i lobo luŋ ame tye tuŋ loka kulo Euprate.”

¹⁷Abaka rik te dok i waraga-nono kit man: “Baŋ Rekum, akony gabuna, kede Cimicai, aran, kede owotewu luŋ ame bedo i Camaria, kede i lobo ocele luŋ ame tye loka kulo Euprate. Amotowu ducu.

¹⁸Doŋ waragawu ame icwao wunu baŋa, otyeko kwano luŋ i nyima kun ogonyo aber.

¹⁹Atyeko ciko me yenyo kop ame ikobo wunu, aman daŋ doŋ atyeko ŋiyo buke luŋ, onwoŋo ni boma-nono cakere con onwoŋo obedo boma ame jo iye maro jem i kom obakki, jem kede ayela apapat obedo timere iye.

²⁰Dok aniaŋ ni obakki mogo ame tek meicel obedo loyo Jerucalem kede lobo ducu ame tye loka kulo Euprate, kun daŋ orao ocoro kede kit lim ocele ame donyo iyi cao abumente.

²¹Man omio doŋ myero iket wunu cik me jo-nono juk gedogi-nono oko tuno waŋ ame cikka okato oko.

²²Myero inen ni itimo wunu man oyot, pe myero mi lim ame bino i cao abaka bale.”

²³I kare ame okwano waraga man ame oya i baŋ abaka Atakerec i nyim Rekum kede Cimecai, aran kede owotegi luŋ, gin ote ya oyot wot baŋ Ojudaya ame tye i Jerucalem ote wot juko ticgi oko kun odiogi kede tek acalo jo ame tye kede twer.

²⁴Tic i kom ot Obaŋa ame tye i Jerucalem koŋ te cuŋ oko; tic ocuŋ naka i mwaka me aryo me loc a Dario, abaka me Pacia.