Read lango Ejira 5 Bible Online

Ejira 5 - lango bible

Ejira 5

¹I kare-nono odwarpiny magi te cako rabo kop Obaŋa baŋ Ojudaya me Juda kede me Jerucalem, kun otito i nyiŋ Obaŋa me Icrael ame en onwoŋo loogi; odwarpinnyono ene: Kagai kede Jekeria wot Iddo.

²I kare ame Jerubabel wot a Cealtiel kede Yecua wot a Yekojadak owinyo kop ame gin orabo-nono, gin dok te cako gero ot Obaŋa ame tye i Jerucalem, odwarpiny aryo-nono daŋ te cako konyogi.

³I kare-nono en ame Tattenai gabuna me lobo ame tye loka kulo Euprate, kede Cetar-bojenai, karacel kede oloc wadgi obino kede baŋgi te penyogi ni, “Ŋa omiowu twer me gero ot man kede me keto jami iye?”

⁴Gin dok te penyo nyiŋ jo luŋ ame rik onwoŋo tye i ka konyo tic me gero ot Obaŋa.

⁵Ento Obaŋa onwoŋo tye aneno otel Ojudaya, mannono omio odoŋe me Pacia-nono mom ojuko ticgi, tuno waŋ ame koŋ ocwao kop baŋ abaka Dario, dok tuno ka en doŋ odwoggo kop baŋgi i waraga.

⁶Man en kop ame Tattenai gabuna me lobo ame tye loka kulo Euprate, kede Cetar-bonjenai karacel kede owotegi ocwao baŋ abaka a Dario,

⁷kun ocoo kop luŋ i waraga kit man: “Baŋ abaka Dario, kuc obed kedi.

⁸Adwoŋ, wan omito miyi ŋeyo ni wan owoto naka i Juda, ote tuno naka i ot Obaŋa adwoŋ, Wan onwoŋo otye ka gero ottaca, kun otye agero kede twoni kiddi adoŋo meicel kede bao ame oririo i wi apama ot cel luŋ. Ticcere jo tye atiyo i twon diro meicel, dok tye awot aber meicel.

⁹Wan openyo otel me tic me gedo-nono ŋat ame omiogi twer me medde kede gedogi kede keto jami iye.

¹⁰Openyo daŋ nyiŋ jo ame onwoŋo tye atic i gedo-nono ame mio oromo titti jo ame onwoŋo tye atelo ticgi-naca.

¹¹Gin ogamo kopwa ni gin gigi obedo omiro Obaŋa ame oketo polo kede lobo, dok gin otye ka gero ot a Rwot ame rik ogero con i kare abaka moro me Icrael ame rik onwoŋo obedo twon lo moro atek meicel.

¹²Cite kwarigi rik te miyo akemo mako Obaŋa me polo i komgi, ame te miyogi i ciŋ abaka Nebukadnejar me Babulon, i ciŋ jo Kaldaya; gin te babalo ot a Rwot oko, ote daŋ tero jo oko iyi opii i Babulon.

¹³Icennere i mwaka me agege me loc abaka Kuro me Babulon, en ame en omio iye cik ni myero dok cak tic me gero ot Obaŋa man.

¹⁴Dok daŋ ni en Kuro acellono rik omio baŋ Cecibajar aloc ame en oketo me loyo Juda jami luŋ ame otio i jabu kede ryal, ame rik abaka Nebukadnejar oyako i ot Obaŋa i Jerucalem ote tero wot keto i ot woro obaŋe me Babulon.

¹⁵Abaka rik omio jami-nono baŋe kun kobbe ni myero en ter i ot Obaŋa ame tye i Jerucalem, te cikke ni myero en ger ot Obaŋa kakare ame rik onwoŋo tye iye con.

¹⁶Mannono rikte miyo Cecibajar bino cako gero acakki te ot Obaŋa i Jerucalem, doŋ cakere i kare-naca tuno kede i kare-ni jo tye gero ot man, cite mom ru gire otum.

¹⁷Man omio wan okwai, yin adwoŋ, me temo yenyo i buke mogo acon me inen ka ce rik abaka Kuro ociko ateni ni myero ger ot man me yin ite miyowa ŋeyo tammi i kom gedo man.”