Read lango Ejira 6 Bible Online

Ejira 6 - lango bible

Ejira 6

¹Abaka Dario rik dok te miyo cik ni yeny kop man i Babulon i buke ame ogwoko iye kop otimere ame tye i ot kano gin kodi buke-nono, ame ote daŋ yenyo.

²Ento rik ote nwoŋo buk ame ocoo iye koppono i boma me Ikbatana ame tye i Media, kun kop ame ocoo iye tye kit man:

³“I mwaka me agege me loc a Kuro, en Kuro omio cik ni dok ger ot Obaŋa ame rik koŋ onwoŋo tye i Jerucalem, me bed kan ame oyalo iye Obaŋa i mot apapat me awaŋa kede me aŋola. Borrere malo myero bed futi pyeraboŋwen, laccere daŋ futi pyeraboŋwen.

⁴Apama myero bed me kiddi ame ocano i yore adek kede bao yore acel i wigi malo, lim me cul me tic man bino ya iyi cao abumente.

⁵Jami me jabu kede me ryal ame rik abaka Nebukadnejar oyako i ot Obaŋa i Jerucalem te kela i Babulon myero daŋ mi dwok oko cen i ot Obaŋa ame tye i Jerucalem, kun acel acel i akinagi odwoko i kabedo mere ikome. Myero iketgi i ot Obaŋa.”

⁶Dario te dok kit man: “Baŋ Tattenai, gavuna me lobo ame tye loka kulo Euprate. Cetar-bojenai kede oloc wadwu luŋ ame tye kuno,

⁷Wun myero ijer wunu teŋe, iwek wunu tic me gero ot Obaŋa wot anyim aboŋo ridde iye; wek wunu oloc Ojudaya kede odoŋe atekeregi medde gigi i ticgi me gero ot Obaŋa kakare acon.

⁸Medo i kom mannono, an aketo cik ame mako gin ame myero wun iti wunu i kom odoŋe atekere Ojudaya i ticgi me gero ot Obaŋa. Myero cul jo man oyot pi gin luŋ ame mitte, kun limmere ya iyi cao abumente ame orao i baŋ lo luŋ ame tye loka kulo Euprate.

⁹Ginnoro ocele luŋ ame mitte acalo twoni, rommi, itino rommi me yalo Obaŋa me polo i mot awaŋa, onyo naŋo, kado, kede kono olok, akadi moo ame olamdog me Jerucalem mito; wun myero imi wunu jami-nono luŋ baŋgi aboŋo keŋ,

¹⁰me gin obed miyo baŋ Obaŋa me polo mot me kweyo cunye kare luŋ, kun okwao pire kede pi awobena, me komwa bed ayot.

¹¹Dok amedo keto cik ocele ni, ka ŋat a mom olubo cik man obino turo bao ame orio i wi ode oko, ote wito wie bedo abit, ote rwake iye. Ode bino doko wi odur.

¹²Obaŋa ame rik oyero Jerucalem me bedo kan ame myero wore iye myero oret abaka moro keken onyo rok ame mom bino lubo cik man, kun otemere me balo ot Obaŋa ame tye kuno. An Dario en aketo cik man. Cik man myero lub aber odoco.”

¹³Kare ame gabuna Tattenai, Cetarbonjenai kede oloc wadgi owinyo kop ame abaka Dario ocwao baŋgi, gin oru timo oyot gin ame en ociko luŋ.

¹⁴Odoŋe atekere Ojudaya te medde i ticgi me gedo aber meicel, kun lubo kop ame odwarpiny Kagai kede Jekeria wot Iddo orabo. Gin te tyeko gedo me gero ot Obaŋa kite ame Obaŋa me Icrael ociko, kun gin olubo cik abaka Kuro kede abaka Dario kede abaka Atakerec oketo, ame gin luŋ obedo obakki me Pacia.

¹⁵Gero ot man otum i nino dwe adek me dwe me Adar, i mwaka me abicel me loc abaka Dario.

¹⁶Eka jo Icrael, olamdog, Olevi, kede jo ocele mege luŋ ame rik odwogo iyi opii te kwero ot Obaŋa i twon yomcuny adwoŋ meicel.

¹⁷I kare me kwero-nono gin omio twoni mia acel, nyogi rommi mia aryo, itino rommi mia aŋwen me aŋola, kede nyogi dyegi apar wie aryo me aŋola me mot me bal a jo Icrael luŋ, kun acel acel tye pi atekere acel acel.

¹⁸Dok ote keto daŋ olamdog kede Olevi i dog ticgi me tic baŋ Obaŋa i Jerucalem, kite ame ocoo kede i buk a Muca.

¹⁹Eka i nino dwe apar wie aŋwen me dwe me agege, jo Icrael ame odwogo iyi opii te kwero ecuban me Kato.

²⁰Olamdog luŋ kede Olevi luŋ onwoŋo doŋ otyeko lonyere oko kengi, gin luŋ onwoŋo doŋ odoko jo acil, en omio gin doŋ te neko itino rommi me kwero ecuban me Kato, kun oneko pi jo luŋ, pi olamdog kede pirgi gin kengi.

²¹Jo Icrael luŋ ame odwogo iyi opii obedo camo cam me kwero ecuban me Kato karacel, kede ŋat acel acel ame doŋ otyeko weko tim me kwer a jo ame onwoŋo bedo i lobo-nono te notte kedgi me woro Rwot Obaŋa me Icrael.

²²Gin te bedo kwero ecuban me ogati a tobi mom iye pi nino abiro, kun otye kede yomcuny; pien Rwot onwoŋo doŋ oyomoro cunygi, dok onwoŋo daŋ omio cuny abaka me Acuria odwogo i komgi, ame omio okonyogi tics me gero ot Obaŋa, ame obedo Obaŋa a jo Icrael.