Read lango Ejira 7 Bible Online

Ejira 7 - lango bible

Ejira 7

¹Icennere, ame kare doŋ okato alalac, i kare ame Atakerec abaka me Pacia, rik onwoŋo tye lo moro ame nyiŋe Ejira, ame kwari mere tye kit man: Ejira obedo wot a Ceraya, Ceraya wot Ajaria, Ajaria wot a Kilkia,

²Kilkia wot a Callum, Callum wot a Jadok, Jadok wot Akitub, Akitub wot Amaria,

³Amaria wot Ajaria, Ajaria wot a Merayot,

⁴Merayot wot a Jerakia, Jerakia wot a Uji, Uji wot a Bukki,

⁵Bukki wot Abicua, Abicua wot a Finekaci, Finekaci wot Eleajar, eka Eleajar te bedo wot Aron ame obedo alamdog adwoŋ.

⁶Ejira rik obedo apwony cik ame ŋeo cik a Muca atek meicel, cik ame rik Rwot Obaŋa me Icrael omio baŋ Muca. Winyo Obaŋa rik onwoŋo tye i kome, omio abaka rik mie jami luŋ ame en okwao i baŋe, Ejira rik te ya i Babulon wot Jerucalem,

⁷kun woto karacel kede jo Icrael mogo ame i akinagi tye iye olamdog kede Olevi, ower wer i ot Obaŋa, jo ame gwoko doggola ot Obaŋa, kede jo mogo ame tio ticcogo apek i ot Obaŋa, Man otimere i mwaka me abiro me loc Atakerec, abaka me Pacia.

⁸Gin rik oya i Babulon i nino dwe acel me dwe me agege.

⁹Obaŋa obedo konyogi, omio gin te tuno i Jerucalem i nino dwe acel me dwe me kany.

¹⁰Ejira rik onwoŋo ojalo kare mere luŋ i pwonyo cik a Rwot, kun daŋ tiyo kite ame cik kobo, dok daŋ pwonyo cik kede icwil luŋ baŋ jo Icrael.

¹¹Abaka Atakerec rik omio waraga baŋ Ejira, alamdog, apwony cik ame opwonyere meicel i cik a Rwot kede gin ame Obaŋa ociko, baŋ jo Icrael. Waraga ame omie ocoo kit man:

¹²“Waraga man oya i baŋ Atakerec abaka obakki luŋ baŋ Ejira, alamdog, apwony cik Obaŋa me polo.

¹³Aman an doŋ atyeko keto cik i lobo ame an aloo luŋ, mi jo Icrael luŋ, olamdog, Olevi ame mito, myero yeyigi me wot kedi i Jerucalem.

¹⁴An abaka karacel kede jo abiro ame mia tam, ocwai me iwot iyeny kop i kom Jerucalem kede Juda, inen ka jo tye alubo cik Obaŋa kuno kite ame otyeko miyo kede i ciŋi.

¹⁵Ibino tero mot me jabu kede me ryal ame an karacel kede jo ame mia tam mito miyo baŋ Obaŋa me Icrael, ame ot me wore tye i Jerucalem.

¹⁶Myero daŋ iter ryal kede jabu luŋ ame irao i lolo me Babulon luŋ karacel kede mot ame jo Icrael, kede olamdoggi okwoŋo pire kengi me miyo kite a cunygi omito pi ot Obaŋagi ame tye i Jerucalem.

¹⁷“Myero daŋ iti wunu i lim man aber, iwil wunu kede twoni nyogi rommi kede itino rommi, kede moko kwon kede mot amatagi, eka ite yalo kede Obaŋa i wi keno lam ame tye i ot Obaŋawu ame tye i Jerucalem.

¹⁸Ryal kede jabu ame odoŋere itwero tic wunu kede i yore ame itamo wunu ni ber, cite myero iti wunu kede i yore ame Obaŋawu mito,

¹⁹Jami luŋ ame omi me tic i ot Obaŋawu i Jerucalem myero iwot imi wunu ducu i nyim Obaŋawu.

²⁰Ginnoro ducu ame ibino mito pi ot Obaŋawu, ibino nwoŋo i kom lim abumente.

²¹“An abaka Atakerec aketo cik man, kun aciko kede okan lim me lobo luŋ ame tye loka kulo Euprate me miyo jami luŋ oyot baŋ Ejira, alamdog ame obedo acoo cik Obaŋa me polo; myero mi baŋe jami luŋ ame en omito,

²²tuno ka oromo ryal ame pekkere romo talanta mia acel, kede naŋo puku mia aŋwen, kede koŋo olok debe mia aryo, moo debe mia aryo, kede kado ame en bino mito.

²³Ginnoro luŋ ame mitte pi ot Obaŋa me polo myero inen wunu ni ocobere kite ame omito kede, naka imio wunu akemo make i koma kede ikwaena ame bino loc iŋea.

²⁴Dok daŋ kur imi wunu jo magi cul ocoro: olamdog, jo Levi ower, ogwok doggola ot Obaŋa, jo atio ticcogo apek i ot Obaŋa, kede jo ocele mege ame tio tic apapat i ot Obaŋa.

²⁵“Dok yin Ejira, kite acalo Obaŋani omio yin itye kede ryeko, myero yin iketo oŋolkop atino kede en adoŋo mege, me gin bed jo ame ŋolo kop a jo luŋ ame tye loka kulo Euprate, jo luŋ ame ŋeo cik Obaŋawu; dok jo a mom ŋeo daŋ myero ipwonygi me ŋeyo.

²⁶Jo luŋ ame mom woro cik Obaŋawu kede cik abaka, myero ru keto can apek i komgi, acalo can me to, ryemogi oko i lobo, yako jamigi luŋ, onyo keto i ot kol.”

²⁷Ejira okobo ni, “Pak wunu Rwot Obaŋa a kwarowa! En omio abaka cuny acalo man, me keto kwogo i kom ot a Rwot ame tye i Jerucalem.

²⁸Pi mar mere a mom lokere ame en oketo i koma omio en omio abaka opwoa, karacel kede oticere adoŋo luŋ, kede jo ame mie tam. Obaŋa omia tekcuny, te miya loko tam otellego me Icrael me wot keda.”