Read lango Ejira 8 Bible Online

Ejira 8 - lango bible

Ejira 8

¹Magi en odoŋ atekere me Icrael ame onwoŋo loo doggola a kwarigi ame rik onwoŋo tye i yi opii i Babulon eka te dwogo karacel kede Ejira i Jerucalem i kare ame Atakerec onwoŋo abaka;

²Gercom obedo atel wi jo me doggola a Finekaci, Daniel obedo atel wi jo me doggola Itamar. Katuc wot a Cekania, obedo atel wi jo me doggola a Daudi.

³Jekaria obedo atel wi jo me doggola a Paroc, ame rik obino kede jo me doggolagi ame romo mia acel kede pyerabic, wel jogi oŋeo pien onwoŋo ocoo piny.

⁴Eliekoenai, wot a Jerakia, obedo atel wi jo me doggolagi mia aryo.

⁵Cekania wot a Jakajiel obedo atel wi jo me doggola a Jattu; en onwoŋo tye kede jo me doggolagi mia adek.

⁶Ebed wot a Yonacan, obedo atel wi jo me doggola Adiŋ, ame onwoŋo tye kede jo me doggolagi pyerabic.

⁷Jecaya wot Atalia, obedo atel wi jo me doggola Elam, ame onwoŋo tye kede jo me doggolagi pyerabiro.

⁸Jebadia wot a Miceal, obedo atel wi jo me doggola a Cepatia, ame onwoŋo tye kede jo me doggolagi pyeraboro.

⁹Obadia wot a Jekiel, obedo atel wi jo me doggola a Yoab, ame onwoŋo tye kede jo me doggolagi mia aryo kede apar wie aboro.

¹⁰Celomit wot a Jocipia, obedo atel wi jo me doggola a Bani, ame onwoŋo tye kede jo me doggolagi mia acel kede pyerabic nono.

¹¹Jekaria wot a Bebai, obedo atel wi jo me doggola a Bebai, ame onwoŋo tye kede jo me doggolagi pyeraryo wie aboro.

¹²Jokanan wot a Kakatan, obedo atel wijo me doggola Ajigad, ame onwoŋo tye kede jo me doggolagi mia acel kede apar.

¹³Otel ame obino icen karacel kede jogi ame romo pyerabicel obedo Elipelet, Jeuel kede Cemaya, ame gin luŋ obedo otel wi jo me doggola Adonikam.

¹⁴Eka Utai kede Jacur te bedo otel me doggola a Bigvai, ame onwoŋo tye kede jo me doggolagi pyerabiro.

¹⁵Acoko jo-nono luŋ karacel i dog kulo ame mol dok tutuŋ boma me Akaya, obedo kuno nino ame romo adek. Kare ame abedo ŋiyo jo luŋ karacel kede olamdog, mom onwoŋo dano moro ame obedo dano me doggola a jo Levi.

¹⁶Man omio acwalo kop alwoŋo otel magi: Eliejer, Ariel, Cemaya, Elnatan, Jarib, Elnatan, Natan, Jekaria kede Meculam, karacel kede Joyarib kede Elnatan ame gin aryo-ni rik obedo jo ame tye i ŋec atut meicel.

¹⁷An rik ate cwayo jo man baŋ Iddo, adwoŋ ame onwoŋo loo jo ame bedo i Kacipia, kun a kobbigi gin ame myero owot okob baŋ Iddo kede owote mere ame rik onwoŋo tye i Kacipia ame gin rik obedo jo ame tio ticcogo apek i ot woro Obaŋa. En ocikogi ni myero wot kobbigi ocwal jo ame bino tic i ot Obaŋa ame tye i Jerucalem.

¹⁸Pi kica a Rwot Obaŋawa omio gin jo-naca ocwayiwa Cerebia, ame rik en obedo twon lo moro aryek meicel i tic, Alevi me doggola a Mali; en obino kede jo me doggolagi-nono apar wie aboro, kun awobe mere daŋ tye iye.

¹⁹Dok ote cwayiwa daŋ Kacabia kede Jecaya, ame obedo jo me doggola a Merari, ame obino kede jo me doggolagi-nono pyeraryo nono, kun awobegi daŋ tye iye.

²⁰Medo i kom jo-nono, gin ocwayiwa daŋ jo ocele mia aryo kede pyeraryo nono, ame gin luŋ obedo jo ame tio ticcogo apek i ot woro Obaŋa, jo ame rik Daudi kede omiro mege adoŋo omio ni myero kony jo Levi kede ticgi. Gin luŋ rik otuco nyiŋgi.

²¹Kare ame otye i dog kulo me Akaya kuno, arabo kop me kanyo kec, wek omwolle kenwa i nyim Obaŋawa, kun okwae me telowa kede gwokowa i wo twa, wan karacel kede itinowa, kede jamiwa luŋ,

²²Pien lewic rik omaka me kwayo abaka me miyowa ocirikale kede wegi aguragura me gwokowa i yo i kom okworwa, pien an rik onwoŋo atyeko kobbe ni Obaŋawa mio gum baŋ jo luŋ ame gene, ento akemo make, dok daŋ keto can i kom jo luŋ ame ya oko i baŋe.

²³I kare-nono wan ote kanyo kec, kun okwae me gwokowa i wotwa, en daŋ te winyo kwacwa.

²⁴I akina olamdog rik ate yero Cerebia kede Kacabia, kede dok odoŋe ocele apar,

²⁵eka ate pimo ryal kede jabu, jami tic, kede mot luŋ ame abaka, jo amie tam, kede jo Icrael luŋ omio me tic i ot a Rwot; apimo ate miyo luŋ baŋ olamdog,

²⁶Jami ame amiogi ene: ryal ame pekkere romo talanta mia abicel kede pyerabic, jami ame otio i ryal mia acel ame pekgi romo talanta mia acel, kede jabu ame pekkere romo talanta mia acel,

²⁷kede tabbi ame otio i jabu pyeraryo nono, ame acel acel i akinagi pekkere romo ratili apar kede tabbi me mola aryo ame ber dok cil, ame welgi rom aroma i me jabu.

²⁸An rik ate kobbigi ni, “Wun ibedo wunu jo acil i nyim Rwot, kede jami man luŋ daŋ cil; ryal kede jabu daŋ obedo mot ame ŋat acel acel oyero gire kene te miyo baŋ Rwot Obaŋa a kwariwa,

²⁹Gwok wunu aber naka ka gin luŋ otuno i Jerucalem. I kuno obino pimogi luŋ i nyim alamdog adwoŋ, kede jo Levi karacel odoŋe ame loo doggola akwariwa, ame tye i Jerucalem, kun opimo icikka ame tye i ot a Rwot.”

³⁰Mannono te miyo olamdog kede jo Levi cako gwoko ryal kede jabu ame opimo, kede jami luŋ me tic ame omiogi, ote tero luŋ wot keto i ot Obaŋawa ame tye i Jerucalem.

³¹Wan ocako ya i dog kulo me Akava me wot i Jerucalem i nino dwe apar wie aryo me dwe me agege. Rwot Obaŋawa obedo bedo kedwa kun gwokowa i ciŋ okworwa ame a cobo mony i komwa, kede en ame obedo libowa iyo,

³²Kare ame otuno i Jerucalem, owe koŋ pi nino ame romo adek.

³³I nino me aŋwennere ote wot i ot a Rwot Obaŋawa ote pimo ryal kede jabu, kede jami tic ote miyogi luŋ i ciŋ Meremot, wot a Uria, ame en rik obedo alamdog, Jo ocele ame onwoŋo daŋ tye kede obedo Eliajar wot a Finekaci kede jo Levi aryo, Jojabad wot a Yecua, kede Noadia wot a Binnui.

³⁴Okwano jami luŋ, ote pimo pekgi, ote daŋ coyo oko piny.

³⁵I kare-nono jo luŋ ame rik onwoŋo odwogo iyi opii i Babulon oyalo Rwot Obaŋa me Icrael kede mot awaŋa. Gin oyalo Rwot kede twoni apar wie aryo pi jo Icrael luŋ, nyogi rommi pyeraboŋwen wie abicel, itino rommi pyerabiro wie abiro, kede dyegi apar wie aryo ame omio me kwanyo bal i komgi. Leyi magi luŋ gin oyalo i Rwot me mot awaŋa,

³⁶Gin otero kop ame rik abaka ocoo te miyogi, ote wot miyo baŋ oloc kede gabuna ame abaka oketo me loyo lobo ame tye loka kulo Euprate; gin te bedo miyo kony baŋ lwak kede ot a Rwot.