Read lango Nekemia 1 Bible Online

Nekemia 1 - lango bible

Nekemia 1

¹Man obedo kop a Nekemia wot a Kakalia. I dwe me Kiclevi, i mwaka me pyeraryo me loc abaka Akacwera, an Nekemia onwoŋo atye i boma adwoŋ me Cuca.

²Kanani ame obedo ŋat acel i akina omegona obino baŋa kede jo mogo ame en oya kedgi i Juda, an ate penyogi kop i kom Ojudaya ame odwogo iyi opii karacel kede kite ame Jerucalem tye kede.

³Gin te kobba ni jo i kuno ame odoŋ, ame odwogo ceŋ i lobogi, tye kede peko adwoŋ meicel, kun lewic makogi okato kare, dok ni apama cel me Jerucalem orete oko piny, dok kika dogcel luŋ mac daŋ owaŋo oko,

⁴I kare ame awinyo kop man abedo piny ate cako koko oko. Abedo kumo pi kare alac kun mom acamo ginnoro, Amedde kwayo Obaŋa me polo kun akobo ni,

⁵“Ama Rwot Obaŋa me polo yin ibedo twon Obaŋa adwoŋ meicel dok ame iyiliyili. Yin gire igwoko gin ame iciko dok mar meri mom lokere baŋ jo ame mari, kun olubo gin ame iciko.

⁶Nena ba, ama Rwot, yab yiti iwiny kwacca an amironi ame akelo i nyimi dyeceŋ kede dyewor pi omironi ame gin obedo jo Icrael. Atuco balwa i nyimi, ame wan jo Icrael obalo i nyimi. Nen ba, an karacel kede jo luŋ me ot a kwarina otyeko balo i nyimi.

⁷Wan obedo timo gin arac meicel i nyimi, kun daŋ mom omako cik meri luŋ. Okwero lubo icwilli kede gin ame rik iciko baŋ amironi Muca.

⁸Tim ber ipo kop ame rik ikobo baŋ Muca ni, ‘Ka ce mom ibedo wunu ame igena wunu, abino keketowu oko i akina orok.

⁹Cite ka ibino ŋut wunu ite lokere wunu dwogo baŋa, ite gwoko wunu gin ame aciko kun daŋ iketo wunu i tic, abino dwogowu cen i kabedo kan ame atyeko yero me bedo kan ame obino wora iye, kadi bed onwoŋo itye wunu iyi agikki me lobo.’

¹⁰“Ama Rwot, man obedo omironi ame gin joni ikokome. Yin en ame rik ilakorogi i twon tekoni adwoŋ kede ciŋi atek.

¹¹Tim ber, ama Rwot, icik yiti iwiny kwacca kede kwac omironi ocele luŋ ame cunygi tye i komi, Tim ber tin imia gum, me dano man bed kede kica i koma.”