Read lango Nekemia 11 Bible Online

Nekemia 11 - lango bible

Nekemia 11

¹I kare-nono otel a lwak onwoŋo bedo i Jerucalem, jo ocele mere luŋ rik te bolo kwir me kwanyo dano acel i kom jo apar apar me bedo i boma acil me Jerucalem, kun jo aboŋwen odoŋ bedo i boma ocele mege.

²Lwak te pwoyo jo luŋ ame omiye pirgi kengi me bedo i Jerucalem.

³Magi en nyiŋ jo adoŋo me Juda ame obedo i Jerucalem. Ento i boma luŋ me Juda, dano acel acel onwoŋo bedo i lobo mere, i bomagi. Jo onwoŋo bedo kuno, onwoŋo tye olamdog, Olevi, kede jo ame onwoŋo tio ticcogo apek i ot Obaŋa, karacel kede ikwae omiro a Culeman.

⁴Aco jo me itekere a Juda kede me a Benjamin ame onwoŋo bedo i Jerucalem ene, kun geye kede jo me atekere a Juda: Ataya wot a Ujjia ame obedo wot a Jekaria wot Amaria, wot a Cepatia, wot a Makalalel, ame gin luŋ obedo ikwae a Perej,

⁵Maceya wot a Baruk, ame obedo wot a Kolkoje, wot a Kajaya, wot Adaya, wot Joyarib, wot a Jekaria, ame gin luŋ obedo ikwae a Cela.

⁶Ikwae a Perej ame obedo i Jerucalem, rik welgi romo mia aŋwen kede pyerabicel wie aboro, kun gin luŋ obedo jo ame tye aber meicel.

⁷Eka jo me itekere a Benjamin te bedo Callu wot a Mecullam, ame obedo wot a Joel, wot a Pedaya, wot a Kolaya, wot a Maceya, wot Itiel, wot a Jecaya;

⁸kede dok Gabbai kede Callai, ame gin obedo wati a Callu. Gin luŋ rik welgi romo mia aboŋwen kede pyeraryo wie abiro.

⁹Ŋat ame loogi onwoŋo obedo Joel wot a Jikri, kede Juda wot Acenua en onwoŋo obedo adwoŋ ame lubo ŋat ame loo boma.

¹⁰Magi en olamdog ame onwoŋo bedo i Jerucalem: Jedaya wot a Joyarib, kede Jakin,

¹¹Ceraya wot a Kilkia kede dano ame onwoŋo obedo wot a Mecullam, wot a Jadok, wot a Merayot, wot Akitub ame rik en ŋat ame loo ot Obaŋa,

¹²karacel kede omegogi ame rik tio tic i ot Obaŋa, gin luŋ rik welgi romo mia aboro kede pyeraryo wie aryo; Adaya wot a Jerokam, wot a Pelaya, wot Amiji, wot a Jekaria, wot a Pacur, wot a Malkija,

¹³karacel kede omegogi ame obedo otel me doggola a kwarigi gin luŋ rik oromo mia aryo kede pyeraŋwen wie aryo; kede dok Amacai wot Ajarel, wot Ajai, wot Mecillemot, wot Immer.

¹⁴Jo me doggola-ni rik tye iye jo ame romo mia acel kede pyeraryo wie aboro, ame gin luŋ obedo jo ame tek meicel i lweny. Adwoŋ ame onwoŋo loogi ducu onwoŋo obedo Jariel wot Aggedolim.

¹⁵Magi en jo Levi ame onwoŋo bedo i Jerucalem: Cemaya wot a Kacub, ame obedo wot Ajirikam, wot a Kacabia, wot a Bunni;

¹⁶Cabbetai kede Jojabad, ame gin onwoŋo obedo odoŋe ame loo jo Levi ame onwoŋo tio oko i dyekal me ot Obaŋa;

¹⁷Mattania wot a Mika, ame obedo wot a Jabdi, wot Acap, En rik obedo ŋat ame telo wer i kare me miyo pwoc baŋ Obaŋa, Pakbukia onwoŋo obedo ŋat ame lubo Mattania wot a Mika, kede Abda wot a Cammua, wot a Galal ame obedo wot a Jedutun.

¹⁸Jo Levi luŋ ame onwoŋo bedo i Jerucalem, i boma acil, rik welgi romo mia aryo kede pyeraboro wie aŋwen.

¹⁹Magi en ogwok doggola ot Obaŋa ame onwoŋo bedo i Jerucalem: Akkub, Talmon kede watigi ame welgi luŋ romo mia acel kede pyerabiro wie aryo.

²⁰Jo ocele luŋ me Icrael, olamdog odoŋŋege kede jo Levi, rik bedo i boma ocele me Juda, kun ŋat acel acel bedo i lobo mere ame rik opokke,

²¹Jo ame rik tio ticcogo apek i ot Obaŋa rik bedo i Jerucalem kan ame olwoŋo ni Opel, kun odoŋe ame loogi bedo Jiba kede Gicpa.

²²Alo jo Levi luŋ ame rik bedo i Jerucalem rik obedo Uji wot a Bani, wot a Kacabia, wot a Mattania, wot a Mika, ame gin luŋ obedo jo me doggola Acap, ame doggola mere rik obedo ower i ot Obaŋa,

²³Pien cik abaka rik onwoŋo tye ame mako ower i ot Obaŋa, kite ame doggola acel acel myero le kede ticgi me telo wer nino i nino.

²⁴Petakia wot a Mecejabel, ame obedo dano me doggola a Jera, me atekere a Juda, ame en rik awaŋ abaka me Pacia i kop ame mako lwak.

²⁵Jo apol rik onwoŋo bedo i akina myere, kun obedo ceggi kede pottigi me pur. Jo me atekere a Juda rik bedo i Kiriat-arba, Dibon kede i Jekajel kede i pacci ame tye i ŋetgi.

²⁶Dok daŋ obedo i boma me Yecua, Molada, Bet-pelet,

²⁷kede i Kajaracual kede i Beerceba, kede i pacci ame tye i ŋetgi.

²⁸Obedo daŋ i Jiklag, kede i Mekona, kede i pacci ame tye i ŋetgi,

²⁹kede i En-rimon, i Jora, Jarmut,

³⁰Janoa, Adullam, kede i pacci ame tye i ŋetgi, Dok obedo daŋ i Lakic kede i akina potti ame tye i ŋetgi kede i Ajeke karacel kede pacci ame tye i ŋetgi. Man cimo ni jo me Juda rik obedo i lobo ame tye i akina Beerceba wot kede naka i luŋ a Kinnom, ame tye i ŋet Jerucalem.

³¹Jo me atekere a Benjamin rik te bedo i boma magi: Geba, Mikmac, Aija, Betel, kede pacci ame tye i ŋetgi,

³²Anatot, Nob, Anania,

³³Kajor, Rama, Gittaim,

³⁴Kadid, Jeboim, Neballat,

³⁵Lod kede Ono, kede i luŋ otet.

³⁶Jo Levi mogo ame rik onwoŋo bedo i Juda obin omedo i kom jo Benjamin.