Read lango Nekemia 12 Bible Online

Nekemia 12 - lango bible

Nekemia 12

¹Magi en olamdog kede jo Levi ame rik odwogo iyi opii i Babulon karacel kede Jerubabel wot a Cealtiel, kede alamdog adwoŋ Yecua. Gin ene: Ceraya, Jeremia, Ejira,

²Amaria, Malluk, Kattuc,

³Cekania, Rekum, Meremot.

⁴Iddo, Ginnetoi, Abija,

⁵Mijamin, Madia, Bilga,

⁶Cemaya, Joyarib, Jedaya,

⁷Callu, Amok, Kilkia, kede Jedaya. Magi en ame rik obedo olamdog ame loo owotegi i kare adwoŋi Yecua.

⁸Jo Levi ene: Jo me agege-ni obedo jo ame rik loo tic me telo wer me pwoyo Obaŋa i ot Obaŋa, Yecua, Binnui, Kadmiel, Cerebia, Juda, kede Mattania,

⁹Eka Bakbukia, Unno kede owotegi te cuŋ tikere kedgi i ot woro Obaŋa.

¹⁰Yecua rik obedo papa a Joyakim, Joyakim te nywalo Eliacib, Eliacib te nywalo Joyada;

¹¹Joyada te nywalo Yonacan, eka Yonacan te nywalo Jaddua.

¹²I kare ame Joyakim rik onwoŋo tye acalo alamdog adwoŋ, jo magi en ame onwoŋo tye acalo odoŋe ame loo doggolagi i kom olamdog, Meraya, ame onwoŋo loo doggola a Ceraya, Kanania, ame onwoŋo loo doggola a Jeremia;

¹³Mecullam, ame onwoŋo loo doggola Ejira, Jekokanan, ame onwoŋo loo doggola Amaria;

¹⁴Yonacan, ame onwoŋo loo doggola a Malluki, Yucepu, ame onwoŋo loo doggola a Cebania;

¹⁵Adna, ame onwoŋo loo doggola a Karim, Kelkai, ame onwoŋo loo doggola a Merayot;

¹⁶Jekaria, ame onwoŋo loo doggola a Iddo, Mecullam, ame onwoŋo loo doggola a Ginneton;

¹⁷Jikri, ame onwoŋo loo doggola Miniamin, Piltao ame onwoŋo loo doggola a Moadia;

¹⁸Cammua, ame onwoŋo loo doggola a Bilga, Yekonacan, ame onwoŋo loo doggola a Cemaya;

¹⁹Mattenai, ame onwoŋo loo doggola a Joyarib, Uji, ame onwoŋo loo doggola a Jedaya;

²⁰Kallai, ame onwoŋo loo doggola a Callai Eber, ame onwoŋo loo doggola Amok;

²¹Kacabia ame onwoŋo loo doggola a Kilkia, kede Netanel, ame onwoŋo loo doggola a Jedaya.

²²Jo me doggola a jo Levi kede me doggola olamdog adoŋo rik obedo coyo piny i kare ame olamdog adoŋo magi onwoŋo tye i kom: Eliacib, Joyada, Jokanan kede Jaddua. Coyo nyiŋ man obin ogik oko i kare me loc a Dario, abaka me Pacia.

²³Odoŋe ame loo doggola a jo Levi rik ocoo nyiŋgi piny i buk adwoŋ me Tekwaro, kede naka i kare a Jokanan, ame obedo akwar Eliacib,

²⁴Odoŋe ame onwoŋo loo jo Levi ene: Kacabia, Cerebia, Yecua, kede Binnui, kede Kadmiel kede owotegi, gin onwoŋo obedo jo ame pako Obaŋa, kun oleo alea kite ame abaka Daudi, dano Obaŋa onwoŋo oyiko kede.

²⁵Aco Mattania, Bakbukia, Obadia, Mecullam, Talmon, kede Akkub onwoŋo obedo ogwok dogcel, kun ogwoko udi me kano jami ame onwoŋo tye i doggola me ot Obaŋa,

²⁶Man obedo timere i kare a Joyakim wot a Yecua, akwar Yekojadak, kede i kare a Nekemia, ame obedo gabuna, kede dok i kare Ejira, alamdgo ame obedo apwonycik Obaŋa.

²⁷I kare me kwero apama cel me Jerucalem, okelo Olevi luŋ i kan ame gin onwoŋo obedo iye, gin luŋ okelogi i Jerucalem, me obin okwer kare man i yomcuny kede pwoc adwoŋ meicel baŋ Obaŋa, kun owero wer, ogoo naŋa, ajaa kede naŋa opuk.

²⁸Jo Levi ame onwoŋo obedo ower luŋ te cokere i kabedo luŋ bino i Jerucalem, kun oya i kabedogi luŋ ame onwoŋo oguro Jerucalem, naka i pacci me Netopa,

²⁹kede i Bet-gilgal, Geba, kede i Ajimavet.

³⁰Olamdog kede jo Levi koŋ ogeo lonyere pirgi kengi eka ote lonyo lwak, kede dogcel luŋ, kede apama cel.

³¹Rik ate coko rwode luŋ me Juda i wi cel malo, ate keto jo dul aryo me wot mano boma kun omio pwoc baŋ Obaŋa, Dul me agege ociro i wi cel malo, kun odok tutuŋ dogcel ame olwoŋo ni dogcel me wi odur;

³²kun Kocaya lubo ŋegi karacel kede nucu oloc me Juda.

³³Olamdog magi ame onwoŋo tye akuto apel, te ciro lubogi: Ajaria, Ejira, Mecullam,

³⁴Juda, Benjamin, Cemaya kede Jeremia,

³⁵karacel kede awobe mogo ame obedo awobe olamdog, te daŋ lubogi kun okuto apel; i akinagi onwoŋo tye iye Jekaria wot a Yonacan, ame obedo wot a Cemaya, wot a Mattania, wot a Mikaya, kede Jakkur me doggola Acap;

³⁶wati mere en Jekaria te ciro lube, Cemaya, Ajarel, Milalai, Gilalai, Maai, Netanel, Juda, kede Kanani. Gin luŋ onwoŋo omako kite jami mogo me wer ame rik abaka Daudi, dano Obaŋa, goo, Ejira ame apwony cik Obaŋa en onwoŋo otelo nyim dul man.

³⁷I dogcel ame olwoŋo ni dogcel me Pii, gin owoto otiko nyimgi atira, kun oyito malo owoto i paco a Daudi, ote kato paco a Daudi oko, ote dok lokere i dogcel ame olwoŋo ni dogcel me Pii, ame tye tuŋ to.

³⁸Dul me aryo te ciro dok tutuŋ cam; an ate lubogi kede nucu a lwak, kun ociro i wi cel malo, Wan owoto okato kan kan ame ocuŋ malo iguŋ ame olwoŋo ni Ka tedo Ogati, tuno kede kan ame olwoŋo ni dogcel Alac.

³⁹Ote beo i ŋet dogcel ame olwoŋo ni dogcel me Epraim, tuno kede naka i dogcel ame olwoŋo ni dogcel Acon, kede en ame olwoŋo ni dogcel me Rec, kede i ot okato malo iguŋ ame olwoŋo ni Kananel, kede me Mia, ote tuno naka i dogcel ame olwoŋo ni dogcel me Rommi; ote wot giko wotwa i dogcel ame olwoŋo ni dogcel Okur piny.

⁴⁰Mannono en kite ame lwak ame onwoŋo opokere dul aryo kun omio pwocgi baŋ Obaŋa otuno te cuŋ kede i ot Obaŋa. Aco an onwoŋo atye karacel kede nucu odoŋe a lwak, kede

⁴¹olamdog magi, kun gin omako apelgi i cingi: Eliakim, Maceya, Miniamin, Mikaya, Elioenai, Jekaria, kede Kanania;

⁴²kede Maceya, Cemaya, Eleajar, Uji, Yekokanan, Malkija, Elam, kede Ejer. Ower te bedo wer, kun Jejrakia en ame tye acalo atelgi.

⁴³I nino-nono lwak te yalo Obaŋa kede mot adwoŋ meicel, kun olelo daŋ atek meicel, pien Obaŋa en omio cunygi obedo yom. Mon karacel kede itino daŋ cunygi obedo ayom meicel i nino-nono, Yomcuny ame onwoŋo jo tye kede i Jerucalem obedo winyere kan abor meicel.

⁴⁴I nino-nono rik ote yero jo ame loo icika ame ogwoko iye jami ame jo mio me konyo tic i ot Obaŋa, acalo cam ogeo cek me wi mwaka, kede acel me apar me jami luŋ, ame ocoko iye dul ame cik mito ni myero mi me konyo olamdog kede jo Levi, kun lubo wel potti ame tye i boma atino. Jo Juda rik te bedo i twon yomcuny adwoŋ meicel i kom olamdog kede jo Levi ame obedo tic.

⁴⁵Gin obedo tiyo tic ame Obaŋa omiogi, kede tic me lonyo lwak bedo acil. Ower kede ogwok doggola ot Obaŋa daŋ obedo tiyo ticgi kite ame rik Daudi kede wode Culeman ociko,

⁴⁶Pien i kare ame Daudi gin kede Acap, rik onwoŋo tye adwoŋ ame loo wer; i kare-naca onwoŋo ower wero wer me pako Obaŋa kede me pwoyo Obaŋa.

⁴⁷Aco i kare a Jerubabel kede i kare a Nekemia, jo Icrael luŋ onwoŋo mio motgi nino ducu me konyo jo ame wero i ot Obaŋa kede me konyo jo ame gwoko doggola ot Obaŋa. Lwak daŋ obedo miyo motgi mogo pi jo Levi, jo Levi daŋ te bedo miyo en ame rik omito pi ikwae Aron, ame gin obedo olamdog.