Read lango Nekemia 13 Bible Online

Nekemia 13 - lango bible

Nekemia 13

¹I kare ame onwoŋo otye ka kwano cik a Muca malo i nyim lwak, gin ocop i dul ame kobo ni jo Ammon onyo jo Moab mom bino donyo i cokere Obaŋa;

²pien gin rik mom ojolo jo Icrael i yo i kwon kede pii, i kare ame gin obino kun oya i Miciri, ento gin olunyo paŋo Balaam me bino cenogi, Cite Obaŋa rik te lunyo loko cennere naca doko gum.

³Kare ame jo owinyo okwano cik man, gin te cako pokere i jo luŋ ame obedo ikwae orok ame onwoŋo tye i akinagi.

⁴I kare ame kop man mom ru otimere, Eliacib alamdog, ame rik onwoŋo oketo me loyo icika me ot Obaŋa, omako dyere gin kede Tobia.

⁵En rik te yiko twon icika moro alac pi Tobia, icika ame rik koŋ onwoŋo ogwoko iye mot me moko kwon, odok luban, karacel kede jami ame otio kedgi i ot Obaŋa, kede acel me apar me kal, koŋo olok kede moo ame rik omio baŋ jo Levi, ower, kede baŋ ogwok doggola ot Obaŋa kite ame tye kede i cik, karacel kede gin ame omio baŋ olamdog.

⁶I kare ame gin man timere, onwoŋo an Nekemia mom atye i Jerucalem, pien i mwaka me pyeradek wie aryo me loc Atakerec, abaka me Babulon, an rik onwoŋo awoto oko baŋ abaka, A doŋ kare koŋ dok okato anonok, an rik ate kwayo i baŋ abaka,

⁷ate bino i Jerucalem, I kare-nono ate roto bal ame Eliacib onwoŋo otimo i kom Tobia, pi yikke icika acel me bedo mere i dyekal ame tye i ot Obaŋa,

⁸Akemo omaka atek meicel, omio ate bolo jami a Tobia luŋ ame onwoŋo tye iyi icika-naca,

⁹An ate miyo cik ni myero lony icika-naca bed acil; eka ote cako dwoko iye jami luŋ ame otio kedgi i ot Obaŋa, karacel kede mot me moko kwon kede me odok luban.

¹⁰Dok aroto daŋ ni jo Levi wi jo doŋ owil oko i komgi, mom dok omiogi dul ame onwoŋo ociko ni lwak myero mi baŋgi. Mannono te miyo jo Levi kede ower, ame onwoŋo tio tic, te ya wot oko, kun ŋat acel acel dok ceŋ i poto mere.

¹¹An ate da atek i wi odoŋe ame onwoŋo loo lwak, pi miyo weko ot Obaŋa ata, Ate cako coko jo Levi luŋ kede ower dwokogi ceŋ i dog ticgi.

¹²Jo me Juda luŋ te cako kelo acel me apar me kalgi, kede koŋo olokgi, kede moo iyi icika me kano jami,

¹³Dok ate keto jo i man i tic me gwoko jami ame okano i ot kano jami: Celemia, ame onwoŋo obedo alamdog, Jadok aran, kede Pedaya ame onwoŋo obedo Alevi. Dok ate keto daŋ Kanan wot a Jakur, ame obedo wot a Matania, me bedo dano ame konyogi, pien onwoŋo rik jo luŋ ŋeo aber ni jo ame eketo-nono obedo jo ame ogen. Gin rik te bedo tiyo tic me poko jami baŋ omegogi.

¹⁴Po pira, Ama Obaŋana, i kom tic man ame atio, kur ijwa tic abeco luŋ ame doŋ atyeko tiyo me yiko ot a Rwot Obaŋana, kede me yiko tic me wore.

¹⁵I kare-nono daŋ ate bedo neno ni jo apol me Juda tye ka biyo koŋo olok i ceŋ me cabit, kun jo ocele tye ka weko kal, koŋo olok, nyig olok, nyig oduro kede jami ocele apapat ame gin otweo i ŋe kana ote tero naka i Jerucalem, kun man daŋ otimo i ceŋ me cabitgi. Rik ate kwenyorogi daŋ i nino ame gin onwoŋo tye ka cato cam.

¹⁶Jo Turo mogo daŋ ame rik bedo i boma, obedo kela i Jerucalem rec kede kit jami ocele apapat me acata, ote catogi i ceŋ cabit baŋ jo Juda, kede i Jerucalem,

¹⁷Mannono te miyo akemo maka atek meicel i kom odoŋe me Juda, ate penyogi ni, “Man tim arac aŋo ame itye ka timo wunu-nie, ame itye ka pyedo wunu kede ceŋ me cabit?

¹⁸Kwariwa mom rik koŋ otimere kit man? Mom man en omio Obaŋawa kelo tim man areco-ni i komwa kede i kom boma man? Nen, wun pwod dok itye wunu ka medo akemo Obaŋa i kom jo Icrael pi bedo pyedo ceŋ me cabit.”

¹⁹An rik ate miyo cik ni i cabit ducu, i kare ame piny doŋ ceggi yuto, myero ceg dogcel luŋ, kun mom dok oyabo kadi acel, tuno ka nino me cabit doŋ okato. Eka ate keto jona mogo me kuro dogcel, me gin nen ni mom oyeo ginnoro otero i boma i nino me cabit.

²⁰Man omio tyen acel onyo aryo ocat wil kede jo ame cato jami ame kitegi papat obuto oko i ŋe boma me Jerucalem.

²¹Cite akwenyorogi, kun apenyogi ni, “Piŋo kara ibuto wunu i ŋet apama me cel? Nen ba, ka ce imedde timo wunu kittono, mom abino wekowu kadi acel.” Cakere i kare-nono, gin mom dok ote dwogo ceŋ i cen me cabit.

²²Eka ate ciko jo Levi ni myero gin olonyere kengi, ote wot kuro dogcel luŋ, me ogwok nino me cabit bed acil. Po pira, Ama Obaŋa a man daŋ, itim ber iweka koŋ abed kwo pi twon mar meri adwoŋ a mom lokere.

²³I kare-nono daŋ rik ate neno Ojudaya mogo tye ame onyomo anyira me Acidod, Ammon kede me Moab, odoko mongi,

²⁴Mannono omio nucu me itinogi onwoŋo doŋ kobo leb jo Acidod, kun mom dok otwero kobo leb jo Juda, cite okobo ka leb rok ocele.

²⁵Man daŋ omio awoto i komgi agwa meicel, ate cako cenogi kun opwodo jo mogo i akinagi, dok daŋ opuputo yer wi jo mogo; amiogi okwoŋo i nyiŋ Obaŋa, kun akobo ni, “Wun mom ibino miyo wunu anyirawu baŋ awobegi, dok daŋ mom ibino nyommi wunu awobewu anyiragi, akadi pi wun ikomwu.

²⁶Mom Culeman rik obalo pi bedo nyomo kodi monnono? I kom rok apapat me wi podo, onwoŋo mom tye abaka moro ame cal kede, dok daŋ rik Obaŋa mere mare. Obaŋa omio en obedo abaka ame loo jo Icrael; kadi bed amannono, anyira orok ame en obedo nyomo omio twon jo ame rom mannono opoto oko i bal.

²⁷Wun imito wunu ni wan owinywu, otim tim arac wok-ki, ote turo cik a Rwot Obaŋawa, kun onyomo wunu anyira arok ocele me bedo monwa?”

²⁸Dano moro acel i akina ikwae a Yekoyadi, wot Eliacib, alamdog adwoŋ, onwoŋo onyomo nyaka a Canbalat ame en dano me Koron, an rik ate ryemo dako mere-nono oko i baŋe.

²⁹Po pirgi, Ama Obaŋana, pien gin obalo nyiŋgi oko me bedo olamdog, dok daŋ obalo cikere ame onwoŋo tye i akina yin kede olamdog, kede jo Levi.

³⁰Mannono en kite ame alonyo kede jo Icrael i kom ginnoro luŋ ame onwoŋo obedo me orok, ate miyo tic olamdog kede jo Levi moko, kun ŋat acel acel tio ticcere.

³¹Dok ate yiko kite me kelo yen me waŋo mot me yalo Obaŋa, i kare ame myero kel iye, kede kite me kelo cam ogeo cek me wi mwaka. Tim ber ipo pi timo gin aber pira, Ama Obaŋana.