Read lango Nekemia 2 Bible Online

Nekemia 2 - lango bible

Nekemia 2

¹I kare-nono onwoŋo an en aloo tic me miyo koŋo olok i meja abaka. Doŋ i nino moro acel, i dwe me Nican, i mwaka me pyeraryo nono me loc abaka Atakerec, i kare ame en abaka onwoŋo tye acem, an ate tero koŋo olok i nyime. Yam onwoŋo mom ru onena i nyime kun waŋa oballe,

²omio en abaka te penya ni, “Piŋo kara waŋi oballe, kun inen dano ame kome yot? An atamo mom tye ginnoro ocele kono cunyi en a mom yom.” Lworo te maka meicel,

³ate gamo doge ni, “Kom abaka gire bed ayot! Kara waŋa mom twero nen i can i yore aŋo kun boma ame oyiko iye kom kwarina calo doŋ wi odur, dok kika me dogcel me boma luŋ mac owaŋo oko?”

⁴Abaka te penyo ni, “Kara aman doŋ yin ikwaya ni kono atimo ŋo piri?” Mannono omio an ate cwalo kwacca baŋ Obaŋa me polo,

⁵ate kobbi abaka ni, “Ka ce cuny adwoŋŋa twero bedo yom i koma, kun an amironi ayomoro cunyi, kono iye an awoto i lobo me Juda, ame en boma ame oyiko iye kom kwarina, me awot ager dok odoco.”

⁶Abaka te cako penya, kun onwoŋo agoŋŋere tye obedo i laŋete, ni, “Wotti-nono bino teri kare ame rom mene, dok ibino dwogo awene?” An ate titte kare, en te ye kede yomcuny ni myero an awot.

⁷An dok ate kwayo abaka ni myero mia waraga me ater baŋ oloc adoŋo ame tye loka kulo Euprate me gin ye an abed i lobogi tuno ka atuno i Juda,

⁸Dok ate kwaye daŋ ni myero en mia waraga me atera baŋ Acap, ame en onwoŋo obedo adwoŋ ame gwoko buŋ abaka, me en ye miya bao apol me tiyo kika me dogcel me boma kede me ot ame an abino bedo iye, Abaka te miya gin ame akwao luŋ, pien Obaŋana obedo konya.

⁹Abaka te miyo odoŋe mogo me mony karacel kede aguragura wot keda, ate wot naka i lobe ame tye loka kulo Euprate; ate miyo waraga ame abaka ocoo baŋ oloc adoŋo me kuno,

¹⁰Cite i kare ame Canbalat, dano me Koron, kede Tobia, dano me Ammon ame obedo amiro, owinyo ni dano moro tye ame obino pi tic pi jo Icrael, akemo omakogi meicel.

¹¹Awoto naka i Jerucalem ate wot bedo kuno nino adek.

¹²I dyewor, an karacel kede jo mogo anonok ate ya wot oko, kun onwoŋo mom ru atitti ŋattoro gin ame Obaŋa oketo i cunya ni atim i Jerucalem. Mom awoto i lee moro ocelo kono ka en ame rik an ariŋo kede keken.

¹³Awoto dyewor ame piny pwod col, kun abeo i dogcel ame olwoŋo ni dogcel me Luŋ, naka waŋ pii ame olwoŋo ni me Too kede i dogcel me wi odur. I kare-nono onwoŋo atye aŋiŋio apama cel me boma ame onwoŋo orette oko piny kede kika dogcel luŋ ame onwoŋo owawaŋo oko i mac.

¹⁴Ate dok lokere dok tutuŋ dogcel me waŋ akon kede Kut abaka. Cite lee ame abedo i wie mom te nwoŋo kannoro ame etwero beo iye.

¹⁵An ate doŋ lunere piny kun abeo i luŋ kuno aninio apama cel dyeworrono, Alokere adwogo kede nea i yo ame ogeo wot kede, ate donyo i boma i dogcel me Luŋ.

¹⁶Rwode mom omedo ŋeyo kwene ame onwoŋo awoto iye kede gin ano ame abedo tiyo kuno. I kare-nono onwoŋo mom ru amio kop man oŋeye baŋ Ojudaya, olamdog, jo adoŋo, rwode, akadi jo ocele ame bino tiyo tic man.

¹⁷An doŋ ate kobbigi ni, “Ityeko neno wunu peko ame wan otye kede, Jerucalem doŋ odoko calo wi odur, kun kika me dogcellere luŋ owan oko. Biye wunu, me ibin oger wunu apama cellere, me okwany wunu lewic i wiwa oko.”

¹⁸Ate tittigi kite ame Obaŋa obedo konya kede, kede gin ame abaka okobba. Lwak te gamo ni, “Ocak wunu doŋ ticcere oko.” Gin doŋ te cako yikere oko me tic,

¹⁹Cite i kare ame Canballat, Tobia kede Arabboro ame nyiŋe Gecem owinyo gin ame wan otimo, gin ocako nyerowa kun ocaowa acaa, ote kobo ni, “Man ŋo ame itimo wunu nie? Wun icako wunu jem i kom abaka bo?”

²⁰An ate gamo doggi ni, “Obaŋa me polo bino konyowa, wan omiro mere obino cako tic me gedo; cite wun mom itye wunu kede giwu moro akadi twerroro, onyo ginnoro me poyowu i Jerucalem.”