Read lango Nekemia 3 Bible Online

Nekemia 3 - lango bible

Nekemia 3

¹Man en kite ame rik ogero kede apama cel me Jerucalem, Alamdog adwoŋ Eliacib kede owote mere ame obedo olamdog, gin ogero dogcel ame olwoŋo ni dogcel me Romo, ote kwero oko pi tic acil, ote daŋ tiyo kika mere oko ducu; apama ame gin ogero-nono otuno naka kan ocuŋ iguŋ malo ame olwoŋo ni me Mia, kede dok naka kan ame ogero cuŋ iguŋ malo ame olwoŋo ni Kananel.

²Jo me Jeriko te gero megi lubo olamdog. Eka Jakur wot a Imri te gero mege lubogi.

³Jo me doggola a Kacena te gero megi cako i dog cel ame olwoŋo ni dogcel me Rec. Gin orio bao mere luŋ, ote keto daŋ kika mere luŋ kede bolti luŋ kede arii me cego.

⁴Meremot wot a Uria ame wot a Kakkoj te gero mege lubogi. Mecullam wot a Barakia ame wot a Mecejabel te lubogi. Jadok wot a Bana te gero mere lubogi.

⁵Jo ame bedo i boma me Tekoa te gero luba Jadok. Cite jo mogo ame doŋodoŋo me bomagi mom oye tiyo tic ame opokkigi.

⁶Joyada wot a Pacea, kede Mecullam wot a Becodeya te cako megi i dogcel ame olwoŋo ni dogcel Acon. Gin ogero apama mere ote riyo bao mere ducu, ote keto daŋ kika mere luŋ kede bolti luŋ, kede arii me cego luŋ.

⁷Jo olubogi te bedo Melatia, dano me Gibeon, Jadon, dano me Meronot, kede jo ame bedo i Gibeon kede Mijpa, ame gin luŋ rik otye i lobo ame onwoŋo tye loka kulo Euprata i te loc a gabuna me kuno,

⁸Ujjiel wot a Karkaya, atet jabu te gero mege lube; en ogero apama mere naka i kom apama alaccere.

⁹Repaya wot a Kur, ame onwoŋo loo nucu me dictrik me Jerucalem, te gero mege.

¹⁰Jedaya wot a Karunap te lubo Repaya, kun yika apama cel ame onwoŋo tye i nyim ode. Eka Kattuc wot a Kacabneya te lube.

¹¹Malkija wot a Karim te yiko mege lubo Kattuc, kun yiko gin kede Kaccub wot a Pakat-moab, ote yiko daŋ kan ame ocuŋ malo iguŋ ame olwoŋo ni ka tedo ogati.

¹²Eka Callum wot a Kallokec, ame onwoŋo loo nucu dictrik me Jerucalem tuŋ ocele te gero mege lubogi, kun anyira mere konye.

¹³Karum kede jo ame bedo i boma me Janoa te cako yiko apama cel i dogcel ame olwoŋo ni dogcel me Luŋ. Gin oyiko kika me dogcel kede bolti mere luŋ, kede arii me cego, ote yiko apama ame borrere romo yadi mia abic tuno kede naka i dogcel ame olwoŋo ni dogcel me wi odur.

¹⁴Malkija wot a Rekab, aloc me dictrik me Bet-akkerem te gero mege cako kede dogcel ame olwoŋo ni dogcel me wi odur. Oyiko kika me dogcel luŋ, kede bolti mege ducu, kede arii me cego.

¹⁵Callum wot a Kolkoje, aloc me dictrik me Mijpa te cako yiko apama cel i dogcel ame olwoŋo ni dogcel me Waŋ akoŋ. En owumo wie oko, te daŋ keto kika mege luŋ kede bolti mere luŋ karacel kede arii me cego ducu, En ogero apama me celo Kut me Cela ame tye i poto abaka, kato kede naka piny i rwom me wot piny i paco a Daudi.

¹⁶Nekemia wot Ajibuk, aloc me nucu dictrik me Bet-jur te yiko mege tuno kede naka i nyim lyel a Daudi, kede kut ame okunyo akunya kede udi me bedo a jo atek i lweny.

¹⁷Jo magi ame gin obedo jo Levi, gin daŋ okonyo tic me yiko apama cel me Jerucalem. I akinagi Rekum wot a Bani en ame te yiko apama ame olubo me a Nekemia. Eka Kacabia aloc me nucu dictrik me Keila, te yiko en ame olube, kun yiko pi jo me dictrik mere luŋ.

¹⁸Bavvai wot a Kenadad, aloc me nucu dictrik me Keila, te yiko en ame olubo mea Kacabia.

¹⁹Ejer wot a Yecua, aloc me Mijpa te lube, kun yiko apama ame tye i nyim kan ame oyito iye i ot me kano jami me mony, tuno kede naka i kona cel.

²⁰Baruk wot a Jabbai te yiko apama ame olubo mege, naka i doggola me donyo i ot Eliacib, alamdog adwoŋ.

²¹Meremot wot a Uria ame wot a Kakkoj te yiko dul ame olubo mea Baruk, tuno kede i agikki ot a Eliacib.

²²Olamdog magi daŋ okonyo tic me yiko apama cel me Jerucalem. Olamdog ame onwoŋo bedo i bar i ŋet Jerucalem en ame te yiko apama cel ame olubo.

²³Benjamin kede Kaccub te yiko en ame olubo me a jo-naca, apama ame onwoŋo tye i nyim udigi, Ajaria wot a Maceya ame wot Anania te yiko en ame olubo mege-nono, apama ame onwoŋo tye i nyim ottere en Ajaria,

²⁴Binnui wot a Kenadad en olubo mannono, cakere i nyim ot Ajaria tuno naka i kona.

²⁵Palal wot a Ujia te yiko en olubo mege-nono, cakere i kona, kede kan ame ocuŋ malo iguŋ, ame otikere i ot abaka ame tye tuŋ malo i dyekal akur piny. Pedaya te yiko apama cel ame olubo mannono,

²⁶karacel kede otic ame tio ticcogo apek i ot Obaŋa ame bedo i Opel; gin oyiko megi naka dogcel ame olwoŋo ni dogcel me Pii ame tye tuŋ kide tuno kede i ot okato malo iguŋ me kuro ot Obaŋa.

²⁷Jo me Tekoa te yiko apama cel ame olubo mea a Pedayagi, man obedo dulgi me aryo, apama cel ame otikere i twon ot okato malo iguŋ me kuro ot Obaŋa tuno naka i kom apama cel Opel.

²⁸Olamdog te yiko apama cel ame olubo mannono, kun alamdog acel acel yiko apama cel ame tye i nyim ode, ocako yiko i dogcel ame olwoŋo ni dogcel me Aguragura.

²⁹Jadok wot a Immer te yiko en olubo megi-nono, ame onwoŋo daŋ tye i nyim ode. Cemaya wot a Cekania, akur dogcel ame olwoŋo ni dogcel me tuŋ kide.

³⁰Kanania wot a Celemia, kede Kanun wot a Jalap me kanyape te yiko en olubo; man obedo dul me aryo ame gin oyiko. Mecullam wot a Berekia te yiko en olubo mea Kananiagi, ame onwoŋo tye i nyim kan ame en bedo iye,

³¹Malkija, atet jabu te yiko apama cel ame olubo mannono, wot kede naka i ot a jo ame tio ticcogo apek i ot Obaŋa kede i ot ocatwil, ame onwoŋo tye i ŋet dogcel okurpiny ceggi icika ame tye malo i kona,

³²Atet jabu kede ocatwil te yiko apama cel ame onwoŋo tye i akina icika ame tye i kona naka i dogcel ame olwoŋo ni dogcel me Rommi.