Read lango Nekemia 4 Bible Online

Nekemia 4 - lango bible

Nekemia 4

¹Kare ame Canballat owinyo ni wan Ojudaya ocako gero apama cel me Jerucalem, akemo omako meicel te cako cayowa.

²Eno caowa i nyim omego mere kede i nyim mony me Camaria, kun kobo ni, Man Ojudaya agoro-ni tye atimo ŋo kan? Jo man romo timo no? Gin otamo ni yalo Obaŋa twero miyogi otyeko ticgi-nono i nino acel? Gin dok oromo nwoŋo kiddi anyen i kom man oyido i wi odurir-ame mac doŋ otyeko balo?

³Tobia, dano me Ammon, rik daŋ onwoŋo ocuŋ i ŋete kuno; en daŋ te kobo ni, “Jo-nono twero gero apama acalladi? Ekwe amwa-ni ka obeo i wi apama celgi daŋ twero reto oko piny!”

⁴An Nekemia ate cako kwayo Obaŋawa, kun akwae ni, “Ama Obaŋawa, koŋ iwiny kite ame gin tye acayowa kede. Tim ber imi acaegi-nono dok gire i wigi; mi oyak jo yakgi oko, tergi i lobo ame obino bedo iye acalo opii.

⁵Kur iwum balgi kadi acel, kur daŋ imi balgi rweny i wigi; pien gin oroki kun omito ni akemo maki i nyim ogedo.”

⁶Wan giwa ote medde i gedowa naka ka apama luŋ oromere irit, kun borrere malo tye i nucu me maca acon ca Man otimere pien jo luŋ rik onwoŋo tye i cuny me tic.

⁷Cite i kare ame Canbali at kede Tobia, kede jo Arab, jo Ammon, kede jo Acidod owinyo ni ticwa tye awot anyim apwot apwota i gero apama me Jerucalem, dok ni ocako doŋ cuculo kan ame onwoŋo omumuka oko, akemo omakogi atek meicel.

⁸Gin te cako yiko kop i muŋ me bino cobo mony i kom Jerucalem, me obabalo cuny jo iye oko.

⁹Cite wan rik ote kwayo Obaŋawa, ote daŋ keto okur piny me kurogi dyeceŋ kede dyewor.

¹⁰Jo me Juda te cako kobo ni, “Teko a jo ame yec ociro doŋ ocako dok oko piny, Aco ka bedo amannono, yugi pwod dwoŋ meicel; man omio mom oromo tic i kom apama cel.”

¹¹Okworwa onwoŋo tye atamo ni wan mom obino nenogi, dok daŋ mom obino ŋeyo gin ame atimere i komwa, tuno ka gin doŋ otuno oko baŋwa, otye doŋ onekowa kun obalo ticwa oko.

¹²Kare luŋ Ojudaya ame onwoŋo bedo i akina okworwa obedo bino baŋwa tyen ame romo apar twal, kun otittiwa gin ame okworwa tye ka yiko i komwa.

¹³Mannono omio ate tero jona, kun gin luŋ omako jami lweny acalo pala, toŋi, kede atero, ote wot ketogi bedo i ŋe apama cel, kun obedo i doggola i doggola, kan ame mom ru ogero otum.

¹⁴Atiŋo waŋa malo ate ya malo, kobbi jo adoŋo kede rwode, kede lwak luŋ ni, “Kur ibed wunu kede lworo moro i kom okworwa. Po wunu ka i kom Rwot, ame en dit atek, dok daŋ iyiliyili a mom kobere, me ite lweny wunu atek pi omegowu, itinowu awobe kede anyira, kede pi monwu kede pacowu.”

¹⁵Okworwa rik te ŋeyo ni wan otyeko ŋeyo yikgi i komwa oko, ote niaŋ ni Obaŋa otyeko balo yikgi oko. Wan luŋ doŋ ote lokere dok ceŋ i ticwa me gero apama, kun ŋat acel acel dok i dog mege.

¹⁶Cakere i kare-nono nucu me lwak ame onwoŋo atye kede en ame te bedo tic, kun nucugi bedo okur piny ame tye kede jami lwenygi i cingi, acalo toŋi, kwode, atero, kede koti nyonyo me geno korgi, Otel te bedo cuŋ atek i ŋe jo Juda luŋ,

¹⁷ame onwoŋo tye agero apama cel me Jerucalem. Ŋat acel acel ame onwoŋo yeo jami me gedo, mako gin ame eyeo i ciŋe acel, kun jami lweny tye i ciŋe tuŋ ocele;

¹⁸dok ŋat acel acel i akina ogedo daŋ onwoŋo tye kede pala romo mere i pyere. Akut apel rik onwoŋo bedo i ŋeta.

¹⁹An onwoŋo akobbi odoŋe, rwode kede lwak luŋ ni, “Tic dwoŋ ame omio wan luŋ okeketa atata, ame ŋat acel acel mom ceggi awottere ame nwoŋo daŋ tye agero apama cel.

²⁰Doŋ ka ce iwinyo wunu apel okok, bin icokere wunu kan ame apel okok iyenono. Obaŋa bino lweny pirwa.”

²¹Mannono omio nino i nino, cakere ibai tuno ka acer doŋ odonnyo otyeno, nucu a lwak nwoŋo tye i tic me gero apama cel, kun nucuwa tye akuro piny i toŋŋi i ciŋgi.

²²I kare-nono onwoŋo doŋ akobbi lwak ni wan luŋ karacel kede jo ame konyowa luŋ myero wan ducu obed i Jerucalem dyewor, me okur boma dyewor, kun otio tic dyeceŋ.

²³An onwoŋo abuto kede boŋona i koma, karacel kede owotena, omirona kede jo ame gwoka, Wan luŋ onwoŋo obuto i toŋiwa i ciŋwa.