Read lango Nekemia 5 Bible Online

Nekemia 5 - lango bible

Nekemia 5

¹I kare-nono jo apol meicel, co kede mon, te cako koko agwa i kom Ojudaya owotegi.

²Jo ocele onwoŋo tye ame kobo ni, “Wan opol meicel i odwa myero onwoŋ kal me acama me obed kwo.”

³Jo ocele onwoŋo kok i, “Wan doŋ otyeko jeŋo pottiwa oko, kede poto olok, kede udiwa me nwoŋo cam pi kec.”

⁴Jo ocele mere kok ni, “Koŋ inen, wan doŋ otyeko koporo lim me culo ocoro abaka me pottiwa kede poto olokwa,

⁵Aco kono riŋo komwa rom gire aroma kede riŋo kom omegowa, itinowa daŋ rom aroma itinogi; koŋ inen wan otye ka diyo itinowa awobe kede anyira me doko opii, anyirawa ocele doŋ tye acalo opii; wan mom doŋ otye kede yo moro me konyere, pien pottiwa kede poto olokwa, gin luŋ ogamo oko i baŋwa.”

⁶Akemo omaka meicel i kare ame awinyo kokogi kede kop a lwak.

⁷Abedo lwodo kop man i cunya, ate nwoŋo ni bal tye i wi odoŋe, kede rwode, eka ate kobbigi ni, “Nen, itye ka nwoŋo wunu agoba, kun ŋat man nwoŋo i kom awottere.” An ate lwoŋo cokere adwoŋ me tyeko kop man,

⁸ate kobbi lwak ni, “Wan obedo timo gin ame oromo timo, wan obedo wilo omegowa ame obedo Ojudaya, jo ame onwoŋo ocatte kengi baŋ orok. Koŋ inen, aman dok wunu itye ka diyo omegowu me catte kengi, me dok ote catogi baŋwa!” Lwak te liŋ aliŋa, gin ame kono okob te loyogi oko.

⁹An ate kobbigi ni, “Gin ame itye ka timo wunu-nono mom gire ber kadi acel. Wun myero ibed wunu jo ame lworo Obaŋawa, kun itimo wunu gin ame en mito, me wek orok ame obedo okworwa, kur nwoŋ ginnoro ame myero gin ocawa iye.

¹⁰Koŋ inen wunu, an karacel kede watina kede omirona, otye ka miyo jo koporo lim kede kal i baŋwa. Aman doŋ myero owek wunu cuny me nwoŋo agoba oko, kur doŋ openy wunu.

¹¹Tin myero doŋ odwokkigi wunu pottigi i ciŋgi, poto olokgi, poto jeitunigi kede udigi ducu, Ginnoro luŋ ame ibedo gamo wunu i baŋgi acalo agobawu, lim, kal, koŋo olok, onyo moo, myero doŋ iŋol wunu oko i wigi.”

¹²Lwak luŋ te gamo ni, “Wan obino timo kite ame ikobo, obino dwoko jami luŋ baŋgi, dok daŋ mom obino medde gamo ginnoro i baŋgi.” An ate lwoŋo olamdog, jo luŋ te kwoŋ i nyimgi, ni obino lubo gin ame doggi okobo.

¹³An ate lamere kun ayeŋo boŋona akobo ni, “Ŋat ame mom bino lubo kwoŋ man, myero Obaŋa ryem oko i ode, kede i dog ticcere, kite ame ayeŋo kede boŋona-ni. Myero ryem danonono oko i kabedo mere, me kakare doŋ gire nono.” Lwak ame onwoŋo ocokere te gamo ni, “Ameri”, ote pako Rwot. Gin te bedo lubo gin ame doŋ otyeko ciko-nono.

¹⁴Medo i kom mannono, cakere i kare ame oketa iye, me bedo gabunagi i Juda, pi mwakki apar wie aryo luŋ, cakere i mwaka me pyeraryo me loc Atakerec tuno kede i mwaka mere me pyeradek wie aryo, an karacel kede watina mom giwa obedo gamo i baŋgi cam ame onwoŋo myero agam i baŋgi pi ticca acalo gabuna.

¹⁵Owotena ame ogeo bedo gabuna i lobogi-nono onwoŋo obedo miyo jo peko atek pi gamo cam kede koŋo olok nino i nino, kede dok cekel me ryal pyeraŋwen. Omirogi daŋ rik obedo miyo jo peko kittono. Cite an mom abedo timo kittono, pien onwoŋo alworo Obaŋa,

¹⁶An alunyo luŋo tekona luŋ i gero apama cel me Jerucalem, mom apenyo lobo moro me bedo acalo mega. Omirona luŋ onwoŋo bedo ka i tic me gero apama cel.

¹⁷Aco kono an onwoŋo acamo kede jo ame romo mia acel kede pyerabic i mejana, ame gin luŋ obedo Ojudaya kede rwodegi, kun man nwoŋo mom akwano iye orok ame bino baŋa i lobo ame onwoŋo tye i ŋetwa.

¹⁸I kare-nono rik onwoŋo aneko twon acel nino i nino, rommi abeco kanyape, kede gwen, dok i ŋe nino apar apar amio jo koŋo olok adwoŋ meicel. Kadi bed rik atimo man ducu, cite mom agamo lim ame onwoŋo myero mia acalo gabuna, pien jo onwoŋo tye kede peko meicel.

¹⁹Tim ber, ama Obaŋa, ipo pi ginnoro luŋ ame atimo pi jo man, itim gin aber pira.