Read lango Nekemia 6 Bible Online

Nekemia 6 - lango bible

Nekemia 6

¹Kare ame Canballat kede Tobia, kede Gecem, dano me Arab, kede okwor Ojudaya ocele mege owinyo ni wan doŋ otyeko gero apama cel me Jerucalem, kun mom dok tye kannoro ame doŋ twolo, kono onwoŋo mom ru oketo kika me dogcel i dogcel luŋ,

²Canballat kede Gecem te cwayo kop baŋa ni myero awot arwatte kedgi i paco moro i bar me Ono. Man onwoŋo yik ame gin onwoŋo tye kede me temo timarac,

³An rik ate dwokkigi kop kun akobbigi ni, “An atye atiyo ticcoro ame pire tek meicel ame mom atwero wot kuno kadi acel. Mom abino weko ticca-nono cuŋ ate wot kuno me wot rwatte kedwu.”

⁴Gin te bedo cwayo kwena baŋa pi tyen ame romo aŋwen twal, kun an daŋ adwokk igi kop acellono.

⁵Canballat dok te cwayo kop baŋa tyen me kannyere, kun omio amiro mere en ame okelo waraga ame mom orwako i baaca.

⁶Kop ame ocoo i yie onwoŋo tye kit man: “Kop tye ka winyere i baŋ rok ame bedo i ŋetwu, dok Gecem daŋ okobo kop acellono, ni mannono, yin karacel kede Ojudaya imito wunu jem; dok ni mannono en omio itye wunu ka gero apama cel me Jerucalem. Dok daŋ tye ka winyere ni yin imito kette keni me bedo abaka,

⁷dok daŋ ityeko doŋ yiko odwarpinnyogo oko me wot rabo pire i Jerucalem ni yin doŋ ibedo abaka me Juda, Aman ana ŋeo ni kop man bino tuno baŋ abaka adwoŋ, kite ame okobere kede-nono; man omio an atamo ni myero wan koŋ orwatte kedi me wek onyam koppere kedi.”

⁸An ate dwokke kop kun akobbe ni, “Kop ame yin ikobo-nono luŋ mom tye moro iye ame tye ateni. Nen calo yin giri iyikogi ayika piri keni.”

⁹Gin onwoŋo otye ka yenyo yo me poto cunywa, kun otamo ni ka lworo omakowa, wan obino doko goro, eka tic te loyowa oko, Cite aman doŋ yin Rwot, tim ber acuŋ atek.

¹⁰I kare-nono onwoŋo Cemaya wot a Delaya, ame obedo wot a Meketabel mom doŋ romo donyo oko i ode, Doŋ i kare ame an awoto limme, en te kobba ni, “Yin karacel kede an myero owot opon oko i kabedo acil i ot Obaŋa, ote cego doggola oko ducu, pien gin abino me bino neki oko, Gin gire abino neki oko dyewor.”

¹¹An agamo doge kun akobbe ni, “Itamo ni kodi an-ni daŋ myero ariŋ oko? Itamo ni ŋat acalo an-ni twero wot i ot Obaŋa pi laro kwona? An gira mom abino wot i ot Obaŋa.”

¹²I kare ame alwodo koppere-nono i cunya, aniaŋ ni Obaŋa mom onwoŋo okobo kede, cite Tobia kede Canballat onwoŋo owile oko me bita.

¹³Gin onwoŋo owile pi koppono, pien gin onwoŋo mito ni an abed lwor, ate cako timo tim me lworo ame mia atimo bal, eka gin doŋ ote cako miya nyiŋ arac, ote nwoŋo yo me caya.

¹⁴Ama Obaŋana, po pi gin ame Tobia kede Canballat otimo, me iket can i komgi. Po daŋ pi adwarpiny a dako Noadia kede odwarpiny ocele ame onwoŋo mito miya lworo.

¹⁵Tic me gero apama cel me Jerucalem rik te tum oko i nino dwe pyeraryo wie abic, i dwe me Elul.

¹⁶Kare ame okworwa ame orok a bedo i ŋetwa owinyo, lworo omakogi, ote niaŋ ni piny doŋ oloogi, pien ŋat acel acel onwoŋo ŋeo ni Obaŋa en obedo konyowa i ticwa-nono naka i tummere.

¹⁷Medo i kom mannono, i kare-nono Ojudaya onwoŋo obedo coyo waraga baŋ Tobia kun Tobia daŋ coyigi,

¹⁸Jo apol me Juda onwoŋo gene, pien onwoŋo okwoŋere kedgi, dok daŋ onwoŋo obedo orgi, pien onyomo nyaka a Cekania wot Arak, Dok wode Jekokanan onwoŋo onyomo nyaka a Mecullam wot a Berekia,

¹⁹Jo rik bedo titta pi gin abeco ame Tobia otimo, dok daŋ obedo tero baŋ Tobia ginnoro luŋ ame owinyo an akobo. Mannono omio en obedo cwaya waraga me poto cunya.