Read lango Nekemia 7 Bible Online

Nekemia 7 - lango bible

Nekemia 7

¹Kare ame doŋ otyeko yiko apama cel otum, ame aketo doŋ kika i doggi ducu, kun ogwok doggola ot Obaŋa, ower, kede jo Levi daŋ doŋ oketo oko,

²aketo jo aryo me loyo boma me Jerucalem; aketo omina Kanani, kede Kanania, me bedo ŋat ame loo cel luŋ me Jerucalem, pien en onwoŋo obedo dano ame genne atek, dok lworo Obaŋa kato jo apol.

³Acikogi me mom yabo dogcel me Jerucalem idiko con ame ceŋ mom ru okato malo, dok myero daŋ oceg oko con, ote tweyo daŋ doge oko kun okur pwod tye i ticgi. Acikogi daŋ me keto okurpiny i kom jo ame bedo i Jerucalem ikome, kun ŋat acel acel omio kabedo mere i nyim ode en ikome.

⁴Boma onwoŋo yie lac, cite jo ame onwoŋo bedo iye onwoŋo mom pol wok, dok udi ame ogero iye onwoŋo daŋ mom ru pol.

⁵Obaŋa te miya tam me coko odoŋe luŋ kede rwode ducu, karacel kede jo ducu, me akwan welgi kun acoo piny i doggola i doggola. Rik ate nwoŋo buk ame ocoo iye wel jo ame ogeo dwogo iyi opii, kun ocoo i doggola i doggola, gin ame onwoŋo ene:

⁶Magi gin jo me Juda ame rik oya iyi opii, kan ame rik abaka Nebukadnejar me Babulon oterogi iye acalo opii. Gin luŋ odwogo i Jerucalem kede i Juda kun ŋat acel acel dok ceŋ i boma me turgi.

⁷Otel ame owoto kedgi ene: Jerubabel, Yecua, Nekemia, Ajaria, Ramia, Nakamani, Bilcan, Miciperet Bigvai, Rekum kede Bana. Man, en wel a jo Icrael ame odwogo iyi opii.

⁸Jo me doggola a Paroc rik tye tutumia aryo, mia acel kede pyerabiro wie aryo,

⁹Jo me doggola a Cepatia te bedo mia adek kede pyerabiro wie aryo.

¹⁰Jo me doggola Arak mia abicel kede pyerabic wie aryo.

¹¹Jo me Pakat-moab, ame obedo jo me doggola a Yecua kede Yoab, te bedo tutumia aryo, mia aboro kede apar wie aboro.

¹²Jo me doggola Elam te bedo tutumia acel, mia aryo kede pyerabic wie aŋwen.

¹³Jo me doggola a Jattu te bedo mia aboro kede pyeraŋwen wie abic.

¹⁴Jo me doggola a Jakkai te dwogo mia abiro kede pyerabicel nono.

¹⁵Jo me doggola a Pinnui te dwogo mia abicel kede pyeraŋwen wie aboro.

¹⁶Jo me doggola a Bebai odwogo mia abicel kede pyeraryo wie aboro.

¹⁷Jo me doggola Ajigad te dwogo tutumia aryo, mia adek kede pyeraryo wie aryo.

¹⁸Jo me doggola Adonikam te bedo mia abicel kede pyerabicel wie abiro.

¹⁹Jo me doggola a Bigvai te bedo tutumia aryo, kede pyerabicel wie abiro.

²⁰Jo me doggola Adin te dwogo mia abicel, kede pyerabic wie abic.

²¹Jo me doggola Ater, ame obedo dano me doggola a Kejekia te bedo pyeraboŋwen wie aboro.

²²Jo me doggola a Kacum te dwogo mia adek, kede pyeraryo wie aboro.

²³Jo me doggola a Bejai odwogo mia adek kede pyeraryo wie aŋwen.

²⁴Jo me doggola a Karip odwogo mia acel kede apar wie aryo.

²⁵Jo me doggola a Gibeon odwogo pyerabonwen wie abic.

²⁶Jo ame rik kwarigi obedo i Beterekem kede i Netopa odwogo mia acel kede pyeraboro wie aboro.

²⁷Jo ame kwarigi obedo Anatot odwogo mia acel kede pyeraryo wie aboro.

²⁸Jo ame kwarigi obedo i Bet-ajimavet odwogo pyeraŋwen wie aryo.

²⁹Jo ame kwarigi obedo i Kiricit-jearim, Cepira, kede i Beerot odwogo mia abiro kede pyeraŋwen wie adek.

³⁰Jo ame kwarigi obedo i Rama kede i Geba odwogo mia abicel kede pyeraryo wie acel.

³¹Jo ame kwarigi obedo i Mikmac odwogo mia acel kede pyeraryo wie aryo.

³²Jo ame kwarigi obedo i Betel kede Ai odwogo mia acel kede pyeraryo wie adek.

³³Jo ame kwarigi obedo i Nebo ocele mere odwogo pyerabic wie aryo.

³⁴Jo ame kwarigi obedo i Elam ocele mere odwogo tutumia acel, mia aryo kede pyerabic wie aŋwen.

³⁵Jo ame kwarigi obedo i Karim odwogo mia adek kede pyeraryo nono.

³⁶Jo ame kwarigi obedo i Jeriko odwogo mia adek kede pyeraŋwen wie abic.

³⁷Jo ame kwarigi obedo i Lod, Kadid kede i Ono, odwogo mia abiro kede pyeraryo wie acel.

³⁸Jo ame kwarigi obedo i Cena odwogo tutumia adek, mia aboŋwen kede pyeradek nono.

³⁹Magi en ame obedo olamdog ame odwogo iyi opii; ikwae a Jedaya, me doggola a Yecua, odwogo mia aŋwen kede pyerabiro wie adek.

⁴⁰Jo me doggola Immer odwogo tutumia acel kede pyerabic wie aryo.

⁴¹Jo me doggola a Pacur odwogo tutumia acel, mia aryo kede pyeraŋwen wie abiro.

⁴²Jo me doggola a Karim odwogo tutumia acel kede apar wie abiro.

⁴³Magi en ame obedo jo Levi ame odwogo iyi opii: Jo me doggola a Yecua kede me a Kadmiel ame obedo ikwae Odavia te dwogo pyerabiro wie aŋwen.

⁴⁴Jo Levi ame rik ower, ame obedo ikwae Acap odwogo mia acel kede pyeraŋwen wie aboro.

⁴⁵Jo Levi ame rik obedo ogwok doggola ot Obaŋa, ame obedo ikwae a Callum, Ater, Talmon, Akkub, Katita kede ikwae a Cobai, odwogo mia acel kede pyeradek wie aboro.

⁴⁶Magi en ame obedo jo ame rik odwogo iyi opii i akina jo ame rik tio ticcogo apek i ot Obaŋa: jo me doggola a Jika, Acupa, Tabaot,

⁴⁷jo me doggola a Keroc, Cia, Padon,

⁴⁸jo me doggola a Lebana, Agaba, kede Calmai,

⁴⁹jo me doggola a Kanan, Giddel, kede Gakar,

⁵⁰jo me doggola a Reaya, Rejin kede Nekoda,

⁵¹jo me doggola a Gajam, Ujja, kede Pacea,

⁵²jo me doggola a Becai, Meunim, kede Nepucecim,

⁵³jo me doggola a Bakbuk, Akupa, kede Karkur,

⁵⁴jo me doggola a Bajilit, Mekida, kede Karica,

⁵⁵jo me doggola a Barkoc, Cicera, kede Tema,

⁵⁶jo me doggola a Nejia kede Atipa.

⁵⁷Magi en ame odwogo iyi opii i akina ikwae omiro ame rik tio baŋ Culeman: jo me doggola a Cotai, Acoperet, kede Perida,

⁵⁸jo me doggola a Jaala, Oarkon, kede Gidel,

⁵⁹jo me doggola a Cepatia, Kattil, Pokeret-kajebaim kede Amon.

⁶⁰Wel jo luŋ ame rik tio ticcogo apek i ot a Rwot, kede ikwae omiro ame rik tio baŋ Culeman, ame odwogo iyi opii rik romo mia adek kede pyeraŋwen wie aryo.

⁶¹Magi en ame obedo jo ame oya i Tel-mela, Tel-karica, Kerub, Addon, kede Immer; gin mom otwero nyuto doggola a kwarigi ame gin oya iye, ame twero cimo kannaler ka ce gin obedo jo Icrael.

⁶²Obino jo a Delaya, Tobia, kede jo a Nekoda; gin luŋ jo mia abicel kede pyeraŋwen wie aryo.

⁶³Medo i kom mannono, ikwae olamdog magi daŋ obino: jo me doggola a Kobaya, Kakkoj, kede me a Barjillai ame rik onyomo dako mere i akina anyira a Barjillai me Gilead, rik daŋ ote cako lwoŋe kede nyiŋ papa a cege-nono.

⁶⁴Otemo yenyo nyiŋ jo man ka ce rik onwoŋo tye i buk ame ocoo iye nyiŋ kwaro a jo Icrael, cite mom ote nwoŋo, omio ote kwanyo nyiŋgi oko i kom olamdog.

⁶⁵Gabuna rik te miyogi ŋeyo ni kite acalo gin ame nyuto ni gin obedo ikwae olamdog mom tye-ni, gin doŋ mom obino medde camo cam ame omio baŋ Obaŋa, tuno ka alamdoggoro tye ame romo penyo tam Obaŋa kun tio Urim kede Tumim.

⁶⁶Lwak luŋ ame rik odwogo iyi opii, rik romo tutumia pyeraŋwen wie aryo, mia adek kede pyerabicel nono,

⁶⁷kun mom okwano iye omirogi kede aŋecagi ame rik tye tutumia abiro, mia adek kede pyeradek wie abiro, karacel kede ower a co kede en a mon ame romo mia aryo kede pyeraŋwen wie abic.

⁶⁸Aguragura ame gin odwogo kede rik romo mia abiro kede pyeradek wie abicel, kede kane adoŋo mege ame romo mia aryo kede pyeraŋwen wie abic,

⁶⁹kede inaga mia aŋwen kede pyeradek wie abic, kede dok kane ocele tutumia abicel, mia abiro kede pyeraryo nono.

⁷⁰I kare-nono odoŋe mogo i akina odoŋe ame rik loo doggola a kwarigi te miyo lim me konyo tic. Gabuna adwoŋ me kuno te miyo jabu ame pekkere romo darik tutumia acel, kede becen pyerabic, kede boŋŋi me aruka olamdog mia abic kede pyeradek nono.

⁷¹Odoŋe ocele ame loo doggola a kwarigi te miyo jabu ame pekkere romo darik tutumia aryo nono, kede ryal ame pekkere romo mina mia aryo nono.

⁷²Eka jo ocele te miyo jabu ame pekkere romo darik tutumia pyeraryo nono, ryal ame pekkere romo mina tutumia pyeraryo nono, kede boŋŋi me aruka olamdog ame romo pyerabicel wie abiro.

⁷³Olamdog kede jo Levi, ogwok doggola ot a Rwot, ower, karacel kede jo ocele mege, jo ame tio ticcogo apek i ot a Rwot, karacel kede jo Icrael luŋ ame rik bedo i bomagi.