Read lango Nekemia 9 Bible Online

Nekemia 9 - lango bible

Nekemia 9

¹I nino dwe pyeraryo wie aŋwen me dwe acellono, jo Icrael dok ocokere karacel, kun okanyo kec, oruko boŋo cola, dok ojuko wigi kede kwoyo me nyuto cwercunygi pi balgi.

²I kare-nono onwoŋo jo Icrael opokere oko i kom orok. Gin ocuŋ acuŋa ote ca ko tuco balgi ame gin karacel kede kwarigi obedo timo.

³Pi caa ame romo adek twal, gin ocuŋ acuŋa kun jo okwano kop ame tye i buk me cik a Rwot Obanagi, eka dok pi caa adek ocele gin te bedo tuco balgi, ote woro daŋ Rwot Obanagi.

⁴Jo ame ocuŋ malo kan ame jo Levi cuŋ iye, obedo Yecua, Bani, Kadmiel, Cebania, Bunni, Cerebia, kede Kanani. Gin okwao Obaŋagi kun okwao kede dwon aloŋo.

⁵Jo Levi magi: Yecua, Kadmiel, Bani, Kacabnia, Cerbia, Odia, Cebania kede Petakia, en ame okobbi jo me kwayo Obaŋa, kun okobo ni, “Ya wun malo, me ipak wun RWOT, Obaŋawu; pake wunu tin kede waŋ i waŋ, Jo luŋ myero pak nyiŋi me kwogo, ama Rwot; kadi bed pak ame dano paki kede mom ginnoro kadi acel.”

⁶Ejira te cako kwayo Obaŋa kun kobo ni, “Yin gire, ama Rwot, en ibedo Rwot; yin gire en ame itio polo kede lwak acer luŋ iye. Itio daŋ lobo kede nam, kede jami luŋ ame tye i yigi; gin luŋ otye kede kwo piri; ginnoro luŋ ame tye malo i polo rumo piny wori,

⁷Ama Rwot Obaŋa, yin en ame rik iyero Abram, yin en ikwanye i lobo me Ur i Babulon, yin en ame iloko nyiŋe ni Iburaim.

⁸Yin rik inwoŋo ni en obedo ŋat ame geni i cunye luŋ, yin rik icikere kede. Rik iciko ni ibino miyo baŋ ikwae lobo me Kanan, kun imiogi daŋ lobo a jo Kitti, kede jo Amor, lobo a jo Periji, Jebuc kede me a jo Girgac. Yin ibin icobo gin ame iciko-nono luŋ, pien yin igenne.

⁹“Yin rik ineno kite ame owuno kede kwariwa i Miciri, rik iwinyo kokogi i Nam Arema.

¹⁰Yin rik itimo anyuttogo kede taŋo me awura meicel i nyim Parao, omiro mere, kede jo luŋ me kuno, pien yin onwoŋo iŋeo kite ame en owuno kede joni, I kare-naca nyiŋi te cako rwo tuno kede naka tin.

¹¹Yin rik imio pii i dye nam oyabere oko i nyimgi, imiogi obeo kan otwo iwec. Jo ame oryemo yorgi ite miyo mwonyere oko i pii, kite ame gweŋ donyo kede piny i te pii.

¹²Dyeceŋ rik ibedo telogi kede pagi me pol, kun dyewor imenyo nyimgi kede pagi me mac,

¹³I kidi me Cinai, yin rik ite yitto piny baŋgi, rik ite kop kedgi kuno; eka ite miyogi cik ikokome kede pwony me ateni.

¹⁴Icikogi ni myero ogwok nino me cabit bed acil, imio amironi Muca omiogi cik kede icwil luŋ.

¹⁵Kare ame kec onekogi, yin imiogi cam ame oya i polo, kare ame oryo pii ocirogi imiogi pii i kom kidi, Yin rik icikogi ni myero owot ogam lobo-naca, ame rik iciko me miyogi.

¹⁶“Cite gin kwariwa rik ote cako bedo opala ame ŋutgi nwaŋ, kun okwero lubo cik meri luŋ.

¹⁷Gin okwero lubo oko, kun wigi wil oko i kom gin itimo; wigi owil-gu oko i kom taŋo ame rik itimo. Ŋutgi obedo a nwaŋ ote yero atelgi kengi, me dwokogi cen iyi opii i Miciri. Cite yin giri ibedo Obaŋa ame timo kica; yin akica dok mar meri dwoŋ, akemo mom maki oyot. Pi kicani adwoŋŋono omio cunyi mom ocaogi.

¹⁸Kadi bed gin otimo cal jok ame calo atin twon, Miciri, ote cako woro ni en obedo Obaŋa ame okwanyogi kadi gin obedo timo twoni timmogo areco me anywar i komi

¹⁹pi kicani adwoŋ, yin gire mom ibin iwekogi i tim ata, Pagi me pol ame rik telogi dyeceŋ mom oya i baŋgi pagi me mac ame rik mennyigi yo mom daŋ oya i baŋgi dyewor.

²⁰Yin gire imedde miyogi Cuny meri aber me pwonyogi, kun daŋ imiogi manna me acama, kede pii me amata nakanaka.

²¹Pi mwakki pyeraŋwen luŋ ame gin otyeko i tim, yin ibedo miyogi ginnoro luŋ ame gin mito; boŋŋigi naka mom omedo i yec i komgi, tyengi-gu mom daŋ okwot kadi acel.

²²“Yin rik imiogi oloo rok kede loc apapat, kede lobo luŋ ame onwoŋo tye i ŋetgi. Omao lobo me Kecbon, ame rik abaka Cikon loo, kede Bacan daŋ ame rik Og loo.

²³Imio ikwaegi onya atek meicel, ame calo acer me polo, imiogi otuno i lobo ame rik iciko pire baŋ kwarigi ni myero gin owot ogam bed megi.

²⁴Mannono omio ikwaegi owoto i lobo-naca ote gamo bedo megi, yin ibin imiogi oloo jo me lobonaca oko, imio jo me Kanaan kede obakkigi i ciŋgi, me gin otimgi kite a yigi mito.

²⁵Gin rik te mayo twoni boma mogo ame ocelo atek, ote gamo lobo ame ceko cam meicel, kede udi ame jami abeco opon yigi, kede akoŋŋogo ame doŋ okunyo oko, ogamo naka potti jeituni, kede me yen ame nyako nyiggi anaka me olok-gu. Gin ocamo jami iye, oyeŋ, ote cako cwe meicel, cunygi obedo ayom meicel i twoni jami abeco ame imiogi.

²⁶“Kadi amannono, gin obin ojem ote kwero winyi oko; gin te cako loko ŋegi i kom cikki. Oneko odwarpiny ame kwenyorogi, ame tittigi me lokere dwogo baŋi. Gin obedo timo twoni tim areco meicel me nywari,

²⁷Mannono omio yin ite jalogi oko i ciŋ okworgi, okworgi te bedo timogi lit. Kare ame peko doŋ odiogi, gin te cako kok baŋi, yin rik ite winyo kokogi kabedoni i polo. Kica omaki atek i komgi ite cwayo jo me larogi, ame te larogi i ciŋ okworgi.

²⁸Cite i kare ame gin doŋ tye kede kuc, dok ote timo bal i nyimi, yin dok ite jalogi i ciŋ okworgi, okworgi te dok cako loyogi. Kadi amannono, i kare ame gin oŋut ote kok baŋi, yin pwod imedo winyogi i kabedoni i polo, pi kicani yin ibedo larogi tyen apol meicel.

²⁹Yin ibedo kwenyorogi me olokere ocak lubo cikki, cite gin ote bedo wakere awaka kun mom olubo cikki, gin obedo turo cikki, aco kono en obedo yo me kwo. Gin gigi ote kwero oko, kun omedde bedo opala, a ŋutgi nwaŋ.

³⁰Yin ibedi diyo cunyi i komgi pi mwakki apol meicel, ibedo cwayo Cuny meri i kom odwarpiny me kwenyorogi, cite joni omedde bedo calo jo ame yitgi odiŋ. Mannono omio yin ijalogi oko i ciŋ jo me lobo-nono.

³¹Kadi bed amannono, pi kica meri adwoŋ, yin mom ijalogi atwal, mom ijwerogi oko i lobo, pien yin gire ibedo Obaŋa ame akica meicel.

³²“Doŋ ama Rwot Obaŋawa, ame dwoŋ dok tek meicel, Obaŋa ame iyiliyili, ame igwoko cikkereni, dok ame marri mom lokere, kur imi can ame obedo neno obed gin ame pire mom tek baŋi, can ame wan luŋ kede obakkiwa, olocwa, olamdogwa, odwarpinywa, karacel kede kwariwa obedo neno, can ame obedo neno cakere i kare obakki me Acuria tuno kede naka tin.

³³Yin gire iketo can i komwa kakare, yin gire ibedo timo gin ame nyuto genni i komwa, cite wan obedo timo gin arac i nyimi,

³⁴Kwariwa, obakkiwa, olocwa, olamdogwa mom olubo cikki, mom-gu ociko yitgi i gin iciko, akadi tero yitgi i kop ame ibedo kwenyorogi kede.

³⁵Obakki mom obedo tic baŋi i loc ame imiogi, kadi i gum adwoŋ ame imiogi i lobo alac ame ceko cam, gin mom oweko timo gin arac kadi acel.

³⁶Nen, aman doŋ wan odoko opii, i lobo ame rik imio baŋ kwariwa, me ocam mot abeco ame ya iye. Nen, wan doŋ otye iye acalo opii.

³⁷Gin ame ya iye luŋ doŋ kato akata i ciŋ obakki ame iketo me loyowa, pien wan otimo bal. Gin doŋ loo anaka komwa kede dokwa, gin twero timo ginnoro acalo omito, wan doŋ otye i twon peko meciel.”

³⁸Pi gin ame obedo timere-nono, omio wan tin oketo cikere atek odoco, kun ocoo acoa, Olocwa, Olevi, kede olamdog en ame bino keto ciŋgi i cikere-nono.