Read lango Ecita 1 Bible Online

Ecita 1 - lango bible

Ecita 1

¹Man obedo gin ame otimere i kare abaka Akacuwera, ame rik obedo abaka ame oloo loccere cakere India tuno kede naka Eciopia, kun loo dul lobo apapat ame romo mia acel kede pyeraryo wie abiro.

²I kare-naca i kare ame abaka Akacuwera onwoŋo tye obedo i wi kom me loccere i boma adwoŋ me Cuca.

³I mwaka me adekkere me loccere, en ocako tedo arama pi rwode mere kede odoŋe luŋ ame loo tic apapat, kede odoŋe ame telo wi mony i Pacia kede i Media, odoŋe ame oworo kede oloc adoŋo ame tye i dul lobo apapat i te loccere,

⁴En obedo nyuto lonyo kede kwogo ame tye i loccere, dit kede woro ame lwak mie, pi kare alac ame romo nino mia acel kede pyeraboro twal.

⁵Kare ame kare-nono luŋ doŋ otum, abaka ocako tedo arama pi jo luŋ ame onwoŋo bedo i boma adwoŋ me Cuca, otedo arama pi jo atino kede jo adoŋo. Arama-nono ori pi nino abiro, obedo i dyekal me galo waŋ ame tye i ŋet ot abaka.

⁶Dyekallere rik onwoŋo odeo i cuka atar kede en obedo bululu bululu ame oŋabo malo kede tol ame owio i boŋo camanini, kede tol ocele ame obedo amaramar, ame orwako iyi atem me ryal, ame oŋabogi i kom pagi ame otio i kiddi apwot me wel; gi-bedo a lwak onwoŋo otio i jabu kede ryal. Dok kan ame ocicibogi iye onwoŋo okwogo meicel, kun omwono kiddi atitino kede en atar, kede gin ocele ame ryeny aryenya, karacel kede kiddi mogo me wel.

⁷Gi-amata luŋ jo obedo mato kede ikopo me jabu ame kitegi papat; aco koŋo olok obedo oonyo abup meicel ame nyuto lonyo abaka.

⁸Koŋo olok jo obedo mato kun olubo cik, mom tye ŋattoro ame onwoŋo odio adia me mato koŋo; pien abaka onwoŋo ociko odoŋe luŋ ame loo tic me paco mere me timo gin ame ŋat acel acel omito.

⁹Vaciti ame obedo agoŋ abaka onwoŋo daŋ rik otedo arama pi mon i paco abaka Akacuwera.

¹⁰I nino me abiro me arama-nono, i kare ame abaka onwoŋo tye amatte ame cunye yom, en olwoŋo jo ame oroo oko abiro, ame gin rik obedo omiro mere ame tio baŋe, Mekuman, Bijita, Karibona, Bigeta, Abagita, Jetar, kede Karikac.

¹¹En ocikogi ni myero owot okel agoŋŋere Vaciti i nyime, kun oruko tokkere me kwogo, me ebin enyutte baŋ jo ame rokgi papat, me rwode mere nen berrere, pien en onwoŋo obedo dako ame neno mwonya meicel.

¹²Cite agoŋŋere Vaciti te kwero winyo kop abaka oko ame omiro mere: ame oroo oko okelo baŋe. Mannono te miyo cuny abaka waŋ atek, akemo te ciro oko.

¹³Abaka te cako kop oryeko ame ŋeo kop i kom kare apapat, pien mannono onwoŋo obedo gin ame abaka timo kare luŋ; kare luŋ en penyo kop baŋ jo luŋ ame ŋeo cik kede kite me ŋolo kop.

¹⁴Jo ame onwoŋo ceggi kede onwoŋo obedo Karicena, Cetar, Adimata, Tarcic, Merec, Maricena, kede Memukan, magi gin oloc abiro me Pacia kede Media, ame tye kede twer me bino i nyim abaka i kare moro keken, gin obedo jo ame tye i rwom amalo ame ceggi abaka, ame abaka romo winyo kopgi.

¹⁵En te penyogi ni, “Kite ame cik tye kede, ŋo ame myero tim i kom agoŋ Vaciti, pien en okwero winyo kop abaka Akacuwera ame jo ame oroo oko okobbe?”

¹⁶Memukan te kobo kop i nyim abaka, kun oloc apapat daŋ tye ni, “Agonni Vaciti mom otimo bal baŋ abaka keken, cite naka baŋ oloc luŋ me dul lobo apapat, karacel kede jo luŋ i te loc abaka Akacuwera.

¹⁷Kodi tim agoŋ abaka-ni bino winyere baŋ mon luŋ, te miyogi gin daŋ cako cayo coggi, gin bino kobo ni, ‘Abaka Akacuwera onwoŋo ociko ni ter agoŋŋere Vaciti i nyime, cite en gire te kwero wot oko.’

¹⁸Cakere tin-ni, mon luŋ me Pacia kede Media ame owinyo gin ame dako abaka otimo bino bedo rabo koppere baŋ oloc abaka, ame te miyo acae kede akemo bedo adwoŋ meicel.

¹⁹Doŋ ka ce abaka neno tamma ni ber, myero en cwa cik ame ya i baŋe, ame myero coo i akina cik me Pacia kede Media ame mom dok oromo loko; cik ame kobo ni agoŋŋere Vaciti myero kur doŋ nen i nyime atwal. Abaka myero doŋ mi dittere baŋ dako ocele ame ber kate.

²⁰Ka ce cik ame abaka oketo-nono obino rabo pire roma lobo ame en loo luŋ, kite ame dittere tye kede-ni, bi no miyo mon luŋ woro coggi, jo ame rwomgi malo kede jo ame rwomgi piny.”

²¹Tam man te yomoro cuny abaka kede oloc luŋ, abaka te timo kite ame Manukan otamo kede;

²²en te cwayo waraga i dul lobo mere luŋ ame en loo, kun ocoo i nukuta ame jo me dul lobo moro-ni ŋeo, dok ocoo baŋ rok acel acel i lebgi, Ocoo kittono me wek dano acel acel obed rwot me ode, kun kobo leb ame rokkere kobo.