Read lango Ecita 3 Bible Online

Ecita 3 - lango bible

Ecita 3

¹I kare ame kop magi doŋ otyeko timere, abaka Akacuwera omedo rwom Aman wot a Amedata, dano me Agag, omie dit me loyo oloc ocele luŋ ame nwoŋo tye i te loccere.

²Cakere i karenono otic abaka onwoŋo ryebere piny wore kite ame abaka ociko kede. Ento Mordekai onwoŋo mom ryebere piny me wore.

³Mannono omio otic ocele ame tio i te loc abaka openyo Mordekai ni, “Piŋo yin itye ka turo cik abaka?”

⁴Gin obedo penye kittono nino i nino, cite Mordekai mom owinyo kopgi. Man omio gin otito kop man baŋ Aman, me neno ka ce Mordekai twero loyo kop, pien Mordekai onwoŋo okobbigi ni en ebedo Ajudaya.

⁵Kare ame Aman oniaŋ ni Mordekai kara onwoŋo mom ryebere piny wore, akemo omako atek meicel.

⁶Aman te tamo ni pe myero enek Mordekai kene; kite acalo en doŋ otyeko niaŋ ni Mordekai obedo Ajudaya, en te tamo ni myero enwoŋ yo moro me neko Ojudaya luŋ ame tye i te loc abaka Akacuwera.

⁷I dwe me agege, ame obedo dwe ame olwoŋo ni Nican, i mwaka me apar wie aryo me loc abaka Akacuwera, rik ote cako bolo kwir ame olwoŋo ni Pur i nyim Aman; otimo amannono me yenyo nino mene kede dwe mene ame ber me cobo yik Aman, kwir te poto i kom dwe me apar wie aryo, ame obedo dwe ame olwoŋo ni Adar.

⁸Aman te kobbi abaka Akacuwera ni, “Tye rokkoro ame olal oromo dul lobo apapat ame yin iloo kun otye i akina jo, Rokkono cikgi pat meicel ame mom rwatte kede me a rokkoro kadi acel, dok daŋ mom ogwoko cikki, yin abaka, Man omio mom tye konnyoro kadi acel ame mio yin iwekogi obedo kwo.

⁹Doŋ ka ce yin abaka iye, koŋo iketo cik me nek rokkono oko luŋ, an abino culo lim me ryal ame pekkere romo tan mia adek kede pyerabiro wie abic baŋ jo ame loo tic abaka, me gin ket i ot kano lim abaka.”

¹⁰Abaka te kwanyo atem i ciŋe te miyo Aman, wot a Amedata, dano me Agag, ame obedo akwor Ojudaya.

¹¹Abaka te kobo ni, “Lim luŋ obino miyi, rokkono daŋ atyeko miyi, itwero timogi kite ame yin imito.”

¹²Rik ote lwoŋo orani abaka luŋ i nino dwe apar wie adek me dwe me agege, gin te coyo cik kite ame Aman ocikogi kede luŋ, ocoo baŋ odoŋe ame loo dul lo bo apapat kede baŋ oloc ame loo rok apapat, kun ocoo i dul lobo acel acel, dok otio kede nukuta ame jo me dul lobo moro-ni ŋeo, dok ocoo baŋ rok acel acel i lebgi. Waraga-nono rik ocoo i nyiŋ abaka ote mwono doge kun odio atem abaka i kom odok ame omwono kede.

¹³Rik ote miyo oter-waraga riŋo i waraga i dul lobo apapat ame tye i te loc abaka Akacuwera ni myero nek Ojudaya tyek oko luŋ, nek jo atino kede jo adoŋo, mon kede itino i kor, myero nekgi luŋ i nino acel, i nino dwe apar wie adek me dwe me apar wie aryo, ame olwoŋo ni Adar, dok myero yak jamigi oko.

¹⁴Kit waraga-ni myero pok i dul lobo acel acel me wek koppere lal rom jo, me jo yikere pi nino ame ociko.

¹⁵Oterwaraga te ru wot oyotoyot tero waraga pi lubo cik abaka, cikkono daŋ onwoŋo omio oŋeye i boma adit me Cuca, Abaka karacel kede Aman te bedo piny mato koŋo, cite jo ame tye i boma me Cuca obedo kede twon wur adwoŋ meicel.