Read lango Ecita 4 Bible Online

Ecita 4 - lango bible

Ecita 4

¹I kare ame Mordekai oŋeo gin ame otimere, oyeco boŋo mere oko te ruko boŋo cola, te daŋ jukere kede buru, te wot i dye boma, kun akoko atek meicel i dwon aloŋo.

²En owoto naka i dogcel abaka; cik onwoŋo mom ye dano ame oruko boŋo cola me donyo i cel abaka.

³I kare-nono, i dul lobo acel acel ame cik abaka onwoŋo doŋ owinyere iye oko, omio Ojudaya luŋ obedo kede twon kumo adwoŋ meicel. Gin okanyo kec, okok, okumo, jo apol i akinagi oruko boŋo cola kun daŋ ojukere kede buru.

⁴I kare ame aŋeca kede amiro a Ecita oroo otito kop man baŋ Ecita, cuny Ecita ocwer atek meicel. En te cwayo boŋŋi me aruka baŋ Mordekai, kun kobo ni myero gony boŋo cola oko i kome, cite Mordekai mom oye gamo boŋŋi ame Ecita ocwao.

⁵Ecita te lwoŋo Atak, ame en dano acel i akina omiro abaka ame oroo, ame rik onwoŋo omio baŋe me bedo dano ame en ooro; en te cwaye baŋ Mordekai me wot niaŋ ŋo ame otimere dok ŋo omio otimere kittono.

⁶Atak te wot baŋ Mordekai i dye bar alac me boma adwoŋ, i nyim dogcel abaka.

⁷Mordekai te titte ginnoro luŋ ame onwoŋo otimere i kome kede wel lim ame Aman ocikere me culo iyi ot kano lim abaka pi neko Ojudaya.

⁸Mordekai omie daŋ waraga ame ocoo iye cikkono ame opoko i Cuca pi neko Ojudaya, ni en wot nyut baŋ Ecita, te daŋ medo niaŋe, dok myero cike me wot bako doge baŋ abaka, me abaka tim rokkere kica.

⁹Atak te wot kobbi Ecita kop luŋ ame Mordekai otitte.

¹⁰Ecita te kop gin kede Atak, te dok cwaye baŋ Mordekai kun kobbe ni,

¹¹“Otic abaka luŋ karacel kede rok luŋ ame tye i dul lobo apapat i te loc abaka, gin luŋ oŋeo ni ka ce ŋattoro owoto i nyim abaka, kun donyo i dyekal ame tye i yie kun mom olwoŋo, dano-nono kadi bed dako onyo ico myero nek oko; mannono obedo cik acel ame okwako kit jo luŋ, tuno ka abaka otiŋo abiro me loccere malo ni en myero kwo. Cite an mom ru olwoŋa me wot i nyim abaka pi nino pyeradek twal.”

¹²Rik ote wot kobbi Mordekai kop ame Ecita okobo

¹³Mordekai te cwayogi dok baŋ Ecita, kun kobo ni, “Kur itam ni pien itye i paco abaka mio yin ibino bwot ame kato Ojudaya ocele mege.

¹⁴Pien ka ce yin mom ikobo kopporo i kare acalo man, larre Ojudaya bino ya i kan ocele, cite yin karacel kede jo me ot a pappi luŋ ibino to wunu oko. Ŋa a ŋeo ka ce yin mom idoko agoŋ abaka pi miyo kony i kare acalo man?”

¹⁵Ecita te kobbigi me dwokki Mordekai kop ni,

¹⁶“Wot icok Ojudaya ducu ame tye i Cuca karacel, me gin ocak kanyo kec pira, kur ocam ginnoro dok daŋ kur omat ginnoro pi nino adek, dyeceŋ kede dyewor. An karacel kede aŋecana luŋ daŋ obino kanyo kec kite ame wun itye wunu ka kanyo kede. Icennere an abino wot baŋ abaka kadi bed cik okwero, ka ce ato, kopporo gire mom, wek ato.”

¹⁷Mordekai te wot timo ginnoro luŋ ame Ecita ociko ni myero etim.