Read lango Ecita 5 Bible Online

Ecita 5 - lango bible

Ecita 5

¹I nino me adek, Ecita oruko rukkere me kwogo te wot cuŋ i dyekal i yie ame tye i paco abaka, ame otikere i ot adwoŋ me cokere abaka, Abaka onwoŋo tye obedo i wi kommere me loc i dyekal me paco mere, kun opimere i dogcel me paco.

²Kare ame abaka oneno Ecita kun ocuŋ i dye ot, cunye obedo ayom i kome, te tiŋo abiro loccere me jabu ame onwoŋo tye i ciŋe tutuŋ baŋ Ecita. Ecita te wot mulo wi abiro loccere-nono.

³Abaka te penye ni, “Kop aŋo ba, agoŋŋa me awora? Ikwayo ŋo? Obino gire miyi gin ame ikwayo, akadi nucu me locca.”

⁴Ecita ogamo kop abaka ni, “Adwoŋ, ka ce itwero ye, koŋo yin kede Aman ibino wunu iyi cammoro aduno ame ayiko pirwu tin.”

⁵Abaka te kobo ni, “Ru kelo Aman kan, me otim gin ame Ecita amito-ni.” Mannono te miyo abaka kede Aman wot i cam ame Ecita oyiko pirgi.

⁶I kare ame gin onwoŋo tye amato koŋo olok, abaka okobbi Ecita ni, “Gin aŋo imito ni atim piri? Obino gire miyi. Ikwayo ŋo? Kadi bed nucu locca, bino gire cobere.”

⁷Cite Ecita te kobo ni, “Gin amito ame akwayi iye eŋe:

⁸Ka ce ayomoro cunyi, adwoŋ, abaka, dok ka ce itwero miya gin amito, te daŋ cobo gin akwao, akwao ni yin abaka kede Aman diki ibin icam wunu cam ame abino yiko pirwu, eka diki-nono ate timo gin ame abaka okobo.”

⁹I nino-nono Aman te dok ame cunye yom atek meicel. Cite i kare ame Aman oneno Mordekai i dogcel abaka, mom oya malo, mom daŋ onyuto woro baŋe kadi acel, akemo omake meicel i kom Mordekai.

¹⁰Kadi bed amannono, en odio cunye te wot paco, en te cwayo kwena, ote lwoŋo owote mere kede dako mere Jerec.

¹¹Aman te cako boko kop i kom kite ame lonyo mere dwoŋ kede, kun kwano anaka wel awobe mere, rwom apapat ame abaka obedo miye me wore, kede kite ame omie kede twero ame kato oloc wadgi luŋ kede omiro abaka daŋ ducu.

¹²Dok te medde i boko koppere ni, “Kadi naka agoŋ me awora Ecita, en daŋ mom ye ŋattoro woto gin abaka me wot camo cam, ame eyiko, kono ka an keken. Diki doki en olwoŋa me wot wan abaka.

¹³Kadi bed amannono, magi-nono luŋ mom ru aneno konnyoro iye kadi acel, ka ce pwod amedde neno Ajudaya moro a nyiŋe Mordekai-nu tye bedo i dogcel abaka.”

¹⁴Dako mere Jerec kede owote mere luŋ te kobo ni, “Mi yik yat me deyo jo ame borrere romo futi pyerabiro wie abic, me diki odiko ikobbi abaka ni myero de Mordekai iye; me iwot ame cunyi yom i cam ame oyiko pirwu wun abaka.” Tam man oyomoro cuny Aman, ento miyo yiko yat me deyo dano.